¹ Ngenaho bhafarisayo sihamwi ne bhandisi kufuma Yerusaremu bhalamwizako Yesu bhalayomba oti, ² "Nekusi bhahemba bhako bhekugakilanwya malagilo ge bhanampala? kulwekubha bhatekukalabha mwikanza lyekulya silibhwa." ³ Ngenaho Yesu alabhitabhila ne alabhabhuzya oti nimwe nekusi mukugakilanwyanga malagilo ge mwa Mungu kulwemalangisyoginu? ⁴ Kulwekubha Mungu alalagila mukuhaya oti umukuzye so ne noko;nekandi tyoyowona oyo alamutuka isye nolo nina ekwendelwa kwihagwa. ⁵ Alahe imwe mukuyombanga oti tyoyowona oyo akumubhwilanga isye nolo nina oti esyonakwendanga kukuha sikwambilizye nasitayalisye kusitanga mwa Mungu,ntakukwambilizya. ⁶ Kunamuna eyone mwasikilanizye silagilo sye mwa Mungu kulwe manukulo ginu. ⁷ Imwe bhibhelezya nesawa kati omwo muhangizi Isaya alahangila kulwinu mukuhaya oti. ⁸ Bhantu abhane bhekunikuzya kumilomo yabho tuhu alahe mizo zyabho zilihale none. ⁹ Bhekunilamya kugele nemalangisyogabho bhekulangisya malangisyo ge malagilo gebhantu."' ¹⁰ Ngenaho alalilanga ibhita lye bhantu ne alabhabhwila oti mudegeleke ne mumanwye. ¹¹ Talieswyo sikumwingilanga muntu mumulomo nge syenkamugemela muntu makwe,alahe esyosikumupunanga mumulomo ngenesyosyenkamugemela muntu makwe." ¹² Ngenaho bhahemba bhamwe bhalamwegelela ne bhalamubhwila oti "wekumanwya mukubha Bhafarisayo ahabhinmwanamuneyone bhalikumpa?" ¹³ Yesu alabhitabhila ne alahaya oti mumelo tyogwogwona ogwo Dada wane we mwilunde atali bhuguhambe gulakadubulwa. ¹⁴ Nemubhaleke bhinene abhone ne bhatongezi bhe bhahofu ne muhofu alamutongela muhofu mwisyamwe bhona bhabhili bhenkagwila mulina." ¹⁵ Petro alamwitabhila Yesu ne alayomba oti tufumbulile esyane sigemenkezyo. ¹⁶ Yesu alabhitabhila ne alayomba oti nimwene musyali kwelelwa? ¹⁷ Mutekumanwya oti tyesyosyona esyo sikwingilanga mumulomo sikuhitanga munda hanuma sikuzyanga kutagwa mumusalani? ¹⁸ Alahe esyo sikupunanga mumulomo sikupunanga mukati ye mwizo ngenesyo sikumuhanga muntu makwe. ¹⁹ Kulwekubha mumwizo gakupunanga miganiko mabhi, bhwihazi bhusihya, bhusohozya, bhwivi, bhukanilizya bhwe bhubhehi, ne matusi. ²⁰ Agane nge gakumuhanga muntu makwe. alahe muntu kulya atakalebhe kutenkamugema muntu kubha ne makwe. ²¹ Ngenaho Yesu alafumayo lwande olwone ne alazya mulwande lwe Tiro ne Sidoni. ²² Ilabhaho aliza mukima muna kanani kufuma lwande olwone. Alahamuka alayomba oti unibhelebhwila mukama mwana we mwa Daudi mwanawane muhalakazi ekwagalazibhwa muno ne misambwa. ²³ Alahe Yesu atalamwitabhila tyesyo syona, bhahemba bhamwe bhaliza bhalamubhwila oti umubhwile afumeho azye ne lwamwe kulwekubha ekutuyogelela." ²⁴ Yesu alabhabhwila oti ntalalagilwa kumuntu tyoyowona alahe kuntama ntagike zye munumba ye Israeli. ²⁵ Alahe alamwizako ne alamusukambila alamubhwila oti mukama unambilizye. ²⁶ Alamwitabhila ne alamubhwila oti italikusoga kusola syekulya syebhana nekusitagila mbwa. ²⁷ Alahe oyo mukima alasuvya alamubhwila oti nenhana mukama alahe netumunda twe mbwa tukulyanga malagalikwa ago gakulagalikanga kufuma kumeza ye bhasugi bhatyo. ²⁸ Ngenaho Yesu alasuvya nekuyomba oti mukima kuzumyakwako ne kukulumuno, ne ibhekuwako kati omwo wekwendela, ne mwanawamwe alasila kufuma mwikanza elyone. ²⁹ Yesu alafumayo ne alazya hihi ne nyanza ye Galilaya, hanuma alagegela mulugulu ne alikalisya eyone. ³⁰ Idale ikulu lye bhantu lilamwizako lilamuletela bhekwibhulula ne bhahofu, vimumu, bhalema ne bhandi bhinki abho bhalibhalwele bhalabhatula mumaguluge mwa Yesu ne alabhasizya. ³¹ Idale lye bhantu lilakumyamuno ahalyabhona vimumu bhabhukizya kuteta,ne bhekwibhulula, ne bhalema, ahabhabhukizya kutumbagila, ne bhahofu bhabhukizya kubhona, bhalamukumilizya Mungu we Israeli. ³² Yesu alabhalanga bhahemba bhamwe ne alayomba oti nabhabhelabhwila abha bhantu kulwekubha bhabhasihamwi none kunsiku isatu nolokulya tyesyosyona bhwo, ntekwenda mbatahye bhatalile bhatiza kunogoleka munzila." ³³ Bhahemba bhamwe bhalamubhwila oti tukubhonahi mikateminki yekubhahika bhalye bhikute bhantubhinki oti neno ne mwikungu nebhantu bhataliyo?" ³⁴ Yesu alabhabhwuzya oti muline mikate inga? bhalayomba musamvu ne tusamaki tudone." ³⁵ Yesu alabhabhwila bhantu bhona kwikalisya hansi magelemagele. ³⁶ Hanuma alaisola eyo mikate sihamwi nezyo nsamaki alazimegagula alabhaha bhahemba bhamwe bhabhagabhulile abho bhantu. ³⁷ Bhantu bhonane bhalalya bhalikuta ne kuvisazya, bhalabhabhavibhilinga vilokala vikapu musamvu. ³⁸ Bhona abho bhalalya bhali bhagosya vihumbi vine kupunwyamo bhakima ne bhana. ³⁹ Hanuma Yesu alabhatahya bhantu bhazye nawe alingila mubhwato alazya mulwande lwe Magadani.