¹ Mosereni kero oora ano obhorosu ku mighiro, motakamokenga amaiteghero ghaye he. ² Kero omonto ano umughiro ogho korya kere ekento, no omosoherwa nkoryare shinyenyi ishyene. ³ Omonto ono akorya kera ekento atakasera oora atana ekento. Nunyora oora atakorya kento atakasera uwonde. Kobhoora yaisa kogheghwa na Waryobha. ⁴ Uwe nke ore ono okosera oora okokengera ikina oora ano obhobhahe abho omonto wonde? Mmobhoronge bhwa Omokama waye okwemeera atighe koghwa. Nawe nareghoroka, kobhoora Omokama naretora komoghorokya. ⁵ Omonto uwomwe arakumya urusiko oromwe kokera shinsharu. Uwonde arakumya shinsiko bhoreng'ane. Tigha kero omonto abhe na amaitegheero ghaye. ⁶ Ko oora akoghota urusiko, nkoghotare kughirya yo Omokama. No oora akorya, kughirya yo Omokama, ko bhono akukumya Waryobha ono atakorya arerebhera korya kughirya yo Omokama. Wonswe nkunyorare umukumo kurwa ko Waryobha. ⁷ Kobhoora taho ono aikaye umwene he, ghweki taho ono aho kughirya yu umwene. ⁸ Kobhoora nyore hotore ntoho kughirya yo Omokama. Hano tukukwa, no Omokama tukukweera. Bhono nyore ntwikaye hamwe torakwa na abho Omokama tore. ⁹ Kukughirya iyo Kristo yakure ghweki akaryoka, akabho Omokama uwa abhaku na abhahoru. ¹⁰ Bhono nke, kikughira orakengera ikina umuhiri waho? Nkwake okomosera? Kobhoora ntwimereye mobhoronge obhe ikitumbe ikyo okokenga ikina ikya Waryobha. ¹¹ Ko bhono yakonwakonwa, "Kya igho nikaye," No Omokama akoghamba, "Nindihighamerwa, kero ororeme ndurinkumya ku Waryobha." ¹² Bhono, kero omwe weto narebharwa ekerengere kyaye umwene ko Waryobha. ¹³ Bhono, totaghenderya kokengerana, nigha irusya igha taho ono aretora maitumanto ko wamwabho. ¹⁴ Nemanyire ndesegha ko Omokama Yesu,igha tekeho ekento keno kikwisarya ikyenehe. Nu umwene ono akwisehera igha kera ekento nkebhe. ¹⁵ Nyore umuhiri waho nkwihumyare kughira iyi bhyakorya tokoghenda no obhohanshe he, otakasaarya umuhiri kughirya yi ikyakorya kyo omonto ono yakwa kughirya ya Kristo akakwa. ¹⁶ Bhono motakaikerya amakoro ghenyu amaiya ghakore abhanto bhabhasere. ¹⁷ Kobhoora obhokama ubhwa Waryobha ti kughirya yi ibhyakorya nu ukunywa, nkughira yo omorembe, eheene, nu ubhushomerwa ko Enkoro Ehoreru. ¹⁸ Ko oora akwiteng'era Kristo ku bhuyo nkwitabheeryare Waryobha ghweki yaikeribhwa na abhanto. ¹⁹ Bhono nigha, tughi no omorembe na amang'ana agho okotorya omonto wonde. ²⁰ Otakasarya emeremo ighya Waryobha kukughirya yi ibhyakorya. Ebhento bhyonswe ko obhoheene mberabhu, naho mbeghogho ko omonto ono akorya nu ukwituratura. ²¹ Mbuya inyama etakarebhwa, nunyora nkunywa korya kyokyonswe keera kekorerya abhahiri bharituratura. ²² Imighiro gheno onaghyo, ghebhe kuuwe umwene na Waryobha. Yaitabheribhwa oora atakwikengera ikina umwene ko keera akwikerya. ²³ Ono ana amaitumanto yakengerwa ikina oranyore ararya, kobhoora teghakurwa mumughiro. Ko keera ketakurwa mumighiro nkitimba.