¹ Omu makiro galiinya Yohana aija aranga omw'irungu lya Bhuyahudi, ati, ² “Mwechuze, ahakubha obhukama bhw'omw'iguru bhwahika.” ³ Manya ogu niwe Omurangi Isaya yarangireho ati, “Eiraka ly'akutera enduru omw'irungu niligamba liti, ‘Musemeze omuhanda gw'Omukama, emihandaye mujigorore.’” ⁴ Yohana yajwaraga echijwaro ech'obhusense gw'engamia, n'omukanda gw'oruhu omu chibhuno. Kandi echakulyache zikabha zili nzige n'obhwochi bhw'omw'iswa. ⁵ Aho mpaho Yerusalemu na Bhuyahudi yona n'ebhyaro bhyona ebhyataine Yorudani bhamugobhaho. ⁶ Abhabhatiza omu mwiga gwa Yorudani nibhatura amafu gabho. ⁷ chonka obhwo yabhoine Abhafarisayo n'Abhasadukayo nibheija k'abhabhatiza, abhabhaza ati, “Inywe ruzaro rw'enjoka, n'oha ayabhatatira kamwija kuhunga aha kibonabonyo echikwija? ⁸ Mukore ebhikorwa ebhirayoleka okwu mulekeire amafu ganyu. ⁹ Muleke kufa kugambilana muti, ‘Manya itwe Aburahamu niwe abha tataitwe!’ Kambagambire, omu mabhare aga Katonda yakusobhora kwihiramu Aburahamu abhaana. ¹⁰ Nangu n'aha mbali tuli esoka yatekatekirwe kusindura emiti. Bhuli muti ogutarabha bhirabha bhirungi gutemwa gunagwa omu muliro.” ¹¹ “Nyawe nimbhabhatiza n'ameizi kamwechuza, chonka ogwo alikunduga enyuma aina amani kusaga, n'enkeitoze tinakubhitwara. Arabhabhatiza na Mwoyo Arikwera n'ebhiratwabhye. ¹² Orutaro rumuli omu ngaro, arasomboza enganoye nagiteka omu sitoa, chonka omusunga naija kugwocha n'omuliro ogutarara. ¹³ Omu bhir'ebhyo Yesu aruga Galilaya aija Yorudani ahali Yohana k'amubhatiza. ¹⁴ Yohana abhanza amutanga ati, “nyawe n'inye ndi w'okubatizibwa iwe, iwe wabha n'iwe oija ahali nyawe?” ¹⁵ chonka Yesu amuhorora ati, “Mbwenu tutwaze tutyo! Kubha omu ntwaza eji nibhwo turasobora kugobheseleza bhyona ebili by'obugorogoki.” Aho Yohana aikiliza. ¹⁶ Yesu kayamazire kubhatizibhwa aruga omu maizi bhwangu, niho honka eiguru lichinguka, abhona Mwoyo wa Katonda nasongoka akabha nasana echiibha, amubhandaraho. ¹⁷ Lebha, eiraka liruga omw'iguru niligamba liti, “Ogu niwe mwana wange omugonzibwa, niwe nsemelerwa muno.”