¹ Ahendeka kwamba Apolo nare gu Korintho, Paulo wakera nkenenti yagunto naughea umuji wa Efeso, na wahanga anafunzi vakei kuko. ² Paulo wavaera, "Ahaa, mogavokea Mwahu Mweru nare mwahuvea na?"Vanwera, "Gutrii, gutrina daha hatra utregheya uhusu Mwahu ne Mweru." ³ Paulo agahanya, "Fanui nyenye mogabatizwa urii?"Vahanya, "Uguubatizo wama Yohana. ⁴ Basi Paulo wajibu, "Yohana agabatizia gwa ubatizo wa toba. Wavaera antu avoo vefaire umuhuvea uyoo nare neujie baada akwe, yaani, Yesu." ⁵ Antu nare vatregheya ghabari eyei, vegabatizwa gwa rina rama Bwana Yesu. ⁶ Nanare Paulo newaika meghono gunto awe, Mwahu ne Mweru waja gunto awe na vaandia unena gwa lugha na utabiri. ⁷ Jumla ayoo nare aghosia ikumi na gavere. ⁸ Paulo agaenda u sinagogi wahanya gwaodea utrija gwa ighondo ramieri itratru. Nare gutrongeria majadileano na uvautra antu uhusu mantu neehusu utremi wa Mungu. ⁹ Lakini Ayahudi vauya nare akaidi na nevetrotii, vegaandia uhanya ivee uhusu rina rama Kristo usonge amwirundo.Basi Paulo agavareka nawagibaghua na anyohuvie kwenge nayo. Namweso agaandia ueghetia moitriku uguukumbi wa Tirano. ¹⁰ Eyei egaendelea gwa meaghaa ivere, gwa hiyo nare vodova uu Asia vegatregheya ughani wama Bwana, vong'e Ayahudi na Ayunani. ¹¹ Mungu nare guhenda ntendo nenkuu gwa meghono ama Paulo, ¹² Kwamba hatra aremuu vegaforwa, na nkoo nembee igafuma, ighondo nare vahoa leso na masaa nareyafuma uu mwere wama Paulo. ¹³ Lakini nare guna Ayahudi nevetroiye umpefo nevohenda mohenjo ukerea ieneo erei, neveretromea rina rama Yesu gwa matrumizi awe. Nevovaera avoo nare vina fefo movee; Vahanya, "Novaamuru mofume gwa rina rama Yesu nechu Paulo ugumotranatia." ¹⁴ Nevahendie ayai nare ana mofungatre va makuhani ne Mokuu wa Geyahudi, Skewa. ¹⁵ Nkoo nembe yavajibu, "Yesu nemomanyie, na Paulo nemomanyie; lakini nyee movaanyu?" ¹⁶ Fefo usuu nemochafu wavarimea anyafunga mpefo na wavahuma nguu nauvaghua.Nandio vadua ufuma unyumba esee nevetriketri masaa navavarwa. ¹⁷ Intu erei ramanyeka gwa antu, Ayahudi na Ayunani, narevaduvie kuko Efeso. Vahendeka nahofu ino, na rina rama Bwana razidi uhesimewa. ¹⁸ Pia, vaingi vanyahuvea vegaja na vahendeka itrambe remwedu nevogigheya mantu ne mavee nevayahendie. ¹⁹ Vaingi nare vohenda ughanga vakusanya itrabu yawe, vaitrimea usonge akela montu.Ighondo veso nare vovaria dhamni amantu asaa, nare ifande hamosini ya hela. ²⁰ Oi ukhani wama Bwana waenenda ino gwa nguu. ²¹ yama Paulo ughondeya uhuduma akwe kuko Efeso, Mwahu wamoelekeza uenda uu Yerusalemu ukerea Makedonia na Akaya; Wahanya, "Baada uhendeka kuko, neseghetrwe nemeone na Rumi pia." ²² Paulo wavatroma Makedonia anafunzi vakwe vavere, Timotheo na Erasto, nechu nare vamoareya. Lakini mweso moghonjo wasagha Asia gwa ighondo rikufei. ²³ Ighondo resee gugahendeka na wiremwi ukuu kuko Efeso uhusu Njea eyoo. ²⁴ Sonara umwedu rina rakwe Demetrio, nechu nare wahendie anasanamu vya hela wa mungu Diana,agaetra biasara nkuu gwa mafundi. ²⁵ Oi varunda mafundi vaingi va mwemo usuu na vahanya, "Ahesimewa, momanyie kwamba ubiasara eyei gukeya hela nyingi. ²⁶ Mokengee nautregheya kwamba,tri fai Efeso, ila hatra fife na Asia ong'e, uyui Paulo wavaseya antu nauvafetrokeya antu vaingi. Uguhanya kwamba gutrii meungu neehendiwe na meghono. ²⁷ Naefo fetra kwamba biasara itu ijuhendeka itriseghetrwe kanke, lakini pia na hatra ihekalu ra mungu wageghema nemokuu Diana ugudaha uhowa ahendeka atrina maana. Kanke hatra ayaghaye ukuu wakwe, mweso nechu Asia na uremi vomorumba." ²⁸ Narevatregheya ayai,vegaijuwa na asira vaghua mokindo, vahanya, "Diana wava Efeso ne mokuu." ²⁹ Moji wong'e waijua wiremwi, na antu vadua uguukumbi wamiinisio. vavakwatra anyamohenjo wakwe na Paulo, Gayo na Aristariko, nevefumie uu Makedonia. ³⁰ Paulo agasegha ukea umwirundo waantu,lakini anafunzi vegamoghiya. ³¹ Pia, baadhi amaafisa va mokoa wa Asia nare majaa vakwe vamotrera ketri gwa nguu atrakie uguukumbi wa miinisio. ³² Baadhi antu nare vohanya intu erei na intu eroo, gwa soko mwirundo waantu nare uchanganyekewe. Vaingi vawe vetrina daha atra umanya nesoko eke vajie itrambe remwedu. ³³ Ayahudi vamoetra Iskanda unji amwirundo na uvaeka gunto usonge aantu. Iskanda wafunya isara gwa moghono wakwe ufunya maelezo gwa antu. ³⁴ Lakini nare vamanya kwamba mweso ne Moyahudi, vong'e vaghua mokindo gwa rori umwedu gwa ighondo rasaa ivere, "Diana ne mokuu wa Vaefeso." ³⁵ Baada aa karani wa moji ukiya mwirundo, agahanya, 'Nyee aghosia va Efeso, ne anyu neatrimanyie kwamba moji urui wa Efeso ni monyo tunza ihekalu rama Diana mokuu na picha eyoo neague ufuma ugiunde? ³⁶ Uona basi mantu ayai etriudaheka, guseghetrwe guhendeke na utulivu na motrahende intu rorote gwa haraka. ³⁷ Gwa soko mwavaetrana antu avai afai umahakama nechu njiahembi va hekalu wala nti anyomokufuru mungu witru wageghema. ³⁸ Gwa hiyo, ginya Demetrio na mafundi neveitrambe remwedu nayo vekwetri masitraka gunto aa montu yeyotre, mahakama imwari na maliwali vefo. Na neveetrwe usonge aa mashauri. ³⁹ Lakini mwese veve ugufenja intu gekaku uhusu mantu mauya, ejushughulekewa ugekao halale. ⁴⁰ Gwa trutri guvetra gwa utuhumewa uhusu ghasia itriku erei.Gutrii soko aa macahafuko ayai, na gujuhendeka gutriketri udaho woyahanya. ⁴¹ Baada ohanya ayai, agavafaghatria mwirundo.