¹ Bhono ndabhasasama, bhahiri bhane,ku kyabhera kya Waryobha, mwirusi mobhe ituho enhoru, ne ehoreru, eno ikwitabheribhwa na Waryobha. Reno ni isabho ryenyu iryu umukumo. ² Ghweki motatubhania aghi kyaro keno,musyoribhwi mobhe bhahya. Mobhe igho momanye obhohanshe ubhwa Waryobha obhwe enokwe, igha kero uwomwe wenyu. ³ Kobhoora nkoghamba, kughirya ye enokwe eno nahabhwa, igha kera omwe wenyu aitegheere kwa sooko, kya bhoora Waryobha yahora kero omonto ekerengere ikyo omorembe. ⁴ Kobhoora omobhere ghweto ngona amaghasho maaru, nkera igheshono omoremo ghwako. ⁵ Nigho igho kubhwaru bhweto torenge mobhere ghomwe ku Kristo, ghweki kera righesho kumurikyaye. ⁶ Kero omonto na rirughuto ryaye koreng'ana ne enokwe eno mwahanwa. Nyore rirughuto iryo omonto no obhoroti, akore koreng'ana nu umughiro ghwaye. ⁷ Oranyore irughuto iyo omonto no okotorya akore bho, uwonde irughuto iyo omonto ni iyu kweghya aeghi. ⁸ Oranyore rirughuto iryo omonto no okohonia ahoninga. Oranyore rirughuto iryo omonto nu ukurusya arusi, kwa koserenia. Nyore rirughuto iryo omonto no okotangata arekore bhuya, nyore rirughuto iryo omonto ni ikyabhera akekore kwa bhosambaroku. ⁹ Obhohanshe bhotakabha ubho iniko. Morererre obhobhe; motorani ko maiya. ¹⁰ Abhahiri bhane mohanshane, ko sooko mosokane. ¹¹ Komekere, motakabha bharosu, Ko nkoro, mobhe ne kabha. Ko Omokama, mumwitughamere. ¹² Mobhe nu ubhushomerwa obho obhokare koghanya shinsiko sheno shikusha. Mobhe no obhoghomerya mu nyanko yenyu. Mosasamenga. ¹³ Motarani abhaitabheerya ko kera mukutuna. Moroki kigho mohanshaini. ¹⁴ Mobhasabhere enokwe bhaara bhakobhanyankya; mobhanonke motakabhihima. ¹⁵ Moshomerane bhonswe,mokorane. ¹⁶ Mobhe na amaiteghero ghamwe. Motakabha na amaihemo ghweki mwikeri abhanto abho obhotoro obhoke. Motakabha ne esooko ko amaiteghero ghenyu. ¹⁷ Motakahakya omonto wowonswe obhobhe. Mokore amaiya ko bhanto. ¹⁸ Ebhe bho, kigho ekobhabhera bhenyu mobhe no omorembe ko bhanto bhonswe. ¹⁹ Bhaghonshe, motakahakania shisire, mbobhe ko Waryobha. Kobhoora yakonwakonwa, "ikisiyomba nkyane; Noni ndekehaka,' Omokama newe akoghamba." ²⁰ "Naho nyore umubhisa waho ana inshara,moragheri. Ani inyonta, munywensi. Kobhoora orakore igho noramotore amakara agho omorro ko motwe ghwaye." ²¹ Otakatamwa no obhobhe, nigha ubhuhishe obhobhe kwa bhuya.