¹ Sabato eraire ehoiremu, echiro cha mbere ch'eilimansi obwire nibushara emambya, Maria Magadalena na Maria ondijo baimukya kugya kuleba enyanga. ² Habaho omusisi gw'amani; omumalaika w'Omukama aruga omu iguru aija ahilingisa eibare, alishuntamaho. ³ Emisanire akaba nasana orurabhyo, kandi echijwaroche nichera nk'eseruji. ⁴ Abalinzi bamutina, bajugumba, nangu bashusha oti bafa. ⁵ chonka omumalaika agambira abakazi abo ati, “Mutatina aha bhw'okuba nimanya okwo mulikuhiiga Yesu owo babambire. ⁶ Tachili hanu aha yahimbukire nk'okwo yagambire. Rugayo mulebe mbali abaire abyamire. ⁷ Ahonu mugende bwangu mugambire abegesibwa okwo yahimbuka omu bafu, mara leba naija kubebembera kugya Galilaya, niyo muramubonera, nyawe nabagambira.” ⁸ chityo baruga aha nyanga omu bwangu, oku nibatina kandi oku nibashemelerwa, bairuka kuja kugambira abegesibwa. ⁹ Ahanyuma kake Yesu ababuganganwa, abashuura ati, “Muraire mutai!” Bamugoba bamukwata amaguru bamufukamira. ¹⁰ Aho Yesu abagambira ati, “Mutatina. Mugende mugambire barumuna bange bagende Galilaya, niyo barambonera.” ¹¹ Obhwo babaire nibagenda, abalinzi abandi bataha omu kigo babarulira abakuhani bakuru byona ebyabaho. ¹² Abakuhani bakuru kabamazire kuterana n'abagurusi bakatensa, bakwata empiha baziha abaisherukare ¹³ nibabagambira bati, “Mugambire embaga muti, ‘Abegesibwabe baizire omu chiro tunagiire bamwiba bamutwara.’ ¹⁴ Ka gavana arahulira amakuru aga ichwe turamugwisiliza tubajune orushengo.” ¹⁵ chityo batwara empiha mara bakora nk'okwo abakuhani bakuru babaragilira. Echigambo eki kikaranda omuli Bayahudi kuhika kir'eki. ¹⁶ Ahanyuma abegesibwa eikumi n'omoi bagya Galilaya aha ibanga mbali Yesu yabaire abaragiliire. ¹⁷ Obhwo bamuboine bamufukamira. Chonka abandi bhasanisa. ¹⁸ Yesu aija abagambira ati, “Mpairwe obushobora bwona omw'iguru n'omu nsi. ¹⁹ Aha bbhw'echo mugende amahanga gona mugahindure begesibwa bange, nimubabatiza omw'ibara lya Tata n'Omwana n'Omwoyo Mutakatifu. ²⁰ Mubegese kwekomya byona ebyo nabahangiire. Kandi ndi hamo na imwe ebhiro byona kugoba aha maheleruka.”