¹ Ndabha nahebhwa ibhingo bhingo lyebhwikole ne mulanga ndabhwilwa oti bhuka ulipime ihekalu lye mwa Mungu sihamwi ne lutali lwahe pye nabho bhakulamyangamo. ² Alahe utakapima helu yalyo ihekalu kulwekubha bhahelwe bhanamahanga, bhalakasikandagila syalo mwezi ikumi ne ibhili. ³ Nkubhaha bhakanilizya bhane bhudula bhwe kuhangila ku nsiku 1,260, eno bhalabhe bhambele magunila. ⁴ Abhone bhakanilizya ne miti ibhili ye mizeituni ne tala ibhili ezyo zimilile mubhutonzi bhwe mukama we bhwelelo. ⁵ Olo muntu tyoyowona alenda kubhayabhazya mulilo gukupunanga mumilomo zyabho ne kubhayabhazya bhikuvi bhabho, ne kutyoyowona oyo alenda kubhayabhazya ekwendelwa kufwa munzila eyane. ⁶ Abhone bhakanilizya bhali ne bhudula bhwekwegeka ilunde mvula itakahula mwikanza lye bhuhangizi bhwabho, bhali ne nguzu zye kupilula minzi kubha magazi ne kuihula nsi kumayabhalo gona mwikanza tyelyolyona olo bhalenda. ⁷ Bhalakabhabhamala bhukanilizya bhwabho ndimu eyo yekuvwa mulina elyo litali ne nkalilo alakasola nabho nekandi alakabhakinda ne kubhihaga. ⁸ Mibhili yabho ilakalambalala mwibalabala lye muzengo mukulu (ogwo kimwizo gwekulangwa Sodoma ne Misri) aho mukama wabho alagalazibhwa. ⁹ Munsiku isatu ne nusu kupuna mundugu zye bhantu ne munganda, ne mubhe ndimi, ne bhe mumahanga, bhalakazibhona maiti zyabho ne bhatalakazumilizibhwa kuzizika. ¹⁰ Abho bhakwikalanga munsi bhalakihalala kulwe kufwakwabho ne kufula mpundu nekwitumila zawadi kklwekubha abhone bhafumbuzi bhabhili bhalabhagalazya muno abho bhakwikalanga munsi. ¹¹ Alahe hanuma ye nsiku isatu mwayu gwe bhuhanga kupuna mwa Munga gulakabhazyamo nabhe bhalakimilila kumagulu gabho, bhwobha bhukulu bhulakabhazyako abho bhekubhabhona. ¹² Hanuma bhalakomvwa silaka sikulu kupuna mwilunde sikubhabhwila nemwize eno nabhe bhalakazya higulya mwilunde eno bhikuvi bhabho bhakubhalingilila. ¹³ Mwitungo elyone ilakabhaho namutitima nkulu neimwi ikumi ye muzengo ilakagwa, ne bhantu vihumbi musamvu bhalakafwa kulwe namutitima nabho bhalakikala mpola bhalakobhaha ne bhalakamukuzya Mungu we mwilunde. ¹⁴ Nelwinu lwekabhili lwamalakuhita nelwinu lwe kasatu lwekwiza bhwangu. ¹⁵ Malaika we musamvu alafula mpembe yamwe ne silaka sikulu silahamuka mwilunde silayomba oti bhwami bhwe bhwelelo bhwabha bhwami bhwe mukama witu ne bhwe mwa Kristu wamwe alakatema bhwelelo ne bhwelelo." ¹⁶ Hanuma bhanampala makumi abhili ne bhane abho bhali bhikalisye hamatebhe ge syami bhutonzi ye mwa Mungu bhalagwa bhenekili hansi mukwinama bhusyo bhwabho hansi nabhe bhalamulamya Mungu. ¹⁷ Bhalayombaoti twekukulumbilizya mukama Mungu, mukulu we gona oyo uliho nekandi waliho, kulwekubha wasola nguzu zyako nkulu ne kutema. ¹⁸ Bhemahanga bhalasyahala alahe siniga syako siza, itungo lyahikaho kubhafu bhahukumibhwe nobhe ne kubhaha mpele bhazyana bhako bhafumbuzi, bhazumya nabho bhaline bhwobha bhwe izina lyako bhona abho bhatekwendelwa ne bhenguzu,ne makanza gako gahika ge kubhabhihya abho bhaibhihyanga bhwelelo." ¹⁹ Hanuma ihekalu lye mwa Mungu mwilunde liligulwa ne isanduko lye ilagano lyamwe liligela mukati ye ihekalu lyamwe, zyalimo ndabhi zye mwangalazima iyoge ne mihindo ye nkubha, namutitima ne mvula ye mabhale.