¹ Yesu alapuna mwisalililo ne alazya lwe magulu, Bhahemba bhamwe bhalamuzyako bhalabhukizya kumulanzya manumba ge isalililo. ² Yesu alabhitabhila ne alabhabhwila oti mwekugabhona angane gona? nekubhabhwila oti litaliho ibhale elyo litalakahombolwa higulya ye lisyamwe. ³ Ilabha aha ali ikalisye haligulu lwe mizeituni bhahemba bhamwe bhalamwizako mukapuzyo, bhalamubhuzya mukuhaya oti hani ututembusye eyane yona ilakabhaho lyali?nekandi ne simaninkizyo syekwiza kwako nesye muhelo silakabha si?" ⁴ Yesu alabhitabhila ne alabhabhwila oti mwiyangalile muntu tyoyowona atizakubhabhehagula. ⁵ Kulwekubha bhinkibhalakiza mwizina lyane ne bhalakabhabhakubhabhwila oti one nge ndi Kristu:',nabhe bhalakabhabhehagula bhinki. ⁶ Mulakabhamukwimvwa mabhulugu ne nkumyo ze mabhulugu: mwiyangalile mutakiza kwobhaha kulwekubha eyone yona yekwendelwa kubhaho alahe muhelo gulabhe gusyali. ⁷ Kulwekubha ihanga lilakalivulumukila ihanga lisyamwe;ne bhwami bhulakabhuvulumukila bhwami bhwisyamwe ne zilakabhaho nzala ne kwagalala ne nahinga zilakabhaho eyo neyo. ⁸ Alahe agone gona ne mbuki ye kulumwa bhusungu tuhu muhelo gulabhe gusyali. ⁹ Ngenaho bhalakapunwya mwagalazibhwe ne bhalakabhihaga; nekandi mahanga gona galakabhagaya kulwe izina lyane. ¹⁰ Ngenaho bhinki bhalakikumpa nabhe bhalakabha bhakwigulilila abhe kwa bhe ne kwigaya. ¹¹ Ne bhahangizi bhe bhubhehi bhinki bhalakiza,ne kandi bhalakabhabhehagula bhinki. ¹² Kulwe bhugomi bhulakabhaho bhwinki bhwisime bhwe bhinki bhulakahola. ¹³ Alahe oyo alakiyomelezya kuhikila kumuhelo ngenoyo alakasila. ¹⁴ Ne igambo lye bhwami lilakalomelwa muvyalo vyona,ibhe bhukanilizya kumahanga gona, ngenaholelo muhelo gulakiza. ¹⁵ Alahe olo mulakabha mwabhona elyo lye bhukenaguzi elyo lilayombwa ne muhangizi Danieli, limilile halwande lutakatifu [oyo akusomanga itegelezye]. ¹⁶ Ngenaho abho bhalimubhuyahudi bhilukile mulugulu. ¹⁷ Noyo alihigulya ye numba atakiza kutikila kusolamo tyesyosyona munumba yamwe. ¹⁸ Ne oyo ali mumugunda atkiza kusubha kusola syambalwa syamwe. ¹⁹ Alahe nelwabho abho bhalakasangwa bhalinda nabho bhekwonsya munsiku ezyone. ²⁰ nekandi musabhe oti munsiku ezyone zitizakubha nsiku zye mpeho nolo zye sabhato. ²¹ Kulwekubha munsiku ezyone kuakabhaho kwagalazibhwa kukulu, okwo kusyali kubhaho kufuma kusumbwa kwe nsi nekandi kutalakabhaho kandi. ²² Nekandi oti olo ezyone nsiku zitenka dohibhwe atenkasizile nolo muntu umwi, alahe kulwe bhalahwa ezyone nsiku zilakadohibhwa. ²³ Ngenaho olo muntu alabhabhwila oti mulinge Krisitu alyaha, nolo oti alyeyo mutakiza kuzumya. ²⁴ Kulwekubha bhalakigengeleka bha Kristu ne bhakangizi bhe bhubhehi nabhe bhalakabhezya minki ye kukumya nabhe bhalakabhabhehagula ne bhalahwa, ²⁵ Mulinge natonga kubhabhwila eyane. ²⁶ Kulweyo olobhalakabhabhwila oti mulinge Krisitu ali mwihala mutiza kubhadegeleka nolo ali munumba mutiza kuzumya eyone mihayo. ²⁷ Oko kati omwo lukubha lukulabhanga kupuna kiya kuzya mweli, nekwiza kwe mwana we muntu kulakabha namuna eyone. ²⁸ Oko tyaho hona aho lilibhufwileho idimu ngenaho zilakibhilingaho mbesi. ²⁹ Alahe mukwagalazibhwa okwone izyobha lilakilabhula, ne mwezi gutalakapunwya mwangalazima gwagwo, ne nsonda zilakahululuka kupuna mwilunde; ne mabhudula ge mwilunde galakatinginibhwa. ³⁰ Ngenaholelo silakigela simaninkizyo sye mwana we muntu mwilunde, ngenaho nganda zyona zye munsi zilakalila nkungwe, nazye zilakamubhona mwana we muntu akwiza mumalunde ge mwilunde sihamwi ne bhudula ne lyobhahika ikulu. ³¹ Alakabhalagizya bhamalaika bhamwe ne silaka sikulu sye ihembe, nabhe bhalakabhabhilinga sihamwi bhalahwa bhamwe kufu mapande ane ge bhwelelo, kufuma lwande lumwi kuzya lwande lundi. ³² Mwilanzye kufuma hamuti gwe mutini oti itambi lyahe olo lilatotohala nekandi lilafuluma matutu mukumanwyanga mukubha mwaka gwabha hihi. ³³ Namuna eyone olo mulakabha mwagabhona agane gona mumanwye mukubha oti mwana we muntu alihamuzigo. ³⁴ Nhanane nekubhabhwila sizyalile esyane sitalakahita kuhika eyane yona ilakabha yagelanila. ³⁵ Ilunde ne nsi zilakahita alahe mihayo yane italakahita byo. ³⁶ Alahe kulwe lusiku ne makanza gekwiza kwe mwana we muntu ataliho oyo ekulumanwya nolo bhamalaika bhe mwilunde alahe ne Dada inene ngenoyo ekulumanwya olwo lusiku. ³⁷ Kati omwo yali munsiku zye mwa Nuhu ngenomwo kulakabha kwiza kwe mwana we muntu. ³⁸ Kati omwo bhali munsiku ezyone aha ihuma lisyali kubhazyako bhalyanga nekandi bhaswelanga ne kuswelwa kuhikila aho Nuhu alabha ingila mungalabha. ³⁹ Nabhe bhalibhwilabhile ihuma liliza lilabhayola bhona, nekwiza kwe mwana we muntu kulakabha namuna eyone. ⁴⁰ Ngenaho bhalakabhayo bhantu bhabhilil mumuguna umwi alakasolwa undi alakalekwa. ⁴¹ Bhakima bhabhili bhalakabha higwe bhakusya umwi alakasolwa undi alakalekwa. ⁴² Kulweyoyona mwikale minso kulwekubha mutekumanwya ne mwikanzasi mukamawinu alakizilamo. ⁴³ Alahe mumanwye mukubha olo munamugi abhe alamanwya mulusiku lwe kulinda oti mwivi akwizilamo abhe alikala minso ne atenkazumizye numba yamwe kuhombolwa ne kwibhwamo. ⁴⁴ Kulwayo nimwe mwikale minso kulwekubha mwikanza elyo mutekumanwya mwana we muntu alakiza. ⁴⁵ Alahe nende muzyana musoga ne webhwenge oyo isye bhuzya alamutula kubha mulabhadi wekaya yamwe kubhabhanzila silibhwa mwikanza ihikane. ⁴⁶ Ne webhufuhulwe muzyana oyone oti isye bhuzya alakamusanga akugemanga otine olo alakiza. ⁴⁷ Nekubhabhwila oti alakamutula higulya ye vintu vyamwe vyona. ⁴⁸ Alahe muzyana mubhi olo alayomba mumwizo gwamwe oti, Dada bhuzya akendelela kwiza. ⁴⁹ Nekandi alabhukuzya kubhalimbagula bhazyana bhisyamwe ne kulya nekunwa sihamwi ne bhakolwa. ⁵⁰ Isye bhuzya we muzyana oyone alakiza mulusiku olwo atekulwiganikila ne mwikanza elyo atekumanwya. ⁵¹ Isye bhuzya alakamuhingula mapiligi abhili nawe alakamusangizya mumpela sihamwi ne bhibhelezya eyo silakabhayo sinsozi sihamwi ne kusya mino.