¹ Obhwo Yesu yazaliirwe Betelehemu eya Bhuyahudi omu makiro g'Omukama Herode, lebha, abhasomi bh'enyanyinyi bharuga obhurugaizobha bheija Yerusalemu nibhabhaza bhati, ² “Alahi ogwo azairwe ali mukama w'Abhayahudi? Tubhoine enyanyinyi y'obhurugaizobha, twamara twaija kumufukamira.” ³ Omukama Herode kuhulira echigambo echo, ahwa omwoyo na Yerusalemu yona. ⁴ Aho asoroza abhakuhani bhakuru n'abhegesa bh'Amateka bh'eihanga abhabhaza mbali Masiha yabhaire ali w'okuzalirwa. ⁵ Bhamugambira bhati, “Omuli Betelehemu eya Buyahudi; kubha nikwo omurangi yakihandikire ati, ⁶ ‘Iwe Betelehemu omu nsi ya Yuda, omu bhutwazi bhwa Yuda toli muke muno n'akake; manyasi omuli iwe halitabhukwamu omukama alitwara abhantu bhange abha Isiraeli.” ⁷ Nibhwo Herode yayesire abhasaija abho abhamanyi akabhabhaliiliza kumanya ni maki kwema obhwo enyanyinyi yabhonekire. ⁸ Aho abhatuma Betelehemu nabharagira ati, “Mugende munyomoze mbali omwana ali. Kamuramara kumubona mwije mummanyise, nanye kwakwo ngende mufukamire.” ⁹ Kabhamazire kuhulira ebhy'omukama yagamba, bhakwata omuhanda bhagenda. Oralebha, enyanyinyi ehi bhabheire bhabhoine obhurugaizobha egenda ebhebhembeire, elemwa eyemeelera eiguru mbali omwana yabheire ali. ¹⁰ Kabhamazire kubhona enyanyinyi bhasemelerwa muno, bajira ebhyera bhingi. ¹¹ Kabhatahire omu nju bhabhona omwana na nyina, Maria, bhamufukamira. Bhakomorora ebhirongoro bhyabo bhamuha ebigemuro: ezahabu, obunuma n'omubhazi gwa mirai. ¹² Obhwo bhatatiirwe omu kiroto kutagaruka wa Herode, bhaimucha bhasubhire omu nsi yabho, omuhanda batwarwa gundi. ¹³ Kabhabhire bagenzire, omumalaika w'Omukama ahabukira Yozefu omu kiroto amugambira ati, “Imuka, otware omwana na nyina osingirwe Misiri, mara oikareyo kuhika obhwo ndikugambira; ensonga Herode akwatiliire kuhiiga omwana mbali ali kumwita.” ¹⁴ Aho Yozefu aimuka akwata omwana na nyina omu kiro, aimucha aja Misiri, ¹⁵ aikarayo kuhika obhwo Herode yafire. Echi chikabha kili ch'okugobeseleza echo Omukama yabheire agambire omu kanwa k'omurangi ati, “Nketa omwana wange kumwihya Misiri.” ¹⁶ Herode kubhona okwo abasaija abho abhamanyi bhamurabha omu magezi, echiniga chija kumwita, aragira kwita abhaana bhona bh'abhojo omuli Betelehemu n'omu byaro byona ebhyataineho abhabheire bhali bh'emyaka ebhili n'abhatakajigobize, kuhonderana n'eibhanga elyabheire lyarabhireho kwema obwo yamanyurwize ebhigambo ebhyo aha basaija abhamanyi. ¹⁷ Aho chigobelera echo Omurangi Yeremia yagambire ati, ¹⁸ “Eiraka likahulirwa omuli Rama, okuchura n'okutonja kw'amani, Raheli nachulira abhaanabhe, akanga n'okumaramarwa, aha rw'okuba abhaanabhe bhakafa.” ¹⁹ Obhwo Herode yafire, omumalaika w'Omukama abhonekera Yozefu omu kiroto ali Misiri nagamba ati, ²⁰ “Imuka, okwate omwana na nyina osubhe omu nsi ya Isiraeli, ensonga abhokuiga kwita omwana bafhire.” ²¹ Yozefu aimuka, akwata omwana na nyina, agaruka Isiraeli. ²² chonka kayahuliire okwu Arikelao niwe yabheire asikiire Herode ise, akabha mukama wa Bhuyahudi, atina kujayo, kandi kiyamazire kutatirwa omu kiroto, ahinduka aja omu Wilaya ya Galilaya. ²³ Agenda atura omu chigo kilikwetwa Nazareti; echabhaire chigambirwe abharangi chigobhelere, bhati, “Alyetwa Munazareti.”