¹ Bhono hano bhahikanga Yerusalemu, hang'e kuhika Besthfage (na) Bethania, kokekereghe kye emezeituni, Yesu akabhatoma bhabhere kurwa mobhano bheghibhwa bhaye. ² ghweki akabhatebhya, "Mughi ko rong'ongo rono mwikaraini.Hano murihika, morenyora ekemori ikya itikere keno ketararinwako. Moketanshore mokerete kuwoni. ³ Nyore moresabhwa no omonto, 'Nkwake mokokora igho? Moratora koghamba, 'Omonene we akukituna nkerikyoribhwa hano'." ⁴ Bhaghya bhakanyora ekemori ikitikere kebhohirwe kebhara mokeseku konshera enene nabho bhakaketanshora. ⁵ Abhanto abhamwe bhano bharenge bhaimereye hara bhakabhatebhya, "Nke mokokora, kotanshora ekemori ikya itikere kiyo?" ⁶ Bhakabhatebhya kigho Yesu yabharagherei, (na) abhanto bhakabhatigha bhakaghya. ⁷ Bhakakereta ekemori kera ku Yesu bhakarya imienda ghyabho akaikarako. ⁸ Abhanto abharu bhakarya imienda ghyabho konshera, abhande bhakarya amasagharya aghamato ghano bhabhoye momeghondo. ⁹ Bhara bhamotangateye (na) bhano bhamosoraini mbakonganga, "Hosana! Yanonkirwe ono akusha kurina iryo Omonene. ¹⁰ Ononkirwe no obhokama bhono tokoghanya ubhwa tata Daudi! Hosana ighoro kwisaro" ¹¹ Ghweki Yesu akasoha Yerusalemu akasoha mwisengero akarora kera ekento. Bhono, enkagha warenge ogheye akaghya Bethania hamwe nabho ikomi na bhabhere. ¹² Inkyo yako hano bharwanga Bethania, akaighwa umweko. ¹³ Akarora omote ghona amato (kwa) hare, akaghwesokera akanyora shehagho teshekohe. Akanyora namato aghene kobhora tiyarenge enkagha yu kwamahe. ¹⁴ Akaghotebhya, "Taho ono arerya ehagho kurwa konohe" .Abhana bhegha bhaye bhakaighwa. ¹⁵ Bhahike Yerusalemu, akasoha mwisengero nu ukusimya koroshokya kebhara abhashurushi (na) abhaghori bhano bharyanga mwisengero muyo. Akagharanshora shemesha ishya bhano bhaswenanga shehera niibhitumbe bhya bhano bhaghoryanga shinguti. ¹⁶ Tiyitabhereyi bhaghenderi koghorya morahe. ¹⁷ Akabharagherya no okoghamba, "Igha teyandekirwe risengero ryane rerebherekerwa righutu irya amasabho ku ibhyaro bhoonswe'? Naho morekore (ni) sana irya abhasaki abhe bhento". ¹⁸ Abhaimereri abhanene (na) abhakonikoni bhakaighwa ghano yaghambanga,nabho bhakatuna enshera yu ukubhasikya.Ghweki bhakobhoha kobhora abhanto mbaroghore (na) ameghyo ghaye ghayo. ¹⁹ Hano yahikire moghorobha, bhakarwa mumughi. ²⁰ Hano bhaghendanga kunkyo hayo, bhakarora omote ghwo mtini ghono ghwihimirwe ghomire nunyora nimiri ghyonswe. ²¹ Petro akahita no okoghamba, "Tata! Maha, omote ghora waihimire ghooma". ²² Yesu akabhahonshokerya, "Mobhe nimighiro ko Waryobha. ²³ Mwitabheri nkobhatebhande igha ko kera ono akoghambera ekekreghe keno, 'Kirweho, airekere umwene momanshe, 'ghweki tana masoro monkoro yaye nawe araitabherya igha keno aghambire, nigho Waryobha arekora. ²⁴ Ku igho ndabhatebhya: ghonswe ghano mokosabha, mwitabheri igha moghanyore, ngarabhe aghenyu. ²⁵ Hano mwemera no okosasama, mwabhere kera ekento keno monakyo, okoreke Suwenyu ono arenge kwisaro abhabhere amasaryo ghenyu bhoonswe. ²⁶ (Naho hano motabhabheye, kura Suwenyu uwa kwisaro tabhere ibhitimba bhenyuhe). ²⁷ Bhakakyora kughya Yerusalemu ghweki. Yesu hano yaghendaghendanga mwisengero, abhaimereri abha risengero abhanene, abhakonikoni (na) abhaghaka bhakamushako. ²⁸ Bhakamotebhya, "Nko obhotonge orakora amang'ana ghano?" Newe yakohana obhotoro obhwo kokora ghano?" ²⁹ Yesu akabhatebhya, "Nendabhabhori eng'ana emwe. Montebhi (na) oni nendabhatebhi nkobhotonge ke nkokora amang'ana ghano. ³⁰ Isubho iya Yohana yarure kwisaro kasi nko omona wu mwiro? Monhonshokiri." ³¹ Bhakabhoryana abhene ko bhene no okogha, "Hano toraghambe, 'Kukurwa kwisaro; naraghambe, 'Nkwake motamwitabhereyi?' ³² Naho hano toraghambe, 'kurwa ko omona wu mwiro;..."Bhakobhoha abhanto,kobhora mbaiteghereye igha Yohana yarenge Omoroti. ³³ Nho bhamohonshokeyi Yesu no okoghamba, "Tetomanyirehe.Nho Yesu yabhatebhiri, "Nunyora noni tembatebhi nkwa bhotoroke ndakora amang'ana ghano.