¹ Kandi ndabhona simaninkizyo sindi mwilunde, sikulu nekandi syekukumywa; ndabhona bhamalaika musamvu bhemahano musamvu, ago gali mahano ge kwihelezya, (kwagone syaha syemwa Mungu syeli syahikanile). ² Ndabhona sintu kati nyanza yilole, yebhusangilizye ne mulilo, nabho bhakindi abho bhekupuna kweyo ndimu ne sanamu yamwe, ne kuhesabu ye izina lyamwe, bhalimilila hapelo ye nyanza ye ilole eno bhaline [vinubi] vye mwa Mungu. ³ Nabhe bhimbanga lwimbo lwe mwa Musa muzyana we mwa Mungu ne lwimbo lwe mwana we ntama; bhakuyomba oti milimo yako ne mikulu nekandi ye kukumya mukama Mungu oyo ukutemanga kuvintu vyona, mwaminifu ne nzila zyako ne zye nhana, mwami we mahanga. ⁴ Nende oyo atakukwobhaha obhe mukama ne kulikuzya izina lyako? kulwekubha obhene winene nge uli mutakatifu, mahanga gona galakiza ne kukulamya bhutonzi yako kulwekubha uli wekapanga ne vigemo vyako vyekumaninka." ⁵ Hanuma yagone gona ndalinga lwande lutakatifu muno aho haliho ne ihema lye bhukanilizya, elyo liliguka mwilunde. ⁶ kupuna lwande lutakatifu muno bhaliza bhamalaika musamvu bhe mahano musamvu, bhambalile vyambalwa vitali ne makwe, [kitani] ye kulabhagila ne musipi gwe dhahabu muvifubha vyabho. ⁷ Umwi wabho bhebhuhanga bhane alabhaha mabakuli musamvu ge dhahabu gali gokele syaha sye mwa Mungu oyo akwikalanga bhwelelo ne bhwelelo. ⁸ Lwande lutakatifu halokala lyonsi kupuna mubhubheho bhwe mwa Mungu ne kupuna mubhudula bhwamwe, ataliho oyo aladuzya kwingilamo mpaka mahano ge bhamalaika musamvu galabha gamalila.