¹ Hanuma ndabhona ndimu ikupunilila munyanza, yali ne mahembe ikumi ne mitwe musamvu, hamahembe gamwe zyaliho ngikili ikumi ne mumitwe zyamwe galiho magambo ge bhutukani bhwe kumutuka Mungu. ² ndimu eyo ndaibhona ikolanga ne nsubhi, magulu gayo nage gikolanga ne ge [dubu] ne mulomo gwayo gwikolanga ne gwe nsimba,eyo nzoka ilamuha nguzu ne itebhe lyamwe lye syami sihamwi ne bhudula bhwe nguzu ne kutema. ³ Mutwe gwayo gumwi gwali ne nkovu nkulu yekufwa kwayo, alahe nkovu yayo ilasila ne bhwelelo ilakumya muno hanuma ilailondezya eyone ndimu. ⁴ Bhalailamya eyone nzoka kulwekubha ilamuha bhudula oyo munandimu nekandi ilamulamya sihamwi ne munandimu, eno bhakuyomba oti nende kati munandimu nekandi nende oyo enkihalalika nage?" ⁵ Munandimu alahebhwa mulomo ayombe mihayo ye kwikumilizya ne matusi, alazumilizibhwa kubha ne bhudula mwezi makumi ane ne ibhili. ⁶ Munandimu alafundukula mulomo gwamwe kuyomba matusi mwa Mungu, alalitukagula izina lye mwa Mungu sihamwi nabho bhakwikalanga mwilunde. ⁷ Munandimu alazumilizibhwa kubhezya nsola ne bhazumya alabhakinda hanuma alahebhwa bhudula kukila lugand ne ndimi ne mahanga. ⁸ Bhona abho bhikalanga mubhwelelo bhalamulamya awene tuhu, kila oyo izina lyamwe lisyali kwandikwa musitabho sye bhuhanga kubhukila kubhumbwa kwe bhwelelo sitabho esyo sye bhuhanga sye mwana we ntama oyo alasikwa. ⁹ Olo muntu tyoyowona aline matwi gekwomvwa ne omvwe. ¹⁰ Olo muntu alamkwata mwisyamwe [mateka] nawe alakakwatwa namuna eyone olo alihaga kulupanga nawe alakihagwa kulupanga ahane nge hakwiyomelegezya kwe kuzumya kwe bhatakatifu. ¹¹ Kandi ndamona ndimu indi ikubalika kupuna hansi, ndimu yali ne mahembe abhili kati ge ntama alahe yalomelanga kati nzoka. ¹² alalanzya bhudula bhwona obhwo ali nabhwo bhwe ndimu ye kwandya mubhutonzi yamwe ne mubhwelelo ne kwabho bhabhanga sihamwi nage bhakumulamya oyo munandimu wekwandya oyo nkovu yamwe ilasila. ¹³ Alagema yekukumya mikulu kuhikila kutikizya mulilo kupuna mwilunde kwiza habhwelelo mubhutonzi ye bhantu. ¹⁴ Alabhabhuzya abho bhakwikalanga mubhwelelo kulwe malebhagamwe alabhabhwila oti bhabhezye [sanamu] hikuzyo lye ndimu eyo yali bhuvulazibhwe ne lupanga kandi ilasila. ¹⁵ Alazumilizibhwa kuitulila mwayu eyone sanamu nekuigema iyombe ne kubhaletelezya abho bhalakema kuilamya bhihagwe. ¹⁶ Alahatikizya kukila muntu kafuse, ne kuwenguzu, ne musabhi, ne muhabhi, webhwiyagalule, ne muzyana, kutulilwa lumanilo hakubhoko kwe bhulyo nolo bhutonzi habhusyo. ¹⁷ Ibhe vigume kuguzya nolo kugula mpaka uli ne lumanilo lyeyo ndimu ne eyane ne namba ye kumanisya izina lyamwe. ¹⁸ Eyane yekwendela bhwenge ne muntu olo alabha ne bhwenge aipete eyone namba yeyo ndimu kulwekubha ne namba ye simuntu naye ne 666.