¹ Omu bhiro ebhyo Yesu akashangwa naraba omu misiri y'engano aha chiro cha Sabato. Abegesibwabe barumwa enjara, aho babanza kugutura ebhikumba bhy'engano bhabilya. ² Abhafarisayo kubon'echo, bhamugambira bhati, “Olebhe, abegesibwa bawe nibhakora ekilikutangwa kukora ahali Sabato” ³ Wenene abagambira ati, “Imwe timukasomaga echo Daudi yakozire obhwo yarumirwe enjara, n'abo yabaire ainabo: ⁴ okwo yatahire Rwensinga ya Katonda a akalya Omukate gw'Obusinge bwa Katonda, ogwo wenene n'abo yabhaire ainabho ababaire batalikujuburwa kulya, sana abakuhani bonka? ⁵ Anga timukasomaga omu Mateka okwo ahali Sabato abakuhani kababha bhali Rwensinga bhahagaza Sabato, mara bhatafakaire? ⁶ Kambagambirenu, aha haliho alikukira Rwensinga ejo. ⁷ Kubha nimumanya ensonga y'echigambo echi, ‘Tinkwenda chitambo, n'inyenda obhuganyizi,’ timwakuramwire bhataina ntambara. ⁸ Aha bhw'enshonga Omwana w'Omuntu niwe abha mukama wa Sabato.” ⁹ Yesu arugayo, ataha omu sinagogi yabho. ¹⁰ Omwo hakaba alimu omuntu akabire omukono. Bhamubaza bhati, “Nikijubhurwa kuchiza omuntu ahali Sabato?” Aho bagendeleire kwija kumutoijera. ¹¹ abhabhaza ati, “N'oha omuli imwe ayakubha aina entaama, k'entaama ejo yakugwa omu china ahali Sabato, atakujikwata akajihyamu? ¹² Omuntu taina nsonga mpango kusaga ntaama? Chityo okukora kurungi ahali Sabato nikijubhurwa.” ¹³ Amara agambira omuntu ogwo ati, “Gorora omukono gwawe.” Omusaija agorora omukonogwe ogwo, guchira, guguma nk'ogundi. ¹⁴ chonka Abhafarisayo bhaturuka bhamugyera omu chama, bhategeka okwo bharamwita. ¹⁵ Yesu kayabhimanyire arugayo. Abhantu bhangi bhamuhondera, mara abhakiza bhona, ¹⁶ chonka abharagira bhatamuranga. ¹⁷ Echo kikabhaho kugobesheleza echagambirwe Omurangi Isaya ati, ¹⁸ “Lebha omwiru wange owo ndonkire, omugonzibwa wange ansemelera. Ndamuteka Mwoyo wange aha mutwe, amanyise abhanyamahanga amazima. ¹⁹ Talikungana anga kwomba, nangu n'omuntu kuhulira eirakalye omu mbarabhara y'echigo! ²⁰ Talihenda rubhingo orwinamire, n'orutambi rulikwaka ekisiliira taliruraza, kuhika orwo alisinga aha bhw'okubha muhikiilire; ²¹ kandi Abhanyamahanga bhalimushuubhira. ²² Kandi bamuletera empume mara omuteta ayabhaire aina sitani, amukiza, omutita agamba mara abhona. ²³ Abantu bona batangara mara bagamba bati, “Ogu yakubha mwana wa Daudi?” ²⁴ Chonka Abhafarisayo kabhabhihuliire bhagamba bati, “Omuntu ogu amasitani nagabhingisa amani ga Belizebuli, mukama wago.” ²⁵ Yesu obhwo yamanyire ebitekelezo bhyabo abhagambira ati, “Bhuli ngoma k'ebeganuka yonene yonka esiliika. Kandi taliho chigo anga nju ebheganuka ekasubha ekemelera. ²⁶ Na Sitani k'abinga Sitani, wenene wenka abha abheganukire. Mbwenu aho engomaye yakuguma eta ²⁷ K'amasitani ndaba ningabingisa amani ga Belizebuli, aho imwe bhanyu abhegesibwa nibhagabingisa amani g'oha? Aha bhw'echo bhanyu nibho abjegesibwa bharabharamura. ²⁸ chonka k'amasitani ndabha ningabingisa Mwoyo wa Katonda, aho lero obhukama bhwa Katonda bhwabhagobire. ²⁹ Angasi omuntu yakutaha ata omw'Omuntu ow'amani akamunyaga ebhye atabhandize kuboha ow'amani ogwo akabha nibhwo ekabhuri enjuye? ³⁰ Atali hamo nanye ogwo Ari rubhaju orundi, kandi atasombocha nanye anaganaga. ³¹ Aha bhw'echo mbagambire, abhantu bhalifakara n'okurogota bharogote mara bhagarulirwe, chonka alirogota ahali Mwoyo Mutakatifu ogwo taligarulirwa. ³² N'omuntu alirogota aha Mwana w'Omuntu aligarulirwa, chonka alirogota ahali Mwoyo Mutakatifu taligarulirwa, na mu nsi na mw'iguru ³³ “K'ogonza ebhirabha bhirungi, ohiige omuti ogurungi; anga ogonze ebhirabha bhibhi, ohiige omuti ogubhi. Omuti gumanyikira aha bhiraba bhyagwo. ³⁴ Imwe ruzaro rw'enjoka! Mwakugamba muta ebirungi okwo muli babi? Manya ebijwire aha mutima nibyo akanwa kagamba. ³⁵ Omuntu omurungi omw'itungalye elirungi aihyamu ebhirungi. Kandi omuntu omubhi omw'itungalye elibhi aihyamu ebhibhi. ³⁶ Mbagambiire, aha chiro ch'eiramu bhuli bhantu bhalyetonda bhuli kigambo kibhi echo bhalikugamba. ³⁷ Ebhigambo ebhy'ogamba nibyo bilikuhindura mugorogoki mara balikuramulira aha bigambo byawe.” ³⁸ Abhegesa bh'Amateka abhandi nh'Abafarisayo bagambira Yesu bhati, “Mwegesa, nitwenda okore akabhonero.” ³⁹ chonka abahorora ati, “Oruzaro rubhi oru nirwenda akabhonero; tigulikwija kuhabwa kabhonero, shana akabhonero ak'omurangi Yona. ⁴⁰ Nk'okwo Yona yamazire ebhiro bisatu n'emisana yaho omu nfuru emumizire, nikwo n'Omwana w'Omuntu alimara ebhiro bhisatu n'emishana yaho omu kabhuri. ⁴¹ Abhantu bha Ninive bhaliimukira chimo na imwe bhabhatoijere aha chiro ch'eiramu, kubha bonene obhwo Yona yabarangiire bhakechuza, kandi haliho omuhango kusaga Yona. ⁴² Omukamakazi wa Seba aha chiro ch'eiramu aliimuchira chimo na imwe abhatoijere, aha rw'ensonga akaruga hare muno kwehulilira obhumanyi bhwa Solomoni, mara aha haliho omuhango kusaga Solomoni. ⁴³ “Obhwo Sitani aruga omu muntu arabha mbali amaizi gatali nahiga obhwikaro, nawe tabhubhona. ⁴⁴ Aho agamba ati, ‘Ndasubha omwange mbali naba ndugire.’ Mara obhwo aija asanga enjuye eli busai, eyeleleire mara bhuli kantu kali omu mwanya gwako. ⁴⁵ Nibhwo agenda akaleta amasitani agandi mushanju agabhi kumusaga, gatahamu gatur'omwo. Omuntu ogwo okwo yabha ali elya nyuma abja mubhi kusaga okwo abhaire ali obhwa mbere. Nikwo n'oruzaro rubhi oru rulibha.” ⁴⁶ Yesu kayabhaire aliho nafumolera abhantu, lebha nyina n'abarumuna bemelera aheru, nibhasabha kufumora nawe. ⁴⁷ Aho omuntu omo amugambira ati, “Lebha nyoko na bharumuna bhawe bhemeleire aheru, nibhenda kufumora naiwe.” ⁴⁸ Chonka wenene ahorora ayamumanyisa ati, “Mawe n'oha na bharumuna bhange ni bhahi?” ⁴⁹ Aimucha omukono agwolekeize abhegesibhwabhe, agamba ati, “Mawe na bharumuna bange nibh'abha! ⁵⁰ Ahakubha wena wena akora echo Tata asingiire omw'iguru alikwenda niwe murumuna wange, niwe munyanyazi, niwe mawe.”