¹ Obhwo Yesu yamazire kwegesa abhegesibhwabhe 12, yarugayo, yaja kwegesa n'okuranga omu bhigo bhyabho. ² Yohana kayayemire jela akahulira okwo Yesu yabhaire nakora, yatuma abhegesibhwabhe. ³ namubhaza ati, “N'iwe ogwo ali w'okwija, anga tutegeleze ondijo?” ⁴ Yesu abhahorora ati, “Mugende mugambire Yohana ebhyo mulikubhona n'ebhyo mulikuhulira kaanya aka: ⁵ empume nizihumuruguka, abhalema nibhatambuka, abhabhembe nibezibjwa, n'abhatakuhurira nibhahulira, abhafu nibhahimbuuka kandi n'abhanaku nibhatonwa evangeli. ⁶ Kandi mubherwa atalikundengeshanyia. ⁷ Kabhagenzire, Yesu abhanza kufumolera embaga ahali Yohana ati, “Omw'irungu mubhaire mugire kulebhayochi? Orubhingo orulikuchundwa omuyaga? ⁸ Mutweirweyoki? Kubhona omuntu ajweirwe emyendo elikutelera? Lebja, abhajwete emyendo elikutelera bhali omu maju g'abhakama. ⁹ Ahosi mubhaire mutweireyoki? Kubhona omurangi? Ego, kambagambire, nangu akusagaho omurangi. ¹⁰ Ogu niwe yahandikirweho ati, ‘Lebha natuma entumwa yange ekwebhembhere, niwe arakusemeleza omuhanda otakaizire. ¹¹ “Nimbagambira amazima, omu bhantu bhona abhakazairwe abhakazi takazokwagamu ow'okukira Yohana Omubhatiza; chonka kandi arabha ali muke bwoli omu bukama bhw'omw'iguru ogwo nasaga Yohana Omubhatiza. ¹² Kwema omu bhiro bhya Yohana Omubhatiza kugobha mwaha obhukama bhw'omw'iguru bhugumire muno, n'abhalikurasana nibhabhutahamu rwamani. ¹³ Abharangi bhona n'Amateka bhakaranga kugobha ahali Yohana. ¹⁴ Kamurabha nimwikiliza echigambo echi, Yohana niwe Eliya aragiirwe kwija. ¹⁵ Aina amatu g'okuhulira ahulire.” ¹⁶ “Oruzaro oru ndusanise nachi? Nirusana abhaana abhasuntamire omumujajaro nibheta abhazani bataahi bhabho bhati, ¹⁷ ‘Twabhatelera emilere, timwahoya, twatonja, timwachura.’ ¹⁸ “Yohana akaija atalikulya anga kunywa, bhagamba bhati, ‘Aine sitani.’ ¹⁹ Omwana w'Omuntu yaija nalya, nanywa, bhagamba bhati, ‘Lebha ogu aine omururu, ntamiizi, mutahi w'abasoza n'abhafakare!’ chonka amazima g'obhumanyi gamanyikira aha bhikorwa bhyabhwo.” ²⁰ Aho Yesu abhanza kwatikiraho ebjigo ebhyo yabhaire akoleiremu ebhikorwa bhy'amani, kubha tibhayechulize, ati, ²¹ “Olibhona iwe Korazini! Olibhona iwe Betisaida! Kubha ebjikorwa bhy'amani ebhikoleirwe omuli imwe kubha bhibheire bhikoleirwe omuli Tiro na Sidoni, bhakubhaire bhajweire ebhigunia, bhayesiigire n'eijwu, bhayechulize. ²² chonka mbhagambire, aha chiro ch'eiramu, Tiro na Sidoni bhilyemerwa kusaga imwe. ²³ Na iwe Kaperinaumu, noyenda kukanga aha iguru? Noija kunagwa omu rwoto rw'omuliro. Ensonga ebhikorwa bhy'amani ebhyo wakoleirwe kabhyakukoleirwe Sodoma, ekigo echo chakubhaire kiliho na hati. ²⁴ chonka nkugambire, aha chiro ch'eiramu ensi ya Sodoma elyemerwa kusaga iwe.” ²⁵ Omu bhiro ebhyo Yesu agamba ati, “Tata, Mukama w'eiguru n'ensi, ninkusiima, kubhona ebhigambo ebhi obhiselekire abhaine obhumanyi n'amagezi, kandi okabhisurulira enkelemeke, ²⁶ nikwo, Tata, echo nicho chakusemeleire. ²⁷ Ebhintu bhyona Tata akabhintunga; mara taliho amanya Mwana sana Ise, kandi na Ise taliho amumanya sana Mwana n'owo Mwana agonza kusurulira. ²⁸ Mwije ahali nyawe mwena abhalemirwe n'abhasikiliirwe, ndabhalemuura. ²⁹ Mwetweke enkomo yange, mwegere ahali inye, ensonga nyawe ngira obhufura n'obhwetohya, mara emyoyo yanyu erahumura. ³⁰ Nobhona nyawe enkomo yange neyorobha, kandi omugugu gwange nigwanguha.”