¹ Mwitungo elyone Herode alimvwa mpola zye mwa Yesu. ² Alabhabhwila bhazyana bhamwe oti, "Oyane ne Yohana mubhatizya enkabha azyokile kupuna mubhafu.Otine nguzu ezyane zilihigulya yamwe" ³ Kungoko Herode ali amukwatile Yohana alamubhoha ne kumutagila mwi [gereza] kulwe mwa Herodia,muka Filipo mukuluye. ⁴ Kungoko Yohana alamubhwila oti "Itali kusoga kumusola kubha mukazi wamwe." ⁵ Herode endanga kumwihaga alahe abhobhahanga bhantu kungoko bhamumanianga Yohana mukubha oti ne mufumbuzi. ⁶ Alahe mwitungo lye kuzyalwa kwe mwa Herode lilabha lyahika muhalakazi we mwa Herodia alatuma hakati ye bhantu ne alamusimisya Herode. ⁷ Herode alalahila mukumubhwila oti asabhe tyesyo syona nawe akumuha. ⁸ Alazya kumubhuzya nina oti yayo nasabhe si? nina alamubhwila oti nuzye usabhe mutwe gwe mwa Yohana mubhatizya nawe alayomba oti umpe mutwe gwe mwa Yohana mubhatizya mwolwa lulangahe. ⁹ Mwami alapinihala kulwe kusabhwa mutwe gwe mwa Yohana, alahe kulwe mulahi gwamwe, ne bhantu abho bhabhonekanga nage bhalagwomvwa mulahi gwamwe alapunia hamuli mukubha oti ahebhwe. ¹⁰ Alalagila mukubha Yohana azilweyo mwigeleza. ¹¹ Alabha akatwa mutwe alahebhwa oyo muhalakazi mululangahe nawe alagufila hali nina. ¹² Hanumayahe bhahemba bhamwe bhaliza bhalagusola ogwone mubhili bhalazya kuguzika, hanuma bhalazya kumubhwila Yesu. ¹³ Nawe Yesu alabha omvwa agane alima hampelo alagegela bhwato alazya lwande olyo lutaliyo bhantu. Bhantu bhalabha bhamanwya eyo ali bhalamulondezya lwemagulu kupuna mumuzengo. ¹⁴ Hanuma Yesu alabhizako alabhabhona bhantu bhinki. Alabhabhela bhwila hanuma alabhasizya malwele gabho. ¹⁵ Ilabha yahika kagolo, bhahemba bhamwe bhalamwizako bhalayomba oti, "olwane ne lwande lwihala nizyobha lyaloka,ubhatahye bhahemba bhazye mumizengo bhigulile silibhwa." ¹⁶ Alahe Yesu alabhabhwila oti,"bhatekwendelwa kuzya alahe mubhahe imwene silibhwa." ¹⁷ Bhalamubhwila oti,"ahane tuline mikate itano ne nsamaki ibhili tuhu." ¹⁸ Yesu alayomba oti "hani muvilete aha" ¹⁹ Hanuma Yesu alabhalagila bhantu kwikalisya hansi hamanansi. Alazisola ezyo mikate itano sihamwi ne nsamaki ibhili. Alalangamila higulya, alazifuhula hanuma alabhaha bhahemba bhamwe bhahemba bhamwe nabhe bhalabhagabhulila bhantu. ²⁰ Bhalalya bhonane bhalikuta. Hanuma bhalavibhilinga evyo vilasaga bhalokazya nkapu ikumi ne ibhili. ²¹ Abho bhalalya bhiganikagwa kati vihumbi vitano bhagosya tuhu kupunwyamo bhakima sihamwi ne bhana. ²² Kamwi ne kamwi alabhahatika bhahemba bhamwe bhingile mubhwato, ne mwitungo elyone alabhatahya bhantu bhazye mawabho. ²³ Alabha amala kubhatahya bhantu alagegela mulugulu inene. Mwitungo lye kagolo alabhayo eyone inene. ²⁴ Alahe bhwato bhulabha bhwahika hakati ne nyanza bhulabhukizya kuyubha yubhibhwa ne magonzi kulwekubha muyaga gwasangilizyanga. ²⁵ mubhulindi bhwe nkandagu ye kane Yesu alabhegelela, akutumbagila higulya ye minzi. ²⁶ Mwitungo bhahemba bhamwe aha bhamubhona akutumbagila higulya ye minzi munyanza, bhalobhaha bhalamanwya oti "Ne sizimwa" bhalahamuka ne mpahwe. ²⁷ Yesu alabhabhwila oti " mutakobhaha ngone". ²⁸ Petro alamusuvya mukuyomba, " Mukama olo kabha ngobhe neunzumigizye nize hawako higulya ye minzi. ²⁹ Yesu alayomba oti "newize".Hanuma Petro alatikila mubhwato alabhukizya kutumbagila higulya ye minzi kuzya mwa Yesu. ³⁰ Alahe Petro alabha abhona magonzi alobhaha, alabhukizya kulubhila mukati, alamulanga Yesu alayomba oti Mukama unzubhule!" ³¹ Yesu alagolola kubhoko kwamwe bhwangu bhwangu alamuzubhula Petro, ne alamubhwila oti, Obhe we kuzumya kudo nekusi wali wobhaha? ³² Ngenaho Yesu ne Petro bhalagegela mubhwato, ne muyaga gulatekana. ³³ Bhahemba mubhwato bhalamulamya Yesu nekandi bhalayomba oti, "nhanane obhene uli mwana we Mungu." ³⁴ Bhalabha bhamala kukila, bhalahika munsi ye Genesareti. ³⁵ Nebhantu bhe mwigunguli elyone bhalabha bhamumanwya Yesu, bhalatuma ntumo mulwande lwe mumpelo mpelo, ne bhalabhaleta bhalwele bhonane. ³⁶ Bhalamusabha oti bhabhe bhakukumya halukomelo lwe mwenda gwamwe, ne bhinki abho bhalaumikaho bhalasila.