¹ Malaika umwi oyo ali ne [vitasa] musamvu aliza alanibhwila oti newize eno none nkukulanzya hukumu ye mwa kahaba mukulu oyo akwikalanga higulya ye minzi minki. ² Oyo bhami bhe mubhwelelo bhasihizye nage ne bhantu bhe mubhwelelo bhakozilwe ku vikozi vye bhusihya bhwamwe." ³ Malaika alansola kimwizo alanfila mwikungu, ndamubhona oyo mukima ikalisye higulya ye ndimu yeza eyo yali yokele mazina ge matusi, ndimu yali ne mitwe musamvu ne mahembe ikumi. ⁴ Mukima alibhwambikwe myenda zye zambarau, ne zyeza kandi ali bhubhezibhwe ku dhahabu, ne kumabhale ge mpiya ninki ne [lulu] ali aikwatilile mumabhoko gamwe ne sikombe sye dhahabu syali mumabhoko gamwe esyo syali bhwokale ivimbezya lye bhusihya bhwamwe. ⁵ Bhutonzi bhwe bhusyo bhwamwe lilibhwandikwe izina lye siri. "BABELI MUKULU, NINA WE BHAMALAYA NE WE VINTU VYE KUGAISYA AHA HANSI." ⁶ Ndabhona mukubha oyone mukima ali akozilwe kumagazi ge bhazumya ne kumagazi ge bhakanilizya abho bhamukaniliya nga Yesu, ndabha namubhona ndakwatwa kukumya kukulu. ⁷ Alahe malaika alanibhwila oti nekusi wekukumya? nkukubhwila omwo ili kulwoyone mukima ne omwoili kulweyo ndimu yili bhumubhusye (ndimu eyone ye mitwe musamvu ne mahembe ikumi). ⁸ Eyo ndimu ulaibhona eyo yaliyo hanuma otine italiho, naye ikupuna kuvwa mulina lye kuzimu kuzya mumayabhazyo, ne bhantu abho bhakwikalanga mubhwelelo abho mazina gabho gatali bhwandike musitabho sye bhuhanga kupuna kubhumbwa kwe bhwelelo bhakukumya kuibhona eyone ndimu kulwekubha yabhangaho, kandi ilabhulaho otine yabhaho. ⁹ Igambo elyane lyekwendelwa bhwenge ne masala, ezyo mitwe musamvu ne ngulu musamvu eyo mukima alikalisya higulya yazzyo. ¹⁰ Naye ne bhami musamvu bhatano bhalamazile kugwa umwi aliho neyune asyali kwiza nawe olo alakiza alakikalisya itungo idone tuhu. ¹¹ Ndimu eyo yaliho alahe otine italiho, eyone ne ye munane; alahe ne umwi wabho bhami musamvu naye yekuzya mumayabhalo. ¹² Ago mahembe ikumi ulabhona age ne bhami ikumi abhone bhasyali kwanukula bhwami bhwabho alahe bhalakanukula bhwami kwitungo limwi sihamwi neyo ndimu. ¹³ Abhane bhaligumwi ne bhalakamuha nguzu zyabho ne bhudula oyo munandimu. ¹⁴ Bhalakasola ne mwana we ntama, alahe mwana we ntama alakabhakinda kulwekubha awe ne mukama we bhakama ne mwami we bhami ne kwawe tulalangwa tulalahwa bhatungilizya." ¹⁵ Malaika alanibhwila oti agone minzi ulabhona aho alikalisya oyone malaya ne bhantu, ne mukutano gwe bhantu mahanga ne ndimi. ¹⁶ Agone mahembe ikumi ago ulagabhona sihamwi neyo ndimu bhalakamubhusya oyo mukima malaya, nabhe bhalakamugema kubha mufuvi ne bhuvule bhalakamulya mubhili gwamwe ne bhalagwosye ne kuguzizya hamulilo. ¹⁷ Kungoko Mungu atuzile mumizo zyabho kubhusya miganiko gamwe mukwizumilizya kwe kumuha oyo munandimu nguzu zyabho kuhika magambo ge mwa Mungu aho galakahikila. ¹⁸ Oyo mukima oyo ulamubhona ngenesyo syalo sikulu, esyo siku temanga higulya ye bhami bhensi."