¹ “Omu bir'ebhyo obukama bw'omw'iguru bulilengwa aha baisiki ikumi abakwete etara zabo kuja kuchwekera kishwera n'omugore. ² Omuli abo, abatanu bakaba bali bafera, kandi abatanu abasigaire bali bagezi. ³ Abafera kabatwete etara tibatwete majuta. ⁴ chonka abagezi bakatwara etara hamoi n'echupa z'amajuta. ⁵ Kishwera aja achelererwa, aho bona bhasomba balemwa banagira. ⁶ Omu chiro eitumbi habaho omuranga bati, ‘Omutono, kishwera yaija! Muturuke mumwakiilire.' ⁷ Aho abaisiki abo bona baimuka bahemba etara zabo. ⁸ Abafera bagambira abagezi bati, ‘Mutuheho otujuta, etara zaitu zatwalilirwa kuraara.’ ⁹ Nawe abagezi bahorora bati, ‘Haliho obhwo gatakutumara ichwe na inywe; hakili mugye omu batunzi mwegulire aganyu.’ ¹⁰ “Kababaire bagenzire kugura amajuta ago, kishwera aija, aho abashangirwe baliho bataaha nawe omu nju bakora obugenyi bw'obushwere; n'orwigi rukomwa. ¹¹ Ahanyuma n'abaisiki abandi kwakwo baija nibagamba bati, ‘Rugaba, mukama tuchingulire.’ ¹² chonka wenene ahorora ati, ‘Mbagambiire amazima, nyawe tindikubamanya.’ ¹³ Ahonu mwikare muzoire amaisho, ensonga timulikumanya chiro na saa. ¹⁴ “Kandi obukama bw'omw'iguru nibushusha omuntu ayaizire kugya omu tabaro, aketa abairube akasiga yabakwasa ebye. ¹⁵ Omo yamuha etalenta itano, ondijo yamuha ibili n'ondijo yamuha emoi; buli omo yamuha kuhondera obushoborabwe. Akwata omuhanda agenda. ¹⁶ Ayahairwe etalenta itanu ayanguhya agya azitunduurana, aihyamu etalenta ezindi itano. ¹⁷ chityo n'ayaboine ibili aihamu ezindi ibili. ¹⁸ chonka ayaboine emo, aija alima akaina omw'itaka ashelekamu etalenta ya mukamawe. ¹⁹ Eibanga lyahingwire lirengwa mukama w'abhairu abho aija, ayema nabo kubhara empiha ezo yabaire abasigiire. ²⁰ Ayabaire ahairwe etalenta itanu aija aleterana n'ezindi itanu, nagamba ati, ‘Mukama wange okampa etalenta itanu, leba ezindi itanu ezo nyihiremu.’ ²¹ Mukamawe amugambira ati, ‘Kazare mwiru muge mara mwesigwa; obaire mwesigwa aha bike, ndakukwasa bingi ebishagireho; ija oshemelerwe na mukama wawe.’ ²² N'ayabaire aboine etalenta ibili aija nagambira mukamawe ati, ‘Rugaba, okampa etalenta ibili, leba nyihiremu etalenta ezindi ibili.’ ²³ Mukamawe amugambira ati, ‘Kazare mwiru muge mara mwesigwa; obaire mwesigwa aha bike, ndakukwasa bingi ebishagireho; ija oshemelerwe na mukama wawe.' ²⁴ N'ayabaire aboine etalenta emoi aija nagamba ati, ‘Rugaba, nkamanya okw'oba muyebe, ogesha mbali otabibire, oyanura eby'otayanikire. ²⁵ chityo nyawe nkatina, nagenda nasheleka etalenta yawe omw'itaka. Leba ebyawe niby'ebi.’ ²⁶ Mukamawe amuhorora ati, ‘Iwe mwiru mubi omunafu! Okamanya okwo ngesha mbali ntabibire, nyanura mbali ntayanikiire? ²⁷ Ahonu etalenta yange wakugitwete omu benki, aho kanakwizire nakuboine ebili byange hamoi n'amagoba. ²⁸ chityo etalenta gimwake, mugihe ow'etalenta 10. ²⁹ Buli omo aliba ain'ake niwe alyongerwaho ebishagireho, atunge aganagane. Kandi atainake, n'ako aliba ainako balikamwaka. ³⁰ Omwiru ogu ataina mugasho mumunage aheru omu mwilima; omu mwilima ogwo nimwo abantu barachuliraga bakanena n'amaino.’ ³¹ “Obhwo Omwana w'Omuntu alija omu kitinwakye aina abamalaikabe bona, aho alisingira aha nketo ey'ekitinwa. ³² Amahanga gona baligashoroza bagalete omu maishoge, abhataishurane nk'okwo omushumba ataishurana entaama n'embuzi. ³³ Entaama aliziteka omukonogwe gwa bhulyo, kandi embuzi aliziteka obumosho. ³⁴ Aho Omukama aligambira abaliba bali obulyobwe ati, ‘Ija inywe abo Tata yahaire omugisha, mulye obukama obwo mwatekatekeirwe kwema ensi etonzirwe. ³⁵ Nobona nkaba nyina enjara mwampa ekyakulya, nkaba nyina eiliho mwampa eky'okunywa, nkaba ndi omu rugendo mwampa oburaro; ³⁶ nkaba ndi bhusa mwanjweka, nkaba ndwaire mwaija kundeba, nkaba ndi omu kifungo mwaija mwandeba.’ ³⁷ Nibhwo abagorogoki balimuhorora bati, ‘Mukama, tukakubona maki oina enjara tukakugabira, anga oin'eiliho tukakuha ech'okunywa? ³⁸ Isi ni maki obhwo twakuboine oli omu rugendo tukakuha obhuraro, anga oli bhusa tukakujweka? ³⁹ Tukakubona maki orwaire anga oli omu kifungo tukaija kukulebha?’ ⁴⁰ Omukama alibahorora ati, ‘Nimbagambira amazima, ebyo mwakoleire omoiho omuli barumuna bange abato muno, mukabikolera nyawe.’ ⁴¹ Ahanyuma aligambira abaliba bamuli obhumosho ati, ‘Mundugeho inywe abaraamwa, mugende omu muliro ogutalihwaho ogwo Sitani yahembeirwe hamo n'abamalaikabe. ⁴² Ahakuba nkaba nyina enjara timwampaire chakulya, nkaba nyina eiliho timwampaire chakunywa; ⁴³ nkaba ndi omu rugendo timwampaire bhuraro, nkaba ndi bhusa timwanjwekire, narwara, mara nagya omu kifungo timwandebire.’ ⁴⁴ Nabhonene bhalihorora bati, ‘Mukama, tukakubona maki oina enjara anga oin'eiliho, anga oli omu rugendo, anga oli bhusa, anga orwaire anga oli omu kifungo tukaburwa kukujuna?’ ⁴⁵ Alibashubamu ati, ‘Nimbagambira amazima, orwo mutakoleire n'omoi omu bato aba, timwakoleire nyawe.’ ⁴⁶ Abo balibona ekibonabonyio eky'eirai lyona, chonka abagorogoki balibona obhurora obhutalihwaho."