¹ Ighondo nare gwagireka nayo, na guhendie mohenjo ubahari, gwa ghea umuji wa Kosi, na fadiu ayo gwa ghea muji wa Rodo, na ufuma kuko gwa ghea muji wa Patara. ² Naregwahanga meli neyovuka uenda Foinike, guganantea gwa henda mohenjo. ³ Nare gwaghea usonge agiambo ro Kipro, gwamereka ufande wa gemoho, gwa henda mohenjo mpaka Siria, gwa eka naga umuji wa Tiro, gwa soko kuko ndio ja meli isimeywe shehena ayo. ⁴ Baada ovaona anafunzi, gwaeghaa kuko matriku saba. Anafunzi vasaa vamwera Paulo ukerea Mwahu Kwamba mweso atrafande Yerusalemu. ⁵ Hatra nare aghea itriku ero, sese gwafwaya. Song'e, na aghema vawe na ana vawe, vegatrindekea unjea itru mpaka nare gwa fuma unji amuji. Nagwaghua magoti upwani, gwaomba, gwa giaga momontu. ⁶ Gwanantea meli, kuko naveso vasuka unyumba awe kange. ⁷ Hatra nare gwamare mohenjo witru ufuma Tiro, gwaghea Tolemai. Hafo gugaramocha anyadughu, na ueghaa nayo gwa itriku remwedu. ⁸ Fadiu ayo gwa fwaya gwaenda Kaisaria. Sese gwakea unyumba ama Filipo, motranati waughani, nare umwedu waavoo saba, nasee gwaeghaa itrambe remwedu nayo. ⁹ Montu uyui nare wina achaa vatrano mabikira nare votabiri. ¹⁰ Baada ueghaa kuko gwa matriku kadhaa, wasima ufuma Uyahudi muoni umwedu neguetranwa Agabo. ¹¹ Mweso agaja gune see nawauhoa mokanda wama Paulo. gwa hiyo agagitrunga meghono akwe na meghuu akwe wahanya, "Mwahu Mweru guhanya vii," "Ayahudi va Yerusalemu vejumotrunga montu negumiliki mokanda urui, naveso vejumokabidhi ugwaantu va mataifa." ¹² Naregwatregheya mantu ayai, sese na antu narevodova hafo gogamosihi Paulo atraende Yerusalemu. ¹³ Nahafo Paulo agajibu, "Mohenda ntuni, morea nauunania nkoo ane? gwa soko netayare, nti utrugwa gutrofo, lakini hatra ukuya kuko Yerusalemu gwa soko aa rina rama Bwana Yesu." ¹⁴ Gwa soko Paulo atrina segha ushawishewa, gugareka nauhanya, "Basi mafenji ama Bwana naehendeke." ¹⁵ Baada amatriku ayai, gugahoa mefuko itru nagwanantea Yerusalemu. ¹⁶ Baadhi anafunzi ufuma uu Kaisaria vegagusambeya. Vamoetra montu umwedu neguetranwa Mnasoni, montu wage Kipro, mwanafunzi wa ghenge, nechu gugaeghaa nayo. ¹⁷ Naregwaghea Yerusalemu, anyadughu vegagughenyifia gwa uyanjo. ¹⁸ Fadiu ayo Paulo agaenda nasee gune Yakobo, na anyampaa vong'e narevefo. ¹⁹ Baada ovaramocha, agavafa taarifa emwedu baada ambuya aa mantu aa Mungu newahendie moghatre ama taifa gwa ukerea huduma akwe. ²⁰ Nare vatregheya asaa, vamohumbua Mungu, na vamwera, "Ukengee, anyadughu, guna maghana aga vahuvea meongoni mwa Ayahudi. Veso vong'e veketri nia ukatrea seria. ²¹ Vaerwa uhusu veve, kwamba ugufundisia Ayahudi nevodova moghatre amataifa ugireka vina Musa, na kwamba uguerwa vetravatahiri ana vawe, na vetrasambeye desturi yaghingi. ²² Guseghetrwe guhende ntuni?Bila shaka vejutregheya veve waja. ²³ Oi henda eroo nesese guguera: gukwetri antu vanne neveekiwe nadhiri. ²⁴ Vahoe antu avi ugitakase na yoo, na uvarefeye gharama yawe, ili vedahe umwa metwe awe. Oi momontu amnye kwamba mantu newaeriwe uhusu veve neuegheghe. Vejugifundisia kwamba veve no ugusambeya seria. ²⁵ Lakini gwa ghabari yama taifa nechu vahendeka ahuvei, giugahadea kwa,mba veseghetwe ugieka kwenge na mantu neefunyiye dhabihu gwa sanamu, na saghami, utokana naero neranyomiywe, na vigieke kwengi na uasherati." ²⁶ Nahfo, Paulo agavahoa aghosia, na itriku ragavere, wagitakasa mweso itrambe remwedu nayo, wakea u Gihekalu, uhanya kepende gama triku ogitakasa, mpaka sadaka efunywe gwa soko amoumwedu wawe. ²⁷ Matriku asaa saba nare ahuvea udaheka, baadhi Ayahudi ufuma Asia vamuona Paulo Ugihekalu, na mokutrano wakasireka, na vamoghorea meghono. ²⁸ Narevoghua mokindo, "Antu va Israeli, guarei. Oi ne montu neguvafundisia antu momahali mantu nechu hiya na antu, seria, na mahali afai. Pia wavaetra Ayunani u Gihekalu na wanajisi mahali afai negueruu." ²⁹ Gwa soko mwandio nare vamuona Trifimo Moefeso nare vinawe omojini, naveso nare viraa kwamba Paulo agamoetra ugihekalu. ³⁰ Moji wong'e nare wina taharuki, na antu vadua na umokwatra Paulo. Vamofunya unjii aihekalu, na melango afungwa. ³¹ Nare vasoya umuuragha, ghabari igamoghea mokuu wa ijeshi ra alinzi kwamba Yerusalemu ong'e nare ijue vetra. ³² Mara esee vamohoa mosikae na jemedari waudorea mwirundo. Ighondo nare antu vaona mosikae na mokuu waijeshi, vareka umoghoa Paulo. ³³ Nahafo mokuu waijeshi agamohuveya nawamokwatrea Paulo, na waamuru atrungwe menyoo evere. Wamuyweya neanyu newahenda vii. ³⁴ Baadhi aantu umwirundo nare vopayuka vii navauya riuya. Gwa soko jemedari atrinadaha umwera itu rorote gwa soko akelele isii, waamuru Paulo aetwe mong'e aa ngome. ³⁵ Basi nare waghea ungazi, wahowa na mosikae gwa soko aa ghasia yamwirundo. ³⁶ Maana mwirundo waantu ugamosambeya navegaenda ughua mokindo, "Moheii oyui!" ³⁷ Paulo nare guetrwa mong'e agome, agamwera mokuu waijeshi, "Nodaha guera intu?"Mokuu waijeshi wahanya, "Ahaa ugueghetria Geyunani? ³⁸ Ahaa, veve utrimomesiri nechu mwandio agatrongeria ovee na agahoa magaidi maghana ane nyikani?" ³⁹ Paulo wahanya, "Nene ne Moyahudi, ufuma umiuji wa Tarso aa Kilikia. Nene ne montu wa muji neumanyikie. Novaomba, moduhusu neeghetrie na antu." ⁴⁰ Ighondo jemedari nare wamofaa ruhusa, Paulo waemeka gune guna kitri nawafunya isara gwa antu gwa moghono wakwe. Ighondo nare gwa kia tui ino, waeghetria nayo Giebrania. Wahanya,