¹ Nare ghasia adaheka, Paulo agavaetrana anafunzi vakwe nauvatia moyo. Nawaaaga waendo u Makedonia. ² Namweso nare gukea mekoa isee nare guvatia moyo anyohuvea, wakea Uyunani. ³ Baada a mweso uhendeka hafo gwa ighondo ramieri itatru, nja,a igaundwa gunto akwe na Ayahudi nare wahuvea uhenda mohenjo gwa njea a bahari uenda Shamu, oi egamolazimu asuke ukerea Makedonia. ⁴ Vegaadamana nayo hadi Asia nare Sopatro, mwana wa Pirho ufuma Berea; Aristrako na Sekundo, vong'e ufuma anyohuvea va Vathesalonike; Gayo wa Derbe; Timotheo; Tikiko na Trofimo ufuma Asia. ⁵ Lakini antu avai nare vatrongea navaguindea kuko Troa. ⁶ gwa njea aa bahari ufuma Filipo baada amatriku aa mekate neetrohendewa chachu, na moghatre ama triku atrano gwa vaghea kuko Troa. Gugaeghaa kuko gwa matriku saba. ⁷ Hatra itriku ra mwandio raijuma, nare gugirundie ili guumege mokate, Paulo agaeghatria Naanyohuvea. Nare guvanga ufwaya fadiu, oi waendelea ueghetria mpaka utriku wakitri. ⁸ Nare guna traa nyinge uchumba gagunto gune nare gugirundie song'e. ⁹ Ugidirisa nare weghee mobalanda umwedu rina rakwe Utiko, nechu agaelemewa na troa nenditro.Hatra Paulo nare uguhutubea gwa ighondo riifu, mobalanda uyui, narewaraa, wagwaa fang'e ufuma u ghorofa atatu na agaokotwa newakuya. ¹⁰ Lakini Paulo agasima fang'e, agagighora mweso wayo gunto akwe, wamokumbatrea na wahanya, "Motrakate tamaa, gwa soko mofanga." ¹¹ Na wadaha unantea kake ughorofa na waumega mokate, walia. Baada oeghetia nayo gwa muda uifu hadi diu, wafwaya. ¹² Vamoetra mobalanda uyoo mofanga vafarijeka ino. ¹³ Sese wayo gugatrongea usonge ama Paulo gwa meli na gwaenda Aso, nechu sese nare gwafanga umuhoa Paulo kuko. Egei ndio hatra mweso narewafanga uhenda, gwa soko nare wafanga uenda ukerea ung'ee nekanku. ¹⁴ Nare waghea kuko Aso, gwamofakea uu Meli gwaenda Mitilene. ¹⁵ Nasee gwafwaya ufuma kuko na itriku rapele gugaghea ufande wa pele wa gesiwa ga Kio. itriku nare refuatae, gwaghea ugesiwa ga Samo, na fadiu ayo gwa ghea umuji wa Mileto. ¹⁶ Gwa soko Paulo nare waamua uhenda muhenjo ukerea Efeso, ili kwamba atratromie muda wowote uu Asia; gwa soko nare wina haraka owahi uu Yerusalemu gwa soko aa sikhunkuu aa Pentekoste, mwese nare yudaheka ahende oi. ¹⁷ Ufuma uu Mileto watroma antu u Efeso na wavaetrana anyampaa va kanisa. ¹⁸ Narevaghea gune mweso,wavera,nyenye wayo momanyie ufuma itriku ramwandio narenafanda afai Asia, ginya nare negune nyee ighondo rong'e. ¹⁹ Namotromekea Bwana gwa uginyumpia ino na gwa mihori, na maghaseko neang'angie nene gwa hila ya Ayahudi. ²⁰ Momanyie ginya ntina gighiya uhanya gune nyee intu gekaku nechu nare ramohimu, na ginya nene navafundisiye waziwazi na pia uenda nyumba gwa nyumba. ²¹ Momanyie ginya nene naendelee uvaonya Ayahudi na Ayunani gunto aa toba gune Mungu na uhuvei gune Bwana witru Yesu. ²² Na fanui, ravii, nene, nenomotii Mwahu Mweru uenda Yerusallemu, ntamanye mantu neejufumea kuko, ²³ ila gwa soko Mwahu Mweru ugumbwera nene gwa kela mojina ugahanya kwamba menyoo na maghaseko ndio neenyidie. ²⁴ Lakini nene ntina ghema udovoo wane ne gwanjea gekaku aa thamani gune nee, ili nedahe umareya muhenjo wane wahuduma nenafokee ufuma gune Bwana Yesu, umeshuhudea injili aa neema ama Mungu. ²⁵ Na fanui, ravaa, nemanyie kwamba vong'e, moghatre awe nenaendie uvatranantia Utremi, motriju nyona usiu kake. ²⁶ Gwa hiyo navashuhudea reo eyei,kwamba ntikwetri hatia gwa saghami amontu gekaku. ²⁷ Gwa soko ntina gizuea utranantia mafenji ong'e ama Mungu. ²⁸ Gwa hiyo hendeki mwaangalifu nyenye aghonjo, na gunto aikundi gekaku nechu Mwahu Mweru wavaeka nyenye uhendeka mwaanyorava. Hendeki mwanyo rava gwa soko olilinda ikiundi rama Bwana, nechu wareghurie gwa saghami akwe moghonjo. ²⁹ Nemanyie kwamba baada ofwaya gwane, mbwa yomahaka ijujaa gune nyee, na itrarehoromie ikundi. ³⁰ Nemanyie kwamba hatra gune nyee guna antu vejuja navejuhanya mantu nemavee, ili uvautra anafunzi vevasambeye veso. ³¹ Gwa hiyo mohendeke miho. Kombuki kwamba gwa meagha itratru intinadaha uvafundisia kela umwedu wanyu gwa mihori momwe na utriku. ³² Na fanui nene novakabidhi gune Mungu, na gwa neema aukhani wakwe, nechu rodaha uvajenga na uvafa uridhi itrambe remwedu nayo vong'e nevaekiwe wakifu gune Mungu. ³³ Ntinasegha hela, dhahabu, au masaa. ³⁴ Monmayie kwamba meghono eyei ndio ang'angeya mantu ane moghonjo na mantu avoo nare neitrambe remwedu nayo. ³⁵ Umantu ong'e negavafa wiraghei wa ginya eseghetwe uvaareya anyonge gwa uhenda mwemo, na ginya iseghetwe ukumbuka ikhani yama Bwana Yesu, nkhani nemweso waho wahanyiye: "Neguja ufunya kuliko ufokea." ³⁶ Baada ohanya namna eyei, agaghwamagoti waomba itrambe remwedu nayo. ³⁷ Vong'e varea ino na vamogwera Paulo ukingo na umotromia. ³⁸ Vegahuzuneka ino aasaa gwa soko aero nechu nare warehanyiye, kwamba vetrijuona usiu wakwe kange. Navamotrindekea umerikebuni.