¹ Kera enkoro ebhe ne esoko ko abhanene no kobhotonge ubhwi ighoro, ko bhora obhotonge bhoonswe bhorarwa ko Waryobha. Ghweki shentonge shonswe nshetorwe (na) Waryobha. ² Ku igho ono akokora obhotonge ne ehamo iya Waryobha akwanga;nabhara bhakwanga mbarekengerwa ikina abhene. ³ Kokobha abhatongi te keroghoryo kobhara bhakokora amaiya,naho nkobhara bhakokora amasaryo. Bhono nkwighombore ukwanga kobhoha obhotonge? Kora amaiya norerabhibhwa ko ghayo. ⁴ Ko okobha kera omokori uwe emeremo uwa Waryobha ku uwe ku kukughirya iya amaiya.Nahano orakore amaghogho, yobhoha; ko kobha togheghe risabha ng'ana etaho.Kobhora no omokori we emeremo uwa Waryobha,omohaki uwe ikisiyomba. ⁵ Ku igho mukumo osoke,te kukughirya yo obhoro nu kukughirya iya amaihitiryo. ⁶ Ku kughirya eno morarusi righoti. Kobhora abhatongi mbhakori abhe emeremo ghya Waryobha, bhano bhakoghenderya kokora ring'ana reno. ⁷ Momohaka kera omwe keno akutuna ahakwe isire: righoti nko ora yisire kohaka; ubhushibhu nko ora yaisire kobhohaka;ehaho nko ora akohaha; esoko nko ora akumughyako aisire esoko. ⁸ Motakasabhwa isire no omonto wowonswe ,mohanshane bhenyu ko bhenyu abhene. Kokobha ora akohansha nyarobheri waye arahikya omwahokanyo. ⁹ Nko okobha, "Toresoherahe, turitahe, turibhahe, turighombahe,"nyore eho ehamo yende yonswe,niyorokibhwi korokara rono: "Omohanshe nyarobheri waho kigho wihanshire umwene." ¹⁰ Obhohanshe bhoranyahara nyarobheri uwo omonto. Kigho, obhoghonshe no ubhuhiku obhwo umwahokanyo. ¹¹ Ku kukughirya iya reno momanyire enkagha,igha abhaye ne enkagha yu ukurwa moshentero. Ko okobha ubhutunguribhwa bhweto bhwahikire kotamboka enkagha era twaiteng'eranga. ¹² Ubhutiko bhogheye, no omobhaso nhang'e ghore totore mbareka amakoro aghi ikisunte,twibhohe ebhyoghe ibhyo obhorabhu. ¹³ Tobhe abhahene kya mobhorabhu, te ko obhushomerwa obho ubhorebhi hamwe obhosarya. Otakaikara mubhwighombhi bhono bhotakotorwa korebherwa, (na) temobhisiyomba narihari. ¹⁴ Nigha twibhohe Omonene Yesu Kristo, totakatigha obhoghogho bhotosohere,no ukwighomba.