¹ Akabhatebhya, " Mwitabherii mbatebhi, kobhenyu bhaho bhano bhatariosha uruku,kohokera obhokama bhwa Waryobha hano bhurisha kwanguru." ² Shinsiko isansabha hano shahetire, Yesu akaghegha Petro, Yakobo (na) Yohana bhakaghya kokekereghe, abhene, ghweki akaigharanshora mobhoronge bhwabho. ³ Imyenda ghaye ghekamekameka bhokong'u ghekarabhera kokera ighyo omonto wowonswe ku kyaro keno. ⁴ Nho Eliya hamwe (na) Musa bhakarwera mobhoronge bhwabho, bhashumanshanga (na) Yesu. ⁵ Petro akahonshora igha, 'Omoragherya, mbuya bheto tobhe hano, tohaghashe ibhighutu bhitato, ikemwe kebhe ikyaho, ikemwe kebhe ikya Musa ni kyende kebhe ikya Eliya." ⁶ (Kobhora tiyare naryakoghambahe, mbobhohire bhokong'u.) ⁷ Risaro rekasha rekabhakundikirya. Obhoraka bhokarwa mwisaro mora, "Ono no omona wane omoghonshe. Mumwiteghere." ⁸ Hayo hayo, hano bhamaghiremaghire, tebharoshe omonto uyowonswe bhanawe hamwehe, bhakatambera Yesu umwene. ⁹ Hano bhikanga kurwa mokekereghe, akabhakomerya bhatakatebhya omonto koghara bharoshe, hamwe Omona uwa Adamu hano ariryoka kurwa mobhaku. ¹⁰ Kuigho eng'ana iyo mbayekoreye monkoro yabho. Ghweki mbashumanshire abhene ko bhene eng'ana eno ekorokya "Okorokya kurwa mobhaku" ¹¹ Bhakabhorya Yesu, "nkwake abhakonikoni bhaghamba Eliya atangate kusha?" ¹² Akabhatebhya, "Eliya aretangata kusha koreta amang'ana ghonswe. Nkwake yakonirwe igha Omona uwa Adamu anyore inyanko enene no okoreghwa? ¹³ Naho ndabhatebhya igha Eliya nyishire, bhakamokora kera bhatunanga, kigho yakonirwe." ¹⁴ Hano bhahikire kobhanabhegha, bhakamaha abhanto abharu bhabhanari (na) abhakonikoni bharahangana nabho. ¹⁵ Hano bhagheye korora Yesu abhanto bhoonswe bhakamokenyera komokerya. ¹⁶ Akabhorya abhegha bhaye, "Nke mokohanganera nabho?" ¹⁷ Omonto uwomwe mobharu bhara akamohonshokerya, "Umweghya, ndetire omona wane kuuwe;anaekehwe keno kyamokora yabha rimumu, ¹⁸ hano kyemoka keramughwesya hanse rihuro mumunywa no okotakunya amaino bhokong'u hano kimokire.Nasabha abhanabhegha bhaho kumurusya ekehwe kiyo, naho bhatamwa. ¹⁹ Akabhahonshokerya, "Reno nekora reno ritakwitabherya, ninikara nabhenyu kohekerahe? Mbhaghomeri iyake?momorete kuoni." ²⁰ Bhakamoreta omona wikimura uyo. Hano ekehwe kyagheye korora Yesu, kekamoretera omona ora ikirighito. Omona uyo yaghoye hanse akarusya rihuro iryaruu mumunywa. ²¹ Yesu akabhorya suwabho, "Yabhaigho kwi bhaghake?" Suwabho akaghamba, "Kurwa mubhwana. ²² Enkagha yende nkumughwesya kere momoro hamwe momanshe, nookosakya kumusikya. Nyore ono obhotoro bhobhonswe bhora otwabhere ototori." ²³ Yesu akamotebhya, "Nyore urikerya? Kera ekento nkokorekana kere koora akwitabherya." ²⁴ Hayo hayo suwabho akongora ekero no okoghamba, "Nitabhereyi! Ntorya kukwanga kwitabherya kwane." ²⁵ Enkagha eno Yesu yaroshe abhantoabharu bharamokenyera, akahamera ekehwe kiyo araghamba, "Uwe ekehwe ikimumu ne ikiribhu ikya amatwe, ndakohamera umurweko, otakamukyora ghweki." ²⁶ Kekakura nu ukumunyankya omona uwiikimura uyo kekemara kekamurwako. Umumuruyo akabha kyaono akure, abhanto abharu bhakaghamba igha, "Akure,' ²⁷ Naho Yesu yamoghotire okobhoko akamwimokya, no omona akemera. ²⁸ Enka eno Yesu yasohire mwighutu, abhana bhegha bhaye bhakamobhorya kukumushamera, "Nkwake bheto totatore kurusya ekehwe kiyo?" ²⁹ Akabhatebya, "ko temo eno tikikumurwakohe nkohekera amasabho aghene." ³⁰ Bhakarwa hara kohetera Galilaya.Temonto wowonswe yamanyire hano bharenghe, ³¹ ko bhora yeghyanga abhana bhegha bhaye. Akabhatebhya, 'Omona uwa Adamu narahanerwe mobhanto, ghweki mbarimwita. Hano arikwa shinsiko isatohano sherehwa araryoka ghweki." ³² Naho tebhamanyereyihe, bhakobhoha komobhorya. ³³ Bhakahika Karperinaumu. Hano bhasohire mwighutu ryabho akabhabhorya, "Nke mware kushumanshera konshera"? ³⁴ Bhakakira kiri. Kobhora bhahangananga konshera igha nawe omonene bhokong'u. ³⁵ Hano yaikaye hanse akabhabherekera hamwe ikomi nabhabhere, akaghamba nabho, 'Ono wowonswe akutuna kotanga, nkehameryo abhe umusiti no omokori we emeremo gya bhoonswe. ³⁶ Akaghegha omona omoke akamotora mwighari. Akamoghegha komohaghata, akabhatebya, ³⁷ "Ono wonswe akoghegha omona kyaono kurina ryane, nangeghire naoni, no ukunyora omonto anyitabhereyi takobha anyitabhereyi umwenehe nkunyorore naora yantoma." ³⁸ Yohana akabhatebhya, "umweghya twamaha omonto ararusya ekehwe kurina ryaho tokamokanya, kobhora titukumwitabheryahe." ³⁹ Nho Yesu yaghambire, "Motakamokanya, kobhora ono arekora emeremo emenene kohetera irina ryane amare aghambe eng'ana yoyonswe engogho kuwoni. ⁴⁰ Ko ora atana kebhesere (na) bheto nko bheto are. ⁴¹ Ono wowonswe arekohana ekekombe ikya amanshe aghukunywa kurina ryane uwe omohoreru ku Kristo, mbohene nkobhatebhya, tarebhora umukumohe. ⁴² Ono arebhasirya uwomwe ko abhake oni ukwitema, ekabhaye bhuya abhoherwe reghena mwighoti arekerwe munyansha. ⁴³ Hano okobhoko kwaho korakusiri kobhotore. Mbuya kughya ko obhohoru otana okobhoko kokera kosoha mobhohoru ona amabhoko ghonswe. Komoro "ghono ghotakurima". ⁴⁴ ("Ahase hano shinyende shetakukwa no omoro ghono ghotakurima ."te ghwa amakyoro gha karehe). ⁴⁵ Hano okoghoro kwaho korakotei, kobhotore. Mbuya kuuwe osohe mobhohoru ona okoghoro komwe, kokera okorekerwa nu ukukwa munyanko (na) amaghoro ghonswe. ⁴⁶ (Ahase hano shinyende shetakukwa no omoro ghotakurima). ⁴⁷ Hano iriso ryaho rerakoteyi rirusimo. Mbuya ku uwe kughya Mobhokama ubhwa Waryobha ona eketong'o, kokera kobha (na) amaiso ghonswe no okotabhutwa ko hase ahaghogho bhokong'u. ⁴⁸ Ahase hano shinyende shetakukwa no omoro ghotakurima. ⁴⁹ Ko bhora kera omonto narerongwa omonyo ughwa omoro. ⁵⁰ Omonyo mmuya,nawe hano ghwaruha mukinyero nkosarya ghore, niyake oraghokore ghobhe omonyo umuya? Mobhe omonyo bhenyu ko bhenyu, ghweki mobhe no omorembe ko kera omonto."