¹ Bhono nigha kobhaara bharenge abha Yesu Kristo tebhakokengerwa kina he. ² Kobhoora umughiro ughwe Enkoro iyo obhohoru bhora ubhwa Yesu Kristo bhwankora nabha hare nu umughiro ughwi ibhitimba ibhyu uruku. ³ Kobhoora keera umwahokanio ghwahishire nkokorwa kere kukughira yo obhorosu ubhwa omobhere, Waryobha yakore igho. Akamotoma Omona waye umumwemwe kobha ekerengyo kyo omobhere ughwi ibhitimba, akabha ituho yi ibhitimba, akakengera ikitimba ko omobhere. ⁴ Yakore igho okore umwahokanio ghuhikibhwi mo bheto, bhano totakakora agho omobhere, naho kosorana amang'ana aghe Enkoro. ⁵ Bhara bhakosorana omobhere nkwiteghera bhare amang'ana agho omobhere, nawe bhara bhakwiteghera aghe Enkoro bhaiteghera aghe Enkoro. ⁶ Kobhoora obhohanshe obhwo omobhere nu ruku, obhohanshe obhwe Enkoro no obhohoru no omorembe. ⁷ Eno nkughirya yo obhohanshe ubhwo omobhere mbubhisa ko Waryobha, kobhoora tebhokosooka omwahokanio ughwa Waryobha, nunyora tebhotore kosokahe. ⁸ Abhasorani abho omobhere tebhakotora kushomerya Waryobha. ⁹ Nunyora nigho, temoho komobherehe, nko Nkoro, nyore maheene Enkoro ya Waryobha nebhaikaye ko bhenyu. Naho nyore omonto atana Enkoro ya Kristo tewayehe. ¹⁰ Nyore mona Kristo, omobhere ghwakwako mang'ana aghi ibhitimba, nawe enkoro ne horu ko mang'ana aghe eheene. ¹¹ Nyore Enkoro ya ora yaryokiri Yesu narenge mobhenyu, uyo uyo yaryokiri Kristo kurwa mobhaku narahane emebhere ghyenyu ighyu uruku obhohoru ko nshera ye Enkoro yae, ono abhaikareye. ¹² Bhono nigha, bhahiri bhane,bheto ntona isire, nawe tekomobherehe igha tomenye kughirya yo omobhere ¹³ Nko bhoora nyore mwikaye kughirya yo omobhere, hang'e more mukwe, naho nyore nkughira ye Enkoro muriteghera tokokora, na bhenyu morebhaho. ¹⁴ Mboora abharu mokotangatwa ne Enkoro ya Waryobha, bhano na bhana abha Waryobha. ¹⁵ Kobhoora temwanyore enkoro iyo obhoghorwa no okobhoha.Kuigho, mwanyore enkoro yo okokorwa mobhe abhebhorwa eno tokokoora, "Abba, Tata!" ¹⁶ Enkoro umwene kotomanyare she nkoro shyeto igha nabhana abha Waryobha tore. ¹⁷ Nyore nabhana tore, ntorenge bhaghabhi abha Waryobha. Na bheto mbaghabhi hamwe ko Kristo, maheene nkunyanka tore nawe okore toghongwe hamwe nawe. ¹⁸ Nkobhoora nkobhara inyanyi iye enkagha eno igha tekentohe koreng'ania no obhohoreru bhono turiorokibhwa. ¹⁹ Ko bhono ebhetango bhyoonswe mbiteng'eye bhokong'u ko bhana abha Waryobha. ²⁰ Nko bhoora obhobhombi bhonswe mbwarongehibhwi mobhosoku, te kwa kutuna kwaye he kobhoora umwene yabhetoreho. Nko amaiteng'ero ghaye ²¹ igha obhobhombi bhoonswe mboretorwa mubhwibhahi ghweki kurusibhwa mobhoghorwa ubhwo obhosaryo, no okotorwa mu ubhwibhahi ubhwa obhohoreru ubhwa abhana abha Waryobha. ²² Kobhoora ntomanyire igha obhobhombi bhoonswe nkorora bhore nu ukunyanka. ²³ Ti kya bhuyo he, nunyora mbeto abhene bhano tukumwensera Enkoro - na bheto nkoroora tore , eno toraghanya kobherekerwa abhana, igha tutunguribhwi. ²⁴ Nko bhoora twaiteng'eye kutunguribhwa nawe keno kyaiteng'erwanga. Nawe ekento kiyo nawe ono akwiteng'era kokerora? ²⁵ Bhono ntwaiteng'eye ekento keno ketakororwa, nkokeghanyerya tore kwa kabha. ²⁶ Kukughirya iyo iyo, Enkoro wonswe nkototoryare ko obhobhabhayeru bhweto. Kobhoora totamanyire kosasama bhoora ikutunwa, naho Enkoro nkotosasamerare ko obhoghondobheru bhono bhotakoghambwa. ²⁷ Ghweki koreng'ana no obhohanshe bhwa Waryobha, Enkoro nkotosabherare bhano twamwitabherya. ²⁸ Bheto bhonswe ntomanyire igha ko bhoonswe bhano bhahanshire Waryobha, umwene nkobhakorare amaiya ko obhoronge bhwaye. ²⁹ Kobhoora bhamanyire kurwa semoka ne ekerengere ikyo Omona waye, umumwemwe uwa mobhahiri abhaaru. ³⁰ Kobhoora bhahoywe kurwa semoka, mbabhabherekeye bhoonswe. Na bhaara bhabherekeywe mbabhareywe eheene. Ghweki bhaara mbabhareywe obhoheene ekabhaghonga. ³¹ Nke toraghambe ko amang'ana ghano? Waryobha no orobhareka rweto are, newe arenge ighoro yeto? ³² Ono yatighire Omona waye nu ukumurusya kughirya yeto niyake atighe hano kerenge ekento hamwe nawe? ³³ Nawe areshongera abhahorwa bha Waryobha? Waryobha we omobhari wo obhoheene. ³⁴ Nawe arebhakengera ikina kyo ubhushibhu? Kristo Yesu we yakure kukughirya yeto, ghweki ko maaru bhokong'u uwe yaryokibhwi. Nawe nkotonga are hamwe na Waryobha ahase ahesooko, ghweki nkotosasamerare. ³⁵ Newe aretwahokania no obhoghonshe ubhwa Kristo? Inyanyi, hamwe etabhu, kasi inyanko, inshara, kasi ekeng'abhi, ekebhe kasi risabha? ³⁶ Kya bhono ryakonwakonwa, "Ku ubhwera bhwaho toraitwa omobhaso tubhi. Ntwabharwe kya amang'ondi aghu kushinshwa." ³⁷ Ko ghayo ghoonswe bheto mbahishi tore ko oora yatohanshire. ³⁸ Kobhoora naisa kushamibhwa igha nunyora nduku, hamwe obhohoru, nunyora no omoraghe, nunyora mbhwibhahi, nyore ebhento bheno bheho, nunyora bheno bhirisha, hamwe shinguru, ³⁹ nunyora ni ibhighoro, hamwe ibhya hanse, nunyora nketango kyokyonswe, tekeretora kotwahokania no obhoghonshe ubhwa Waryobha, ono arenge Omokama weto Yesu Kristo.