¹ Nobhoheene nkoghamba kohetera Kristo. Tenkorongohahe, amaiteghero ghane ndorokya igha nhamwende ne Enkoro Ehoreru, ² bhono obhosorombaru ubhwaru no obhooro bhono bhotakohwa monkoro yane. ³ Igha noni umwene nkaighombire kwihimwa nu ukughirwa na Kristo kukughira ya abhahiri bhane, bhano twebhoranibhwa. ⁴ Bho Mbaisraeli. Bhano bhahorwa abhana abho obhohoreru, kobheghambo,ni ituho iyo omwahokanio, ukwitughamera Waryobha, nu ukwiraha. ⁵ Bho mbatangati bhano Kristo yasha kwa sooko kuibhoha emebhere gheno - ono arenge Waryobha wa bhyoonswe. Aghongwe bhokora. Ebhe igho. ⁶ Naho ti igha obhoraghe ubhwa Waryobha mbwatamwa kuhika. Nko bhoora te kera arenge Israeli Mwisraeli semokahe he. ⁷ Tighohe nunyora no orwebhoro urwa Abrahamu igha bhoonswe mbana bhaye. Naho, "nigha nkohetera Isaka orwebhoro rwaho rorebherekerwa." ⁸ Eno erenge ighaa, abhana bhano wibhoye te bha Waryobhahe. Mbaraghirwe komahwa bhare kyo orwebhoro. ⁹ Kobhoora eno yo eng'ana eno yaraghirwe: "Ko nkagha eno, Sara narinyora omona." ¹⁰ Tereno iryenehe, bhoora Rebeka yahaywe enda no omonto wonde, ntata weto Isaka- ¹¹ nigha abhana mbaare bhataraebhorwa ghweki teyarenge arakora eng'ana nshiya nunyora ngogho, okore ritegheero irya Waryobha ku kwahorwa riemeere, ghweki te ko makorohe, nkughira ya oora akobherekera. ¹² Waye, "Omokoro narekoora omoke." ¹³ Kya bhoora yaisa kokonwakonwa: "Yakobo namohanshire, naho Esau namorerereeye." ¹⁴ Bhono nke toraghambe? Mbobhe ko Waryobha? Etare igho. ¹⁵ Kobhoora araghamba ko Musa, "nendabhe ni ikyabhera ko oora ndenonka, ndebha ni ikyabhera ko oora ndyabhera." ¹⁶ Bhono ku riyo, rikughira ya oora akutuna, ghweki tekukughira ya oora akokenya, naho nkughira ya Waryobha, ono ane enokwe. ¹⁷ Kobhoora amakonikoni gharaghamba ko Farao, "Eng'ana eno ni nkuma nerakwimoki, okore nkoroki shinguru shyane, orareke irina ryane ku kyaro kyoonswe." ¹⁸ Bhono, Waryobha nane ikyabhera ko oora amohanshire, no ono ahanshire, nko mokorare mubhisa. ¹⁹ Ghweki norentebhya, "Nkwake nkerora risaryo? Nohe yaisa kokong'a munyanko yaye?" ²⁰ Etare igho, umwiro, nu wewe orahonshokya bhono Waryobha atakutuna? Mbotoroke bhoho ko keno kyabhombwa koghamba ko amabhombi, "Nkwake wankore igho oni?" ²¹ Ku oni omobhombi tana obhotoro kwitoto kobhomba ekento ko meremo ghaye, kurwa kwitoto riyo riyo, ne ekento kyende ko emeremo ighya kera urusiko? ²² Nighake okanyore Waryobha ono yarenge mwango korokya obhohoreru bhwaye no korokya shinguru shyaye shyoonswe, niyabhaye bhoronge kobhoghomerya bhwaye kohekera ebhento bhera bhyatorweho kukusikibhwa? ²³ Nighake nyoore yakore igho kokorokya ubhwaru obhwo obhohoreru bhwaye ko bhento ibhyo obhohanshe, bheno yaare yaserenia kukughirya yo obhohoreru? ²⁴ Nighake nyoore yaakore reno ko bheto, kobhoora yatobherekeye, te kukurwa ko Abhayahudi, naho ghweki nkurwa ko bhanto abhi ibhyaro? ²⁵ Kya igho akoghamba ko Hosea: "Ndebhabherekera abhanto bhane bhano bhatarenge bhane, no omoghonshe waye ono atahanshirwe. ²⁶ Nerebha igha hara yaghambirwe kobho, 'Bhenyu temorenge bhanto bhane he; no omoghonshe waye ono atahanshirwe."' ²⁷ Isaya arakora Israeli, "Hano risabhu irya abhana abha Israeli rekebhaye kyo omosense ughwa munyansha, ekabhaye amasaghyo agha bhano bharesabhorwa. ²⁸ Kobhoora Omokama nareghegha irina ryaye kukyaro, mbongo kobhohoreru. ²⁹ Kya igho Isaya yaghambire, "Nyoore Omokama uwa abhasirikare tiyatutighire ku ikihiko orwebhoro kukughirya yeto, ntokabhaye kya Sodoma, nakokorwa kya Gomora. ³⁰ Bhono nke toraghambe?Igha abhanto abhi bhyaro bhano bhatatunanga eheene, bhanyore eheene ku mighiro. ³¹ Naho Israeli, ono yatunirwe umwahokanio oghwo obhoheene, teyayehekeeyehe. ³² Nkwake etabhaye igho? Nko bhoora tebhatunire imighiro, nko makoro. Mbaitunire bhakaitema kwe ghena, ³³ Nkya bhono yakonirwekonirwe, "Maha,natore reghena iryu ukwituratura ku kyaro kya Sayuni no orotare rono rotana isoro. Oora akwitabherya ko reno taresokahe."