¹ Yesu akaemoka akarwa entahana iyo kughya korong'ongo urwa Uyahudi (na) humbhu yi ikyoro ikya Yordani,honswe abhanto bhakamosorana. Akabheghya ghweki, kya hara yarenge orosera rwaye kokora igho. ² Mafarisayo bhakasha no okosakya komobhorya igha, "Mbuya ghare omoteti kutighana (na) mokaye?" ³ Yesu akabhahonshokerya igha, "Musa nke yabhatebhya?" ⁴ Bhakaghamba, "Musa yaitabhereyi okokonakona ritashandighi iryo ukwahokanya no okobhorana omokari no umushasha." ⁵ No ukughira enkoro yenyu enkong'u nkyo kyaghire bhakakonakona ritashandighi irye emboreri iyo," Yesu akabhatebhya. ⁶ "Naho kurwa ikyaro kebhombhwe, Waryobha yabhombire umushasha no omokari.' ⁷ Ku igho umushasha aratigha abhaibhori bhaye arabha hamwe (na) mokaye, ⁸ kubhubhere bhwabho bharabha mobhere ghomwe; tebhakobha bhabherehe, nkobhabhare mobhere ghomwe. ⁹ Ku igho keno keghoteni (na) Waryobha, omona wo omonto tokakyahokanyahe." ¹⁰ Hano bharenge mwighutu, abhanabhegha bhaye bhakamobhorya ghweki ko reno. ¹¹ Akabhatebhya, "Ono wonswe ono arebhora mokaye nookoteta uwonde, uyo mmutwari. ¹² Omokari wonswe aratighe moghaka waye atetwe ahande uyo mmosorare." ¹³ Ghweki bhakamoretera abhana bhabho abhake okoreke abhakuni, abhegha bhaye bhakabhakanya. ¹⁴ Hano Yesu yighure riyo akarera no okobhatebhya, "Mobhaitabheri abhana abhake bhashe ku oni, motakabharebhera, kobhora obhokama bhwa Waryobha no ubhwabho. ¹⁵ Obhohene nkobhatebhyande, ono amanyire obhokama ubhwa Waryobha kyo omona omoke mbohene toresoha mobhakama bhwa Waryobha. ¹⁶ Akamara akabhaghegha abhana akabhahaghata no okobhanonka. ¹⁷ Hano yasimiri oroghendo rwaye omonto omwe akamokenyera akamuhighamera, akamobhorya, "Omwegha omohene, nkoreke okore nyore bhohoru bhokora no obhokora?" ¹⁸ Yesu akaghamba, "Nke kighire omberekeye omohene? Omohene tahohe, Waryobha umwene we omohene. ¹⁹ Omanyire imyahokanyo: 'Otakaita, otakasohera, otakaibha, otakahamerya omonto obhorongo, otakang'aina, soka suwenyu (na) mayo wenyu'." ²⁰ Omonto ora akaghamba, "Umweghya, ghano ghonswe naghasoka kurwa nkerenge mumura." ²¹ Yesu akamomahera no okomohansha. Akaghamba, "Orasoherwa kento kemwe. Mukumo oghori bheno onabhyo otwenere abhataka, okoreke unyore emongo iya kwisaro. Omanye kuntuna." ²² Naho akatuna kukwa enkoro ko amang'ana ghano; akarusyaho riyo abha asorombaye akaghya bhwaye asorombaye, kobhora yarenge ne ebhento ibhyaru. ²³ Yesu akamahamaha ntahana shyonswe akatebhya abhanabhegha bhaye, "Mbokong'uke kerengereke ku umwame kosoha ko obhokama ubhwa Waryobha! ²⁴ Abhanabhegha bhakaroghoribhwa (na) amang'ana ghano. Nawe Yesu akabhatebhya ghweki, "Abhana nkekong'u kerengereke kosoha mobhokoma ubhwa Waryobha! ²⁵ Mbunyohu engamia koheta mwibhanga erinsindani, kokera umwame kosoha mo obhokama bhwa Waryobha." ²⁶ Bhakatong'ara bhokong'u bhakashamerana, "Ku igho nawe ariryokibhwa" ²⁷ Yesu akabhamahera akaghamba, "Ko omona wu mwiro tekeho keno kekotorekanahe,te ko Waryobhahe. Kobhora ko Waryobha ghonswe nkobhaghare." ²⁸ Petro akasimya kushumansha nawe, "Maha twatigha bhyoonswe tokakosorana." ²⁹ Yesuakaghamba, "No obhohene nkobhatebhya, taho ono yatighire righutu, hamwe mura wabho, hamwe musubhati wabho, hamwe mayo wabho, hamwe suwabho, hamwe abhana, hamwe rirobha, kukughirya yane, no kukughirya ye eng'ana, ³⁰ omosabhi tarinyora kotamboka righana bhokong'u kokera enkagha iya bhono igha: righutu, mura wabho,musubhati, mayo, abhana, ne rirobha, ko hamwe (ni) nyanko ne shinsiko ishya mbere, obhohoru ubhwa bhokora no bhokora. ³¹ Naabharu bhano bhatangatire mbarebha abha ikihiko (na) abha ikihiko mbaretangata." ³² Hano bharenge konshera, kughya Yerusalemu, Yesu yarenge abhakangatire. Abhanabhegha bhakaroghora, (na) bhara bhabhasorananga ikihiko kyabho mbobhohire. Nho Yesu yabhaheniri bhara ikomi nabhabhere akasimya kobhatebhya keno keremunyore bhongo hano: ³³ "Rora toraghya tuhike Yerusalemu, no omona uwa Adamu arihikibhwa ko abhaimereri abhanene(na) abhakonikoni, bharemohokomera kukwa no okomotora ko abhanto abhakebhara. ³⁴ Mbarimwanga, mbarimutwera amate,mbaremotema shinyimbo nu ukumwita. Nawe kushinsiko isato nareryoka." ³⁵ Yakobo (na) Yohana, abhana bha Zebedayo, bhakamushako no okoghamba, "Umweghya, toratuna otokore kera tokosabha." ³⁶ Akabhatebhya, "Nke mukutuna mbakore?" ³⁷ Bhakaghamba, "Twitabheri twikare(na) uwe mobhohoreru bhwaho, omwe mwobhoryo bhwaho uwonde bhomosi bhwaho." ³⁸ Naho Yesu akabhahonshora igha, "Temomanyire keno mokosabha. Moratora kukinywera ekekombe keno ndinywera hamwe okoghomerya isubho yane eno ndisubhwa?" ³⁹ Bhakamotebhya, "Toratora" Yesu akabhatebhya, "Ekekombe keno ndinywera, murikinywera. Niisubho eno ndesobherwa, moreyeghomerya. ⁴⁰ Nawe ono arikara bhoryo hamwe bhomosi bhwane toni ndimurusyahe, naho nkobhara bhano bhahorwa." ⁴¹ Abhegha ikomi bhara hano bhaighure ghayo bhakasimya korera bhokong'u Yakobo (na) Yohana. ⁴² Yesu akabhabherekera no okoghamba, " Momanyire bhara bhakuitegherwa bhayo mbaregheghwa bhabhe abhanene abha abhanto abhi ibhyaro, bharetonga abhanene no okobha (na) obhotonge kobho." ⁴³ Naho tekotonerwa kobha igho he. Wowonswe ono arebha motangati mukumo abhe omoghorwa wenyu. ⁴⁴ Wowonswe ora arebhatangata mukumo abhe omoghorwa wenyu bhoonswe. ⁴⁵ Kobhora Omona uwa Adamu tiyaishire kokorwahe yaishire kokora. Nu ukurusya obhohoru bhwaye ko bharu." ⁴⁶ Bhakasha Yeriko. Hano yarwanga Yeriko (na) abhana bhegha bhaye (na) rikomo rinene irya abhanto, omona uwa Tmayo, Batimayo, umuhukuru ono yasabhanga, yaikae momokora ughwa ribharabhara. ⁴⁷ Hano yaighure igha Yesu Mnazareti, akasimya kokonga no okoghamba igha, " Yesu Omona uwa Daudi nyabhera!" ⁴⁸ Abharu mbakiri umuhukuru ora bharamotebhya kira. Nawe yakongire ko obhoraka obhonnene, "Omona uwa Daudi, nyabhera!" ⁴⁹ Yesu yaimereye akabhatebhya abherekerwe. Bhakamobherekera umuhukuru ora, bharaghamba, 'Kabhe omohangaru! Emoka! Yesu arakobherekera." ⁵⁰ Akarekera mbareka isumati yaye, akabhuruka ighoro, akaghya ko Yesu. ⁵¹ Yesu akamohonshora no okoghamba, "Nke ukutuna nkokore?" Umushasha umuhukuru ora akaghamba, "Umweghya, ndatuna ndore." ⁵² Yesu akamotebhya, "Kaghi. Umughiro ghwaho ghukuhweniri."Hayo hayo amaiso ghaye kamwe igho ghakaramokya no okomaha; (na) akamosorana Yesu konshera.