¹ Yesu akagambira embaga n'abegesibwabe ati, ² “Abegesa b'Amateka n'Abafarisayo nibaitoitora Amateka ga Musa. ³ chityo bhyona bhyona ebhyo balikubagambira mubikore kandi mubyekomye, chonka mutalikora nk'okwo bonene bakora. ⁴ Bakoma emigugu esikiire etakutwarwa muntu, bagitweka abantu aha mabega. Chonka bonene tibakugisimbuza rukumu. ⁵ Ebyo bakora byona babikora abantu kabababona. Efilakiteri zabo bakora ezihango, baraihisa n'obushuusha bw'ebebo zabo. ⁶ n'aha magenyi bagonza emyanya ey'ekitinwa, n'omu sinagogi balebamu entebe ezirungi muno. ⁷ Benda okuramibwa omu katare, kandi bashemelerwa abhantu kabhabheta ‘Rabi.’ ⁸ chonka inywe mutagonza kwetwa ‘Rabhi,’ aha bhw'okubha mugira omwegesa omo, mara imwe mwena muli barumuna. ⁹ Kandi omu nsi omu mutalyeta muntu ‘Isheinywe,’ ensonga mugira Iseinywe omo asingiire omw'iguru. ¹⁰ Nangu n'okwetwa ‘Bakama,’ che, manya Omukama mugir'omoi niwe Kirisito. ¹¹ Omukuru muno omuli inywe arabaga mukozi wanyu. ¹² Arayekuza aratohibhwa, kandi arayetohya arakuzibhwa.” ¹³ “chonka mulibona inywe begesa b'Amateka n'Abafarisayo engobya! Kuba nimutanga abantu kutaha omu bukama bw'omw'iguru; inywe timwafa gabutaahamu, kandi n'abalikugonza kubutaahamu nimubatanga. ¹⁴ (Mulibona inywe begesa b'Amateka n'Abafarisayo engobya; nimunyaga entumbwa amaju gabo, oku nimuzoka nimushoma enshara ezirazira. Chityo n'eiramu muliramurwa elishagireho). ¹⁵ Nimwija kukagwamu inywe begesa b'Amateka n'Abafarisayo engobya! Mushaabuka enyanja, mugenda n'omu mahanga kuhindura omuntu omo k'ahondera edini yanyu, kandi kamumukwasa mumuhindura omufakare ow'kuragirwa kunagwa omu muliro ogutalihwaho.” ¹⁶ “Mulibona inywe abebembezi empume. Nimugira muti, ‘K'omuntu alinahira najuliza Rwensinga, echo ti chigambo; chonka omuntu kurahira najuliza ezahabu ya Rwensinga, aho ekinahiro naragirwa kukigobesheleza.’ ¹⁷ Imwe bafano empume! Ekilikukira obukuru ni chiha, ezahabu, anga Rwensinga elikuhindura ezahabu k'eba ntakatifu? ¹⁸ Nimushuba nimugira muti: ‘Omuntu kurahira najuliza alutare ti kantu; chonka kurahira akajuliza echihongo echili ahali alutare, aho echirahiro naragirwa kuchigobesheleza.’ ¹⁹ Imwe baigazi b'amaisho! Ekilikukira obukuru ni kihai, echhongo anga alutare elikuhindura echihongo kakiba kitakatifu? ²⁰ chityo ayakanahira najuliza alutare, aba najuliza na bhuli kamo kona akagiliho. ²¹ N'ayakanahira najuliza Rwensinga, aba najuliza olinya agisingiiremu. ²² Ayakanahira najuliza eiguru, anahira najuliza enketo ya Ruhanga, na Ruhanga wenene asingiire aha nketo yonene ejo.” ²³ “Mulibona inywe begesa b'Amateka n'Abafarisayo engobya! Nimugira ekichweka cha ikumi ech'omudarasini, n'eiriki n'ebinzari, kyonkai ebisikiire kushagaho eby'Amateka galikuragira ebhyo nimubyehurubasa: Amazima n'obuganyizi n'okwikiliza Katonda. Ebhi nibhyo mwakubaire nimukora, chonka n'ebisigaire mutabyehurubasize. ²⁴ Imwe bebembezi empume imwe! Nimukenena edivai etagenderanamu na mubwi, chonka engamia nimugimira yona!” ²⁵ “Mulibhona imwe begesa b'Amateka n'Abafarisayo engobya! Echikompe n'esahani nimubyoja aheru bhusa, kandi omunda yabhyo mwijwizemu ebyo mulikunyaga bhanu n'ebhyo mulikwima abandi. ²⁶ Iwe Mufarisayo empume! Obanze oyogye omunda ekikompe n'esahani, nirwo biraija bikera aheru.” ²⁷ “Mulibona inywe begesa b'Amateka n'Abafarisayo engobya! Nimushusha ebituro ebisiigire einoni, aheru nibizoka bili birungi, chonka omunda bijwire amagufa g'abafu n'obujunde obhwa nyakajunde. ²⁸ Nikwo aheru mulikuzoka muli bantu abagorogoki, chonka omunda mwijwire obhugobya n'amafu.” ²⁹ “Mulibona imwe bhegesa b'Amateka n'Abafarisayo engobya! Nimwombeka ebhituro by'abarangi n'okulengya obwijukiro bhw'abagorogoki, ³⁰ mukwese, ‘Kubha twabaire tuli omu makiro ga batat'enkurw'ichwe titwakwemire nabho kwita barangi.’ ³¹ Aho nimuba nimwegamba okwo muli baana ba bhalinya abaisire abharangi. ³² Mbwenunu aho mugendelere, echo bashw'enkurw'inywe basigire babandize inywe mukigobesheleze. ³³ Imwe njoka imwe, enjoka nyakabhara; omuliro ogutalihwaho muliguhungaho muta mutaramwirwe kugugwamu! ³⁴ Obhw'echo kambatwekere abarangi n'abamanyi n'abegesa b'Amateka, abandi mubhaite, mubabambe; abandi mubatelere omu sinagogi zanyu, mushube mubabumbwije nibaruga kigo echi nimubahondera omu kindi, ³⁵ nimuhiga kurumbirwa obwamba bw'abagorogoki bona abaraisirwe omu nsi, kubandiza aha bwamba bwa Abeli nyakatetere kugoba aha bwa Zekaria eya Barakia, owo mwaitiire omugati ya alutare n'ahatakatifu. ³⁶ Nimbagambira amazima, ebi byona nibija kuba aha muzarwa ogu.” ³⁷ “Yerusalemu, Yerusalemu! Iwe aita abarangi n'entumwa ezo bakutumaho okaziteza amabare! Mirundi nyingi eta eyo nakugondize iwe n'abaana bawe kubateka hamoi nk'okwo enkoko eteka hamoi obwana bwayo omu mapapa gaayo, chonka iwe tiwakukunda! ³⁸ Lebha enju yawe yabha kifurukwa, yanuka omushaka. ³⁹ Kankugambire amazima, tokimbona rundi kuhika obhwo oligamba oti, ‘Ni kilimugisha ogwo alikwija omw'ibara ly'Omukama.’”