¹ Hanuma alalomela ne bhantu sihamwi ne bhahemba bhamwe alyomba. ² Bhandisi sihamwi ne Bhafarisayo bhalibhwikalikizye itebhe lye mwa Musa. ³ Kulweyo tyesyosyona esyo bhalabhabhwila kugema muyigeme alhe alahe mutakiza kugema kagemele kabho omwo kali, kulwekubha kuyomba bhakuyombanga alhe kugema eyo bhekuyomba bhatakugemanga. ⁴ Kulwekubha bhakubhohelanga miligo mitimbe inantabhusibhwa ne kubhabhagalika bhandi hamabhega alaahe abhe bhatakugemekanga kuikwataho nolo kuminwe zyabho. ⁵ Vigemom vyabho vyona bhakuvigemanga bhalingwe ne bhantu,kulwekubha abhe bhakwambalanga myenda migazi zye ndili ezyo zilibhwandike silagilo ne kulehya muno myenda zyabho zye sala. ⁶ Nekandi bhalibhusime kwikalisya hamatebhe ge bhutonzi mumabhugeni, nolo muma salililo. ⁷ Nekukezibhwa kwikuzyo mumagolilo nekulangwane bhantu mulangisya. ⁸ Alahe imwe mutekwendelwa kulangwa bhalangisya kulwekubha mulinage mulangisya umwi newe ne Krsitu nimwebhona mulibhe bhudugu bhumwi. ⁹ Mutakabha mukumulangana muntu tyoyowona aha mubhwelelo oti Dada kulwekubha Dada winu ne umwi oyo ali mwilunde. ¹⁰ Nolo mutakiza kulangwa bhalanzya kulwekubha mulanzya winu neumwi tuhu nawe ne Krsitu. ¹¹ Alahe oyo alimukulu kuwinu akubha muzyana winu. ¹² Tyoyowona oyo alakikuzya mwenekili alakadohibhwa ne oyo alakidohya mwenekili alakakuzibhwa. ¹³ Alahe nelwinu imwe Bhandisi sihamwi ne Bhafarisayo bhibhelezya kulwekubha mwekubhegekela bhantu bhwami bhwe mwilunde nekubha imwe bhenekili mutekwingilamo, nekandi abhobhekwenda kwingilamo mutekubhaleka bhakingilamo. ¹⁴ (Nelwinu imwe Bhandisi sihamwi ne Bhafarisayo bhibhelezya kulwekubha, kulwekubha mukuzilyanga kaya zye bhafwilwa nekandi mukusalilanga sala ndele kulwekufundikila bhwibhelezya bhwinu, kulweyo mulakanukula mpela nkulu muno") ¹⁵ Nelwinu imwe Bhandisi sihamwi ne Bhafrisayo, bhibhelezya kulwekubha mukupilimangapilimanga munyanza ne mumigala mukukobha kumuhembeka muntu, nekubha olomwamala kumuhembeka mwamugema mwana we Gehanamu nkandagu ibhili kukila imwe bhenekili omwo muli. ¹⁶ Nelwinu imwe bhatongezi bhahofu, abho mukuhayanga oti tyoyowona oyo alilahila kwisalililo gutaliho muhayo, alahe oyo alilahilila zahabu eyo ilimwisalililo akukubha ibhohile mumulahi gwamwe. ¹⁷ Imwe bhahofu ne bhafwela; nesi esyo ne sikulu kukila sindine zahabu nolo isalililo elyo likuyezyanga zahabu? ¹⁸ Nekandi tyoyowona oyo akwilahililanga lutali gutaliho muhayo;alahe oyo akwilahililanga luhambo olwo luliha lutali akubha ibhohile. ¹⁹ Imwe bhafwela ne bhahofu, sikulu ne si luhambo nolo lutali olwo lukulwezyanga luhambo? ²⁰ Kulweyo oyo alilahilila lutali akubha ilahilile nesyona esyo silihalutali. ²¹ Ne oyo alilahilila isalililo akubha ilahilile ne kwoyo akwikalangamo. ²² Nekwoyo akwilahilila ilunde akubha ilahila nehitebhe lye bhwami lye mwa mungu nekwoyo akwikalisyanga ho. ²³ Nelwinu imwe bhandisi sihamwi ne Bhafarisayo bhibhelezya! kulwekubha mwekuliha imwi ye mwikumi ye munana, ne binzari, ne muchicha, alahe mwalekile magambo makulu ge silagilo naye nekulekanwya mu bhwima, ne kubhela bhwla ne kuzumya, eyane yakwendelwa kuigema neyoneindi kuileka yaya. ²⁴ Imwe bhatongezi bhahofu abho mukuswizanga bhufune nekandi mwamila ngamila! ²⁵ Nelwinu imwe Bhandisi sihamwi ne Bhafarisayo bhibhelezya, kulwekubha mukukusanga helu ye sikombe ne helu ye isahani, alahe mukati halibhwokale bhunwyesya ne katunku. ²⁶ Obhe mufarisyo muhofu ukuse mbela mukati ye sikombe ne sahani ngenaho heluyahe hakubha hepe. ²⁷ Nelwinu imwe Bhandisi sihamwi ne Bhafarisayobhibhelezya, kulwekubha mwekwikola ne mavizila ago galibhusigwe nswakala, ago heluyago ne masoga alahe mukati yago galibhwokale magufwa ge bhafu nekila bhuchafu. ²⁸ Kunamuna eyone nimwe helu mwekwigela mulibhasoga mubhutonzi ye bhuantu,alahe mukatiyinu mulibhwokale bhwibhelezya ne bhunantazumya. ²⁹ Nelwinu imwe Bhandisi sihamwi ne Bhafarisayo bhibhelezya kulwekubha mwekugazengula mavizila ge bhahangizi ne kugabhegelezya mavizila gebhatungilizya. ³⁰ Mukubhanga mukuyomba oti olotwenkabheleho munsiku zye bhakulugenzi bhutu tutenkisangizye nabho kusesa magazi ge bhahangizi. ³¹ Kulweyo mwekwikanilizya bhenekili mukubha mulibhana bhabho abho bhalabhihaga bhahangizi. ³² Nemwokalilizye nimwe eyo ngelekelo ye bhakulugenzi bhinu. ³³ Imwe mazoka bhana bhe nzoka kipili mulakailuka tyani mpela ye Gehanamu? ³⁴ Kulweyone mulinge nabhatumilayo kuwinu bhahangizi ne bhebhwenge sihamwi ne bhandisi, bhamwi bhabho mulakabhihaga ne kubhagalazya, ne bhamwi bhabho mulakabhahula mumibhilingilo ginu nekandi mulakabhabhinga kufuma musyalo simwi kuzya musyalo sindi. ³⁵ Nkalikilo yahe galakabhizako magazi gona ge bhatungilizya ago galaseswa hansi kufumilila magazi ge mwa abeli mutungilizya kuhika kumagazi ge mwa Zakaria mwana we mwa Barakia, oyo mulamwihagila hakati ye isalililo ne lutali. ³⁶ Nhanane nekubhabhwila oti magambo agane gona galakasizyako esyane sizyele. ³⁷ Obhe, Yerusalemu, Yerusalemu oyo ukubhihaganga bhahangizi ne ukubhaponda mabhale abho bhakulagizibhwanga kuwako, ne nkandagu zinga kwendanga kubhabhilinga bhanabhako kati omwo nkoko ikukuminganga tuzindo twayo mumananagayo alahe imwe mutalazumya. ³⁸ Nemulinge oko numba yinu mwalekelwe itongo. ³⁹ None nekubhabhwila oti kufumila otine mutalakanibhona mpaka lusiku olwo mulakahaya oti aline lubhango oyo ekwiza mwizina lye mwa Mukama."'