¹ Ndilinga mwana we ntama ali imilile bhutonzi yane higulya ye lugulu lwe Sayuni, sihamwi nabho 144,000, abho bhabhanga ne izina lyamwe ne izina lyemwa Dadaye lyali bhwandikwe mubhutonzi bhwe bhusyo bhwabho. ² Ndabha nomvwa silaka kupuna mwilunde yekubha kati mulundumo gwe minzi ne silaka sikulu sye lukubha, nesilaka esyo ndasimvwa nekati silaka sye bhafula [vinubi] olo bhakufula vyabho. ³ Bhakwimba nimbo nhyanhya mubhutonzi bhwe itebhe lye syami ne bhutonzi bhwe bhebhuhanga bhane ne bhanampala. Bhataliho bhandi abho bhaduzyanga kulwilanzya olwene lwimbo alahe abhone 144,ooo, tuhu abho oti bhali bhulokolwe kupuna mubhwelelo. ⁴ Abhane ngenabho bhatalibhwisige makwe sihamwi ne bhakima, kulwekubha bhaliyangalila kulwe vigemo vye bhusinhya ngenabho bhmulondezyanga mwana we ntama tyeyo hona eyo azyanga abhane bhalalokolwa kupuna mubhantu abhone nevisumo vyekwandya mwa Mungu ne kumwana we ntama. ⁵ Bhutaliho bhubhehi obhwo bhuligela kupuna mumilomo zyabho nolo hado. ⁶ Ndamubhona malaika undi akuguluka hakati ye ilunde nawe ali ne mpola nsoga zye mwilunde alabhahulukila bhikala mubhwelelo, kukila ihanga luganda, lulimi, lwe bhantu. ⁷ Alabhalanga kusilaka sikulu, oti mumwobhahe Mungu ne mumuhe ikuzyo kulwekubha itungo lye hukumu yamwe lyegelele, mumulamye awe kulwekubha awe ngenoyo alabhumba ilunde ne nsi ne nyanza ne mvwilo zye minzi." ⁸ Malaika we kabhili alalondezya eno akoyomba oti gwagwa gwagwa muzengo mukulu gwe Babeli ogwo gwabhanwesyanga bhanamahanga vikozi vye kukolwa evyo vyaletelezya syaha sye Mungu higulya yagwo." ⁹ Malaika we kasatu alalondezya akuyomba musilaka sikulu oti kutyoyowona oyo akamulamya oyo munandimu sihamwi ne sanamu yamwe, nekwanukula lumanilo habhusyo nolo hakubhoko, ¹⁰ oyone nawe akunwa sikozi sye kukolwa sye syaha sye mwa Mungu, sikozi esyo syatayalisibhwe ne kuseswa eyo itali bhusangilizye musikombe sye syaha syamwe muntu oyo akanwa alakagalazibhwa ku mulilo ne mulilo gwe sibhiliti bhutonzi bhwe bhamalaika bhamwe bhatakatifu ne bhutonzi bhwe mwana we ntama. ¹¹ Nelyonsi lye manegelo gabho lilagegela higulya bhwelelo ne bhwelelo ne bhatali ne kwifula mumanegelo bhwile nolo mwizyobha abhone bhakuilamyanga ndimu neyone [sanamu] yamwe ne kutyoyowona oyo alanukula lumanilo lwe izina lyamwe. ¹² Ahane nge hekwiyomelezya kwe bhazumya abho bhakukwatanga malagilo ge Mungu ne imani ye mwa Yesu. ¹³ Ndomvwa silaka kupuna mwilunde sikuyomba oti newandike oti hambu hambu abho bhakufwilanga mumabhoko ge mwa Mungu," "ee," mwizo mutakatifu ekuyomba, bhabhone kwifula kulwekubha vigemo vyabho vikubhalondezyanga." ¹⁴ Ndalinga kandi ndabhola lyaliho ilunde lyepe, noyo ali ikalisye ho hilunde elyone ikolanga ne muntu, ali ne ngikili ye dhahabu hamutwe gwamwe ne lihyo lyogi mukubhoko kwamwe. ¹⁵ Malaika undi aliza kupuna muwi Hekalu ne alalanga kusilaka sikulu kwoyo ali ikalisye helyo ilunde; alayomba oti sola lihyolyako ubhikizye kwimbula, kulwekubha ikanza lye limbula lyahikileho kulwekubha visumu habhwelelo vyahile. ¹⁶ Oyo ali ikalisye hilunde alahisya lihyo lyamwe bhutonzi ne bhwelelo bhelelo ilimbulwa. ¹⁷ Malaika undi aliza kupuna mwi Hekalu lye mwilunde nawe ali ne lihyo lyogi. ¹⁸ Kandi malaika undi aliza kupuna halutali hanuma malaika oyo ali ne bhudula bhwe mulilo alamulanga kusilaka sikulu malaika oyo ali ne lihyo lyogi alamubhwila oti nusole lihyo lyogi ubhilinge matabhazi ge mizabibu kupuna hamuzabhibhu gwe hansi kulwekubha otine mizabibu zyahile." ¹⁹ Malaika alatagila lihyo mubhusyo bhwe nsi alabhilinga limbula lye mizabibu ye habhwelelo alazitagila mwifipa lye syaha sye Mungu. ²⁰ Isyizilo lye divai lilabudagulwa helu ye muzengo ne magazi galaseseka kupuna mwelyone ifipa simo sye [hatamu]ye farasi bhulele bhwe kuzya stadia 1,600.