¹ Ahanyuma Mwoyo atwara Yesu omw'irungu kuja kulengesibhwa Sitani. ² Ebhiro 40 bhyona akabha nasubha, naarara, chonka obhugenda bw'eirai arumwa enjara. ³ Sitani aija amugambira ati, “K'orabha oli mwana wa Katonda gambira amabhare aga gahinduke omukate.” ⁴ chonka Yesu amuhorora ati, “Kikahandikwa chiti, ‘Omuntu tatungwa mukate gwonka, atungwa bhuli chigambo echiruga omu kanwa ka Katonda.’” ⁵ Nikwo Sitani kumutwara omu chigo chilikweraamuteka aha kasongore ka Rwensinga. ⁶ Amugambira ati, “K'orabha oli Mwana wa Katonda, oyetere ahansi; manya chikahandikwa chiti, ‘Aliragira abhamalaikabhe kukulinda,’ mara ati, ‘Balikusutuza emikono yabho, otalija okasitara aha ibhare.” ⁷ Yesu agambira Sitani ati, “chisubhire kihandikirwe chiti, ‘Otalilengesa Mukama Katonda wawe,’ ” ⁸ Sitani asubha amutwara aha ibhanga elireingwa muno, amwoleka engoma zona z'omu nsi n'echitinwa chazo, ⁹ amugambira ati, “K'orabhandama okanfukamira, engoma ezi zona ndazikuha.” ¹⁰ Nibhwo Yesu yamugambiire ati, “genda kuriha iwe Sitani! Manya chikahandikwa chiti, ‘Orafukamira Omukama Katonda wawe, mara wenene wenka obhe niwe okolera.’” ¹¹ Aho Sitani amurugaho, nikwo abhamalaika kwija bhakamutagaitira. ¹² Yesu kayahuliire okwo Yohana bhamukwasile, akwata omuhanda aja Galilaya. ¹³ Asigaho Nazareti agenda atura Kaperinaumu bhwatana aha nyanja, omu nsi ya Zebuluni na Nafutali. ¹⁴ echigambo chihasekugobeelera ech'Omurangi Isaya yagambire ati, ¹⁵ “Ensi ya Zebuluni n'ensi ya Nafutali, obhwolekera bw'enyanja, n'okusabhuka Yorudani, Galilaya eturwa abhanyamahanga: ¹⁶ abhantu abhaturaga omu mwilima bhabhoine omusana guhango. Abhatura omu nsi y'omwilima n'omu chibeho cha Rufu eizoba lyabhasabhukiraho.” ¹⁷ Kwema makiro ago, Yesu abhanza kuranga ati, “Mwechuze, aha bhw'okubha obhukama bhw'omw'iguru bhwahika.” ¹⁸ Yesu kayabhaire narabha aha Nyanja ya Galilaya, abhona abharumuna bhabhili: Simoni owu bheta Petero na Anderea omurumuna, nibhanaga eikokoro omu nyanja, bhona bhakabha bhali bhajubhi. ¹⁹ Abhagambira ati, “Mumpondere, ndabhahindura bhajubhi bh'abhantu.” ²⁰ Niho honka bhasigaho amakokoro gabho bhamuhondera. ²¹ Kayarugir'aho abhona abharumuna abhandi bhabhili: Yakobo eya Zebedayo na Yohana omurumuna, bhali omu bhwato bhwa Zebedayo isebho nibhasobhorora amatimba gabho, abheta. ²² Aho n'aho basigaho obhwato na isebho, bhamuhondera. ²³ Yesu arabha Galilaya yona nayegesa omu sinagogi zabho, naranga amakuru garungi evangeli y'obhukama bhwa Katonda. Abhantu abhatambira bhuli ndwara na bhuli bhulema. ²⁴ chityo eirangalye limanyika Siria yona, bata nibhamuletera abharwaire bhona, abhaine bhuli ndwara n'obhusasi, abhakwasirwe amasitani, abhagwi bh'ensimbu n'abhakabhire embaju, mara abhakiza. ²⁵ Kandi embaga nyingi eruga Galilaya, omu nsi y'ebhigo 10 ebhyayetwaga Dekapoli, Yerusalemu, Bhuyahudi na bhuseli bhwa Yorudani, bhamuhondera.