¹ Yesu alayomba nabho kandi kusigemenkezyo alayomba oti. ² Bhwami bhwe mwilunde bhwekwikola ne mwami mulebhe oyo alamubhegezya mwana wamwe bhukombe. ³ Ne alabhalagila bhazyana bhamwe kubhabhonesya abho bhali bhalalikwe habhukombe:alahe bhataliza. ⁴ Mwami alabhalagila bhazyana bhandi alayomba oti "mubhabhwile bhonane abho bhalibhulalikwe oti nahisizye silibhwa nekubha nasikile vinule muno, nekandi magambogona gahikanile mwize habhukombe." ⁵ Alahe abho bhantu bhatalagola bhulalikwa, bhandi bhalazya kumalale gabho, cne bhandi kubhusuluzya bhwabho. ⁶ Abho bhalasagaho bhalabhakwata bhazyana bhamwe bhalabhabhegezya mabhi ne bhandi bhalabhihaga. ⁷ Ngenaho mwami alasyahala muno alalagizya bhasilikale bhamwe ne bhalazya bhalabhayabhazya abho bhihazi nekandi alagwosya muzengo gwabho. ⁸ Ngenaho alabhabhwila bhasese bhamwe oti bhukombe bhwahikile alahe bhalalikwa bhatizile. ⁹ Kulweyo nemuzye kunzila maka mubhalalike bhantu bhinki bhize habhukombe. ¹⁰ bhasese bhalazya kunzila maka ne bhalazya kubhalalika bhantu tyabhobhona abho bhalabhabhona, bhabhine bhasoga ne bhukombe bhulokala bhageni. ¹¹ Alahe mwami aha ingila kubhalinga bhageni alamubhonamo muntu umwi oyo atali ambele mwenda gwe bhukombe. ¹² Mwami alamubhuzya oti munwani wingila kingilile si nemukubha utali ne syambalwa sye bhukombe oyomuntu alahulika sele. ¹³ Ngenaho mwami alabhabhwila bhasese bhamwe, "nemumubhohe oyane muntu magulu sihamwi ne mabhoko nekandi mumutagile helu mulizima,eyo halabhe ne kulila nekusyelezya mino. ¹⁴ Kulwekubha bhalangwa ne bhinki alahe bhalahwa nebhado. ¹⁵ Ngenaho Bhafarisayo bhalavwaho nekandi bhalatolana mukubha bhakumulemya katyani mumihayo yamwe. ¹⁶ Ngenaho bhalabhalagizya bhahemba bhabho sihamwi ne Bhaherode, bhalamubhuzya oti mulanzya twekumanwya mukubha oti obhe ulimutungilizya nekandi ukulanzyanga mihayo ye Mungu mu bhutungilizya, nekandi utakukangangwa ne muntu tyoyowona kulwekubha utakulinganga bhusyo bhwe muntu. ¹⁷ Kulweyo tubhwile wekwiganika twani? angu ilikusoga kutanga kodi mwa kaisali nolo bhwo? ¹⁸ Yesu alagamanwya mabhi ago gali mumizo zyabho, alabhabhwila oti nekusi mwekunigemezya imwe bhibhelezya? ¹⁹ Hani munolekezye eyo mpiya mukutangilanga kodi, bhalamuletela silingi. ²⁰ Yesu alabhabhuzya bhusyo sihamwi nizina elya nelye mwande?c ²¹ Bhalamubhwila ne vyemwa Kaisari, ngenaho Yesu mumuhe Kaisari evyo ne vye mwa Kaisari, vne vye mwa Mungu mumuhe Mungu. ²² Bhalabha bhomvwa namuna eyone bhalakumyamuno nekandi bhalamuleka bhalazya ne lwabho. ²³ Mulusiku olwone Bhafarisayo abho bhakuhayanga oti kuzyoka kwebhafu kutaliho bhalamwegelela ne bhalamubhuzya. ²⁴ Bhalayomba oti mulanzya Musa alayomba oti olo muntu alavulala nekandi atabhusile mwana muduguye amwingile oyone mukima amubhusye mwana kulekubha ne bhuzyele kulwe munduguye. ²⁵ Bhaliho bhadugu bhagosya musamvu bhe muzyele umwi, Wekwandya wekandya alaswela alavulala asyali kubhuta alamulekela muzunaye oyo mukima. ²⁶ Nemuduguye nawe alagema namuna eyone,ne wekasatu ne kuhika bhonane musamvu. ²⁷ Ilabhaho oyomukima nawe alavulala. ²⁸ Mubhuzyoko oyo mukima alakabha wemwande mubhadugu abho musamvu? kulwekubha bhona bhalamuswela. ²⁹ Alahe Yesu alabhitabhila ne alabhabhwila oti mwekubhula kulwekubha mutekusimanya syandikwa nolo bhudula bhwe mungu. ³⁰ Kulwekubha mubhuzyoko bhantu bhatalakaswela nekuswelwa alahe bhalakabha kati bhamalaika bhwe mwilunde. ³¹ kulwe bhuzyoko bhwe bhafu musyali kusoma eyo ilahaibhwa ne Mungu mukuhaya. ³² One ndi Mungu we mwa Ibrahimu, ne Mungu we mwa Isaka, ne Mungu we mwa Yakobo? Mungu atali Mungu we bhafu alahe ne Mungu we bhahanga. ³³ Aha bhantu bhalabhabhimvwa agone bhalakumya muno kulwe malangisyo gamwe. ³⁴ Alahe Bhafarisayo bhalabha bhimvwa mukubha Yesu abhakamazya Bhasadukayo bhalibhilinga halumwi. ³⁵ Ne umwi wabho mumani we silagilo alamubhuzya mukumutega ne alayomba oti. ³⁶ Mulanzya ne silagilo si sikulu muvilagilo?" ³⁷ Yesu alamwitabhila mukubhaya oti umusime Mungu weko kumwizo gwako gwona ne mubhuhanga bhwako bhwona,ne mwikwiganika kwako kwona. ³⁸ Esyane nge silagilo sikulu ne syekwandya. ³⁹ Neyekabhili yekwikola neyone oti umusime muzenganwa wako kati omwo wekwisimila obhe. ⁴⁰ Silagilo syona ne bhahangizi syekusendamila evyane vilagilo vibhili." ⁴¹ Bhafarisayo ahabhali bhasibhilingile sihamwi Yesu alabhabhuzya. ⁴² Alayomba oti Kristu mukumwiganikanga tyani? ne mwana wemwande? bhalamubhwila oti ne mwana we mwa Daudi. ⁴³ Yesu alabhabhwila oti nekusilelo Daudi mumwizo ekumulanga Mukama? mukuhaya. ⁴⁴ Mukama alamubhwila mukamawane wikale mukubhoko kwane kwe bhulyo kuhika ndakabha nabhatula bhikuvi bhako bhabhe mulugele lwako. ⁴⁵ Olo Daudi ekumulanga Kristu Mukama nekatyani akubha mwana wamwe? ⁴⁶ Ataliho oyo alagemeka kumusuvya muhayo nolo kumubhuzya muhayo tyogwo gwona kandi kufuma lusiku olwone.