¹ Obhukama bw'omw'iguru nibusana bhuti: Nyin'enju akaturuka omu bhwancha kwinika abhakozi omu omu ndimiroye y'emizabibu. ² Kayamazire kwikilijanyia n'abakozi abo okwo omusana gumo arabhaha edinari emo, yabagambira kuja omu ndimiro y'emizabibu. ³ Kayajiire kuturuka aheru omu saa isatu za bwancha, abhona abantu abhandi nibhabhunga bhusa omu katare. ⁴ Na bhonene abagambira ati, ‘Naimwe mugende omu ndimiro yange y'emizabibu, mara ndabasashura ehaki yanyu.’ Bagenda. ⁵ Nashuba kuturuka zili nk'esaa mukaga n'omu saa mwenda, akora atyo nk'orwesaa isatu. ⁶ Omu saa nka ikumi n'emo naturuka abona abhemeleire bhusa, abhabhaza ati, ‘Kubachi mwemeleire aha bhusa omusana gwona?’ ⁷ Bhamuhorora bhati, ‘Taliho yatuha mulimo!’ Abhagambira ati, ‘Na imwe mugende omu ndimiro yange y'emizabibu.’ ⁸ Eizobha kutobera, mukama w'endimiro y'emizabibu agambira omukozawe w'emilimo ati, ‘Yeta abhakozi obhahe emperwa yabo, obandize aha b'enzindo oturuke aha ba mbere.’ ⁹ Balinya ababaire bainikirwe aha saa ikumi n'emo kabaizire, buli omo ahabwa edinari emo. ¹⁰ Ababaire bainikirwe bali ba mbere kabaizire bashangwa nibategera kubona ebisagireho; chonkai buli omo nawe ahabhwa edinari emo. ¹¹ Kabamazire kubhona edinari emo bhayeboroboitera nyin'enju ¹² bhati, ‘Ab'enzindo abha bhakora esaa emo yonka, mbwenu iwe wabaiganisa naeitwe abasiibire nitufa nitwosha, omushana nigwija kutwita.’ ¹³ Wenene aihyamu omo amuhorora ati, ‘Mutahi wange, echo nakusobhya tikiliho; tiwaikiliza okwo ndakuha edinari? ¹⁴ Kwata ebhyawe ogende; nyawe nagonza ogu ow'enzindo kumusasura nk'okwu nasasura iwe. ¹⁵ Nintangwa kukoza ebyange okwo ndikwenda? Isi nondwanisa kuntura obufura bwange?’ ¹⁶ chityo ow'enzindo aliba wa mbere n'owa mbere aliba w'enzindo” ¹⁷ Yesu kayabaire naja Yerusalemu akwata abegesibwabe 12 abegobya haihi, aho obhwo babaire nibagenda abagambira ati, ¹⁸ “Muralebha aha nituja Yerusalemu; Omwana w'Omuntu nibhaija kumunaga omu mikono y'abhakuhani bhakuru n'abegesa b'Amateka bhamuramure kumwita. ¹⁹ Nibhwo na bhonene bharamunaga omu mikono y'abanyamahanga bhakamujerega n'okumutera, bhashubhe bamubambe. Chonka wenene aha chiro cha kasatu arahimbuka.” ²⁰ Muka Zebedayo aija n'abatabani bombili ahali Yesu, amubandama omu maiso ajira echo yamusabha. ²¹ Yesu amubaza ati, “Noyendaki?” Amuhorora ati, “Hanga, batabani bange omu ngoma yawe omo akushluntame obulyo n'ondijo obumosho.” ²² Yesu ahorora ati, “Echo mulikushaba timulikukimanya. Echikompe ky'obusasi echo ndikwija kunywa mwakukinywa?” Bamushubamu bati, “Twakuchinywa.” ²³ Abagambira ati, “Mwakunywa ekikompe change, chonka inye tinakushobora kubashuntamya aha bulyo bwange anga aha bumosho. Echo chisaine balinya abo Tata yakitekatekeire.” ²⁴ Abhegesibhwa 10 kabahuliire ekigambo echo, banigalira abarumuna ababili. ²⁵ Nawe Yesu abeta abagambira ati, “Nimumanya okwo abakama b'abanyamahanga abatwarwa babo babatwaza eirangira, n'abakuru babo babatwaza amani. ²⁶ Omuli inywe chitaliba chityo. Aligonza kuba mukuru omuli inywe abe mukozi wanyu. ²⁷ Kandi aligonza kuba wa mbere omuli inywe abe mwiru wanyu. ²⁸ Nk'okwo Omwana w'Omuntu ataizire kukolerwa shana kukolera banu, kweyanga oburorabwe kuchungura abantu bangi, bibe nikwo biba bityo.” ²⁹ Orwo babaire nibaruga Yeriko, embaga nyingi emuhondera. ³⁰ Leba empume ibili zikashangwa zishuntamire aha muhanda. Kabahuliire okwo Yesu alikwija narabaho, bataka bati, “Waitu Mukama, Mwana wa Daudi batuganyire!” ³¹ Embaga ebarotokera nebasiza. Chonka bhonene bataka bashagaho, bati, “Waitu Mukama, Mwana wa Daudi batuganyire.” ³² Yesu ayemelera, abeta ababaza ati, “Nimwenda kambakolerachi?” ³³ Bamuhorora bati, “Waitu Mukama, singa tuhumuruguke amaisho.” ³⁴ Yesu abaganyibwa, abakwata aha maisho, ekigambo echo n'ira bhabhona mara bamuhondera.