¹ Yesu yashuba yabagambira omu nfumo ati, ² “Ohbukama bw'omw'iguru bwakulengerwa aha mukama ayakoleire omutabani obugenyi bw'obushwere. ³ Yatuma abairube kweta ababaire baraliziibwe aha bugenyi obwo; chonka tibaizire. ⁴ Ashuba atuma abairu abandi nagamba ati, ‘Mugambire abaralizibwa okwo nachumbire enyungu zange z'omuraagiro, nyisire enumi n'enyana zange z'eshajwa, natekatekire buli kantu; mwije aha bugenyi bw'obushwere." ⁵ chonka abharalizibwa ebyo tibabitaireho mutima, bakwata omuhanda bagenda. Ogu aja omu ndimiroye, ondijo agya kwekolera ebye, ⁶ kandi abandi bakwata abairube babajangura, babaita. ⁷ Omukama anigara, atweka abaisherukarebe basilikya abamwitiire abairube n'ekigo chabho bakitaho omuliro. ⁸ Ashuba agambira abairube ati, ‘Esaa y'obugenyi yagobire, chonka ababaire baraliziibwe babaire batasaine. ⁹ Aha bhw'echo mugye omu mihanda etaana mulete abo murabona bona aha bugenyi.’ ¹⁰ Abairu abo bhagenda omu chigo omu mbarabara basoroza abo bagwiremu, n'abarungi n'abhabhi; echumba ch'obugenyi chijura abhagenyi. ¹¹ “chonka omukama naija kuleba abagenyi abonamu omuntu ataina chijwaro cha bugenyi. ¹² Amubaza ati, ‘Mutahi wange, omu waijamu ota otaina chijwaro cha bugenyi?’ Ogu aburwa ech'okugamba. ¹³ Omukama agambira abakozi b'obugenyi ati, ‘Mumubohe emikono n'amaguru, mumunage aheru omu mwilima; okwo niyo abhantu barachuliraga bakanena n'amaino.’ ¹⁴ Manyasi betwa bangi, chonka abharondwamu bake.” ¹⁵ Abafarisayo bagenda batensa kukwatira Yesu omu migambire. ¹⁶ Bamutwekera abegesibwa babo, hamo n'ab'omuteko gwa Herode, nibagamba bati, “Mwegesa, nitukumanya okwo oba w'amazima, n'emihango ya Katonda ojegesa kabutekire, eby'abantu tobifaho. Echitiinwa ch'abantu tokyetaho. ¹⁷ Mbwenu otugambire okw'olikutekeleza. Chisaine kusolera Kaisari omushoro anga chei?” ¹⁸ Yesu ashangwa namanya okwo baina omutima gubhi, abaza ati, “Nimundengeraki? ¹⁹ Nyoleka amahera ago mushora omushoro.” Bamuletera edinari. ²⁰ Yesu ababaza ati, “Echisusane eki n'echihandiiko echi bhy'oha?” ²¹ Bahorora bati, “Bhya Kaisari.” Aho Yesu abagambira ati, “Obhw'echo ebhili bhya Kaisari mubihe Kaisari, n'ebili bya Katonda mubihe Katonda.” ²² Kabamazire kuhulira echo bhatangara; bhamurugaho bhagenda. ²³ chiro chonene echo Abasadukayo abagamba okwo okuhimbuka kutabayo, bamugoba. Bamubaza ²⁴ bati, “Mwegesa, Musa akagamba ati, ‘K'omuntu arafaga ataina mwana, omurumuna naragirwa ashwere muka kifa, azalire omurumuna abaana.’ ²⁵ Mbwenu hakaba haliho abantu mushanju bali barumuna. Owa mbere ashwera, afa buchweke, omukazi amuhangiira murumuna. ²⁶ Kutyo n'owa kabili n'owa kasatu kugoba aha wa mushanju. ²⁷ Aha nzindo ya bhona omukazi afa. ²⁸ Mbwenu omu kuhimbuka, omu musanju ogwo aliba mukazi w'oha? Kuba bakaba bamushweire bona.” ²⁹ Nawe Yesu abhahorora ati, “Mwahaba. N'ebihandiko bitakatifu na mani ga Katonda, taliho cho mulikumanya. ³⁰ Aha rw'ensonga aha kuhimbuka talibaho kushwera anga kushwerwa. Abantu balisana abamalaika bha Katonda omw'iguru. ³¹ Kandi ebikwete aha kuhimbuka kw'abafu timukashomaga ebhyo Katonda yabagambiire ati, ³² ‘Ndi Katonda wa Aburahamu, ndi Katonda wa Isaka, ndi Katonda wa Yakobo?’ ” “Tabha Katonda wa bhafu, abha Katonda w'abharora.” ³³ Embaga kuhulira echo egwa omu chitangaro aha bhw'emyegeshezeye. ³⁴ chonka Abafarisayo kabahuliire okwo Abasadukayo yabamara ebhigambo, bahurura. ³⁵ Harugwamu omo amubaza kumulenga ati, ³⁶ “Mwegesa, omu Mateka omuhango ogukuru guba guha?” ³⁷ Yesu amuhorora ati, “oyende Omukama Katonda wawe n'omutima gwawe gwona, n'omwoyo gwawe gwona, n'amagezi gawe gona. ³⁸ Ogu nigwo gubha muhango gukuru mara gubha gwa mbere. ³⁹ N'ogwa kabhili nigusana: Oyende mutahi wawe nk'okwo olikweyenda. ⁴⁰ Emihango eji yona ebhili nigo mani g'Amateka n'eby'abarangi bagambire.” ⁴¹ Abhafarisayo bachali hamo, Yesu ababaza echigambo ati, ⁴² “Kirisito nimumulenga muta? Aba mutabhani w'oha?” Bamugambira bhati, “Abha mutabhani wa Daudi.” ⁴³ Yesu abagambira ati, “Ahosi nibhigenda bita? Nka Daudi Mwoyo Mutakatifu namugambira aha mutwe namweta ‘Mukama wange,’ nagamba ati, ⁴⁴ ‘Omukama akagambira Mukama wange, ati: Shuntama aha bulyo bwange, kugobha orwo ndikunaga ababisha bawe omu maguru."'?" ⁴⁵ Ka Daudi araba namweta myetere egi ati, ‘Mukama,’ aho yabha ata mutabhani wa Daudi?” ⁴⁶ Taliho n'omo ayashoboire kumuhorora echigambo, kandi kuruga chir'echo taliho n'omo ayasubhire kumubhaza rundi.