¹ Kabwakeire abakuhani bhakuru bona n'abagurusi b'embaga bategeka kwita Yesu. ² Bamubhoha bamutwara bamukwasa Pilato, gavana. ³ Yuda mahindukane kayabhoine okwo bamuramura kufa, ayechuza, ebichweka 30 by'efeza abigarulira abakuhani bakuru n'abagurusi, ⁴ nagamba ati, “Nafakara obhwo nabanja omuntu ataina ntambara nkamwisa.” Bamushubamu bati, “Itwe ebhyo bitukwasireki? Iwe ebyo byawe.” ⁵ Kayamazire kujugunya ebichweka 30 ebyo omuli Rwensinga, agenda agya ayehanika. ⁶ chonka abakuhani bakuru abo bakwata ebichweka ebyo 30 by'efeza, bagamba bati, “Titulikujuburwa kubiteka buhanika, orwo zili mpiha ezaisa omuntu.” ⁷ chityo baikilijanyia, baziguza ekisi ky'omubumbi, kuta nibaziikamu abanyamahanga. ⁸ Aha rw'ekyo kwema aho kuhika mwaha ekisi echo chetwa, “Kisi ky'empiha zaisize omuntu. ⁹ Nikwo kugobeelera ekigambo ekyagambirwe Omurangi Yeremia ati, “Bakakwata ebichweka 30 by'efeza, eiguzi ly'ogwo owo Abaisiraeli abandi bachwire, ¹⁰ baziguza ekisi ky'omubumbi, nikwo Omukama yandagiliire.” ¹¹ Yesu ayemelera omu maisho ga Pilato gavana. Gavana amubaza ati, “Iwe oli Mukama w'Abayahudi?” Yesu ahorora ati, “Wachigamba.” ¹² chonka obhwo yatoijeirwe abakuhani bakuru n'abagurusi tiyahoroire. ¹³ Nikwo Pilato kumugambira ati, “Ebyo balikukugambaho byona tolikubihulira?” ¹⁴ chonka Yesu tiyamuhoroire, nangu n'aha kigambo kimo chonka aha byobamutoijeireho. Echo gavana kikamutangaza muno. ¹⁵ Aha chiro kikuru gavana yataishuliraga embaga omufungwa wena wena ow'embaga yayendaga. ¹⁶ Bakaba bainayo omufungwa ruchwa nayetwa Baraba. ¹⁷ chityo kabamazire kugobana Pilato ababaza ati, “Nimwenda mbataishulire oha, Baraba anga Yesu owo beta Kirisito?” ¹⁸ Ahakuba akaba namanya okwo okumuleta bakasindikwa eitima. ¹⁹ Lero kandi obhwo wenene Pilato yabaire aikaliire entebe eyo yaramuliragamu, mukaziwe akamutumaho ati, “Omushaija omugorogoki ogwo otagira kyowamukoraho, aha rw'enshonga chir'eki omu chiroto nasasa muno aha rwa wenene.” ²⁰ Kandi abakuhani bakuru n'abagurusi bakaba niboohya abantu kushaba Baraba, kwita Yesu. ²¹ Gavana ashuba ababaza ati, “Omu babili aba nimugonza kambataishulira oha?” Bamuhorora bati, “Baraba.” ²² Pilato ababaza ati, “Aho Yesu owo beta Kirisito mugire ntai?” Bona bagamba bati, “Abambwe.” ²³ Pilato ati, “Ahakubaki? Kabiki ak'akozire?” Bonene aho bashagaho okwashana bati, “Abambwe.” ²⁴ Pilato kayaboine okwo byabura amazima abantu bazoka oti baramukiza amani, yakwata amaizi yanaba omu maisho g'embaga nagamba ati, “Omuntu ataina ntambara k'arafa batalimumbaza, imwe mubyemanyire.” ²⁵ Abantu bona bahorora bati, “Obwambabwe butururuukire ichwe chwenene n'abaana baitu!” ²⁶ Aba nibhwo abataishulira Baraba. Kayamazire kutera Yesu amubataishulira kabamubamba. ²⁷ Abaisherukare ba gavana batwara Yesu omu rubuga omu chikaare echayetwaga Puraitorio, bamuhuruliza eihe lyona. ²⁸ Bamujuura, bamujweka omwendo ogulikutukura nigwengelera, ²⁹ bahogosha orukinga rw'amahwa barumuteka omu mutwe, bamukwasa n'orubingo omu mukono gwa bulyo. Bamubandama omu maisho nibamujaamya, bakwese, “Kamelere Mukama w'Abayahudi!” ³⁰ Bamuchwera ebichwanta, bakwata n'orubingo barumuteza omu mutwe. ³¹ Kabamazire kumujaamya batyo bamujuura omwendo ogulikutukura nigwengelera, bashuba bamujweka emyendoye, bamutwara kumubamba. ³² Kababaire nibagenda batanganwa omuntu wa Kirene, eibaralye Simoni. Omushaija ogu bamugimba kutwara omusaraba gwa Yesu. ³³ Kabagobire mbali halikwetwa Goligota (omwamya gw'ekitwe ky'omuntu), ³⁴ bamuha edivai y'okunywa, etabangijainyiemu endurwe, chonka kayamazire kujirozaho tiyajinyoire. ³⁵ Kabamazire kumubamba babegana ebijwarobye nibabitekera ensoga. ³⁶ Bashuntama ahansi baikara bamuhangire amaisho aha musaraba. ³⁷ Aha mutwegwe eiguru bataho ebyo bamuhangiliire, babihandika bati, “Ogu ni Yesu Omukama w'Abayahudi.” ³⁸ Abashuuga babili bakaba babambirwe kimoi nawe, omo mukono gwa bulyo n'ondijo ogwa bumosho. ³⁹ N'ababaire nibahingura bamulerura nibachundachunda emitwe ⁴⁰ nibagamba bati, “Iwe ayagambiire kukambura Rwensinga okagyombekera ebhiro bisatu, oyerokore! K'orabha oli Mwana wa Ruhanga ruga aha musaraba.” ⁴¹ Kutyo n'abakuhani bakuru hamoi n'ebegesa b'Amateka n'abagurusi bamujaamya nibagamba bati, ⁴² “Akarokora banu wenene yalemwa kwerokora. Niwe Mukama wa Isiraeli; mbwenu aha naruge aha musaraba tumwikilize. ⁴³ Ayesiga Katonda, Katonda n'amurokore k'araba namugonza; manya akagamba okwo aba Mwana wa Katonda!” ⁴⁴ N'abasuga abhabhaire bhabambirwe nawe bamuruulira batyo. ⁴⁵ Kwema aha saa mukaga kuturuka esaa mwenda, ensi yona ebambwa omwilima. ⁴⁶ Zikaba zaija kuba esaa mwenda Yesu ataka n'eiraka lihango ati, “Eli Eli, lama sabakitani?” Nikwo kugir'oti, “katonda wange, Katonda wange, kubhaki wanagirana?” ⁴⁷ Abashangirwe bemeleireho kabahuliire ebyo bagamba bati, “Omuntu ogu nayeta Eliya.” ⁴⁸ Harugwaho omoi ayanguha akwata ekikunjuzo, akiijuza esiki, akitungika aha rubhingo namuha esiki egyo kuginywa. ⁴⁹ chonka abandi bati, “Leka tulebe Eliya nk'araija kumurokora.” ⁵⁰ Yesu ashuba ataka n'eiraka lihango, omwoyo guhwamu. ⁵¹ Orutimbe rwa Rwensinga runyamukamu habili, kwema eiguru kwija ahansi. Ensi etengeeta n'enyazi zatika. ⁵² Enyanga zikinguka, emibili y'abatakatifu ababaire bafire ehimbuuka. ⁵³ Yesu kayabaire yahimbukire abatakatifu abo bataha omu kigo bahabukira abantu bangi. ⁵⁴ Omukuru w'abaisherukare n'abo yabaire ainabo balinzire Yesu, babona omusisi n'ebyabaireho byona. Batina muno, bagamba bati, “Mazima kwo ogu yaba ali Mwana wa Katonda!” ⁵⁵ Honene aho hakaba haliho abakazi bangi nibalebera hara, abahonderaga Yesu kwema Galilaya. ⁵⁶ Omuli bonene abo ni Maria Magadalena, na Maria nyina Yakobo na Yozefu, na nyina Yakobo na Yohana, niwe muka Zebedayo. ⁵⁷ Kabwabaire bwaigoro, omushaija omutungi aruga Arimatea, eibaralye Yozefu, nawe kwakwo akaba ali mwegesibwa wa Yesu. ⁵⁸ Akwata omuhanda agya owa Pilato amushaba omubili gwa Yesu. Pilato aragira kabagumuha. ⁵⁹ Yozefu akwata omubili ogwo aguzinga omu mwendo gwa kitaani nungi, ⁶⁰ aguteeka omu nyanga eye nyabwe, eyo yabaire atemire omu rwazi. Ahilingisa eibare lihango muno alibunza enyanga, agenda. ⁶¹ Maria Magadalena na Maria ondijo bakashangwa baliho, bashuntamire balebire ekabhuri egyo. ⁶² Bukeire bunu, niyo Sabato, abakuhani bakuru n'Abafarisayo bahurulira omwa Pilato. ⁶³ bagamba bati, “Waitu nitwijuka okwo enkurumbuzi elinya yagambire echarora. Ekagamba kuhimbuka aha kiro kya kashatu. ⁶⁴ Orw'echo oragire enyangaye elindwe kuhika aha kiro kya kashatu, abegesibwabe bataija bakamwiba bakashuba bakagambira abantu bati, ‘Ahimbukire omu bafu.’ Echishuba echa nyuma chakuba kibi kusaga echa mbere.” ⁶⁵ Pilato abagambira ati, “imwe mwina abaisherukare ab'okulinda. Mugende mulinde ekabhuri ejo okwo mulikushobora.” ⁶⁶ chityo bagenda, okulinda ekabhuri ejo eibare balikomesa omuhuri, batekaho n'abalinzi.