¹ Mwilunde aligelayo mukima oyo ali bhufundikilwe ne izyobha ne mwezi gwali mumagulu gamwe ne ngikili ye nsonda ikumi ne ibhili zyali higulya ye mutwe gwamwe. ² Oyone mukima ali bhutimbe akulila kulwe kulumililwa bhusungu bhwe kubhuta. ³ Iligelayo indi mwilunde yaliho nzoka nkulu yeza eyo yali ne mitwe musamvu ne mahembe ikumi ne zyaliho ngikili musamvu hamutwe gwamwe. ⁴ Musila gwayo gulabhulula theluthi imwi ye nsonda zye mwilunde zilatagilwa hansi eyone nzoka ilimilila bhutonzi bhwoyo mukima egelelanga kuzyala oti olo alazyalatuhu oyo mwana eyo nzoka imumile oyo mwana wamwe. ⁵ Alamubhuta mwana mugosya oyo alakagimilila mahanga gona ne mulanga gwe silanga ne mwana wamwe alapulwa kuzya mwa Mungu hitebhe lyamwe lye syami. ⁶ Mukima nawe alilukila mwikungu lwande olwo Mungu ali atayalisye kulwemukima oyone abhone kulisibhwa nsiku 1,260. ⁷ Yaliyo nsola mwilunde Mikaeli ne bhamalaika bhamwe bhalasola neyo nzoka neyo nzoka nkulu sihamwi ne bhamalaika bhayo bhalasola nabho. ⁸ Alahe nzoka italinenguzu zye kukinda, kulweyo bhwikalo bhwayo mwilunde bhutalabhaho sihamwi ne bhamalaika bhayo. ⁹ Nzoka nkulu eyo nzoka ye kale eyo ikulangangwa ibilisi nolo syetani oyo akubhehagulanga bhwelelo yona alatagwa mubhwelelo, sihamwi ne bhamalaika bhamwe. ¹⁰ Hanuma ndomvwa silaka sikulu kupuna mwilunde sikuyomba oti otine bhulokozi bhwiza nguzu ne bhwami bhwe mwa mungu witu, ne bhudula bhwe mwa Yesu Kristu wamwe, kulwekubha mutengi we bhadugu bhitu atagwa hansi oyo alabhatenga bhutonzi ye Mungu witu bhwile ne izyobha. ¹¹ Bhalamukinda kumagazi ge mwana we ntama ne kwigambo lye bhukanilizya bhwabho kulwekubha bhatalasima bhuhanga bhwabho nolo kufwa. ¹² Kulweyo mufule mpundu imwe ilunde sihamwi ne bhona abho mukwikalanga mukati yahe, alahe nelwinu imwe nsi ne nyanza kulwekubha oyo mubhi atagilwa winu nawe alinesyaha sikulu, nawe. ¹³ Aha eya nzoka yamanywa mukubha yatagilwa hansi ilamulondezya oyo mukima oyo alazyala mwana mugosya. ¹⁴ Alahe mukima alahebhwa manana abhili ge mbesi nkulu alale mpaka aho alabhegezibhwe kulwamwe eyo mwikungu, eyo alatulilwe kulelwa ku ikanza ne makanza ne nusu ye ikanza eyo itenkadula kuhikayo eyo nzoka. ¹⁵ Nzoka ilaluka minzi kupuna mumulomo gwayo kati mwiga mukwenda gumusehe oyo mukima. ¹⁶ Alahe nsi ilamukwasya oyone mukima ilasama ilagumila ogwone mwiga ogwo gulalukwa neyo nzoka kupuna mumulomo gwayo. ¹⁷ Hanuma nzoka ilamusyahalila mukima ngenahu nzoka ilasubha ilabhukizya kusola ne sizyele syamwe syona abho bhalibhukwate silagilo sye mwa Mungu sihamwi ne bhukanilizya bhwe mwa Yesu. ¹⁸ Hanuma nzoka ilimilila higulya ye musenga gwe hanyanza hamwalo.