¹ Muhiri wane, amaiteghero ghano ko Waryobha nkukughirya yabho, kukutunguribhwa kwabho. ² Nko bhoora bhakorora ighaa emekere ko Waryobha, tegherenge kokomanyahe. ³ Nko bhoora tebhamanyire obhoheene ubhwa Waryobha, bharatuna bhabhe no obhoheene bhwabho. Tebharenge ne esooko ko obhoheene ubhwa Wryobha. ⁴ Ko bhono uwesooko iyo omwahokanio kughira iya obhoheene ko oora akwitabheerya. ⁵ Kobhoora Musa arakonakona kughira yo obhoheene bhono bhukuhisha no omwahokanio: "Omonto ono akosoka omwahokano nana obhoheene ubhwo mo obhoheene bhono." ⁶ Nawe obhoheene bhono bhukurwa mumughiro bhoraghamba igha, "Otakaighamba monkoro yaho, 'Newe arityana kughya mwisaro?' (Eno nkumwikya Kristo hanse). ⁷ Ghweki otakaghamba, 'Newe arituma mweroma?"' (Eno, nkoreta Kristo kurwa mobhaku). ⁸ Eraghambwa ighake? "Eng'ana nekwesokereye kurwa mumunywa ghwaho, kurwa monkoro yaho. "Iyo ne ng'ana yu umughiro, eno tokorarya. ⁹ Oranyore nko okoghamba kwaho waikerya igha Yesu no Omokama, itabheerya monkoro yaho Waryobha yamoryokiri kurwa mobhaku nareryooka. ¹⁰ Kobhoora enkoro yo omonto tikwitabheerya no ukunyoora eheene okamba uritabheerya nu ukutunguribhwa. ¹¹ Kobhoora rikonwakonwa reraghamba, "Ko oora wonswe ono akumwitabheerya taresokahe." ¹² Kobhoora tekoho Umuyahudi no Umuyunani kwahokana he. Nko bhoora Omokama we Omokama wa bhoonswe, ghweki we umwame ono akobherekerwa na bhoonswe. ¹³ Kobhoora irina ryaye rekobherekerwa na kero omonto Omokama naritunguribhwa. ¹⁴ Nighake oramobherekere oora oraitabheerya? Ni ghake oratore kumwitabheerya ora ataraighwa? Nighake orebhaighwa ataho omotebherya? ¹⁵ Nighake oratore kotebheerya, bhatatomirwe? - Kigho yakonwakonwa, "Nighake bhore ubhuya ubhwa amaghoro gha bhara bhakorarya eng'ana inshiya!" ¹⁶ Naho tebbhoonswe bhaiteghereye ritebheeryo he. Nko bhoora Isaya akoghamba, "Omokama newe yaighure omorareko ghweto?" ¹⁷ Bhono umughiro ghorasha ku kuitegheerwa nu ukwighwa kwe eng'ana ya Kristo. ¹⁸ Naho ndaghamba, "Tebhaighurehe?" Nigho, "Obhoraka bhwabho bhwaisa kurwa kebhara ku kyaro kyoonswe, na amang'ana ghabho ghahika mukihiko iki kyaro." ¹⁹ Ko ghonswe, ndaghamba, "Israeli okayemanya?" Musa araghamba, "Nendebhaha rihari kobhatendera abhanto ti ikyarohe. Kokohetera ikyaro keno ketamanyire, nendebhasighirya kohekera morerre." ²⁰ Isaya mmoghambi mokare araghamba, "Natokeye na bhaara bhatantunire. Nkamahwa na bhano bhatantuna. ²¹ Naho Israeli eraghamba, "Shinsiko shyoonswe naramboye okobhoko kwane ko bhaara bhatakoitabheerya na abho omotwe omokong'u."