¹ Yesu ayeta abhegesibhwabhe 12 abhaha obusobhora bhw'okubhinga amasitani, n'okutamba bhuli ndwara na bhuli bhulema. ² Amabhara g'entumwa ezo 12, owa mbere ni Simoni owu bheta Petero, na Anderea omurumuna; Yakobo eya Zebedayo, na Yohana omurumuna; ³ Filipo na Balitolomayo; Tomasi na Matayo omusoza; Yakobo eya Alufayo, na Tadeo; ⁴ Simoni Omunyakanaani, na Yuda Isikariote, ayamubanzire. ⁵ Entumwa ezi 12 Yesu azituma naziragira ati, “Omu bhanyamahanga mutajira mbali mwaja, n'omu chigo ch'Abhasamaria mutatahamu. ⁶ Sana muje omu Bhaisiraeli abhabhuzire nk'entaama. ⁷ Omu kugenda murange muti, ‘Obhukama bw'omw'iguru bhuli haihi.’ ⁸ Muchize abharwaire, muhimbure abhafu, mweze abhabhembe, mubhinge amasitani. Mukahabhwa bhusa, na imwe muhe bhusa. ⁹ Mutagenda na zahabu, anga feza, anga mulinga mu nsaho zanyu. ¹⁰ Mutatwara nsaho mu rugendo, anga kanzu ibhili, anga nkaito, anga nkoni. Omukozi asaine alye. ¹¹ Echigo chona chona anga echaro mbali murataha, mubhanze muhigemu omuntu wamwo asaine, mwikare omwe kuhika obhwo mulirugayo. ¹² Kamurabha nimutaha omu nju ejo mugendere emilembe. ¹³ Enju ejo k'elibha esaine, emilembe yanyu esingire omwo. Nawe k'elibha etasaine, emilembe yanyu ebhagarukire. ¹⁴ Omuntu wena wena ayange kubhatora anga kuhulira ebhigambo bhyanyu, muchunchumure echuuchu aha maguru ganyu obhwo mulikuruga omu nju ejo anga omu chigo echo. ¹⁵ Nimbagambira amazima nti aha chiro ch'eiramu ensi ya Sodoma na Gomora elisobhora kwemerwa kusaga echigo echo. ¹⁶ “Lebha nimbatuma nk'alikutuma entaama omu mishega. Chityo mujire obwenge nk'enjoka, kandi mubhe bhachurezi nk'echiibha. ¹⁷ Mwekenge abhantu. Balibatwara omu nchiiko, bhabhatelere omu sinagogi, ¹⁸ kandi bhalibhakurura nibhabhatwalira abhagavana n'abhakama nibhabjatura nyawe, mubhe bhajulizi bhange ahali bhonene n'aha bhanyamahanga. ¹⁹ Kabhalibhatwarayo mutalifa kubhi kumanya kwo muligamba anga echo mulihorora. Echo mulihorora mulichihaabwa omu saa ejo. ²⁰ Manyasi t'inywe muligamba; Mwoyo wa Iseinywe niwe aligambira aha mitwe yanyu. ²¹ Omuntu aliisa omurumuna, na ise mwana aliisa omwanawe, n'abhaana bharimukila abhazaire mara bhabhaise. ²² Kandi bhalibhanobha bhona nibhabhatura nyawe. Chonka alyegumisiliza kugobha aha nzindo alirokoka. ²³ Kibharabhabhinga omu chigo echi mwirukire omu chataineho; kubha nimbagambira amazima, timulimarayo bhigo bhyona bhya Isiraeli Omwana w'Omuntu atakaizire. ²⁴ “Omwegesibwa tachira mwegesawe, anga omwiru kuchira mukamawe. ²⁵ Nichimara omwegesibwa kusana omwegesawe, n'omwiru kusana mukamawe. Ka nyin'enju bharabha bhamwesire Belizebuli, lero abh'ekaye bhalibagambaho kubhi bata?” ²⁶ “chityo mutalibhatina, ensonga taliho chiswekire ekitalishururwa, anga echiselekire echtalimanyika. ²⁷ Echo ndikubhagambira omu mwilima, muchigambe omusana gujwire. N'echo murahulira nichigambwa omu bhihwe muchgambire aha higuru z'enju. ²⁸ Abhaita omubhili bhataisire mwoyo mutalibhatina. Sana mutine ayakwita byona bhibhili: Kwita omwoyo n'omubhili akabhinaga omu cho ch'omuliro. ²⁹ Entaratambi ibhili tizigura shilingi emo?? Kandi taliho n'emo eyakukuntuka hansi Iseinywe atenzire. ³⁰ Nangu n'eisoke aha mitwe yanyu libhazire. ³¹ Aha bhw'echo mutatina; imwe mwinr ensonga kusaga entaratambi zingi. ³² chiityo bhuli omo alinyebhuga omu maiso g'abhantu, nanye ndimwebhuga omu maiso ga Tata asingiire omw'iguru. ³³ chonka alinyetonga omu maisho g'abhantu, nanye kwakwo ndimwetonga omu maiso ga Tata asingiire omw'iguru. ³⁴ “Mutalenga muti nkeija omu nsi kuleta milembe. Tinaizire kuleta milembe, sana awitangana. ³⁵ Nkaija kuterana omuntu ahali ishe, n'omwana muhara kumuterana ahali nyina, na mukamwana womuntu kumuterana ahali nyinazara. ³⁶ Abhabhisa b'omuntu bhalibja bhalinya ab'omu kaye. ³⁷ Alikwenda ise anga nyina kusaga nyawe ogwo tansaniire. N'alikwenda omutabhani anga omuhara kusaga nyawe nawe tansanire. ³⁸ N'atalikwetweka musarabhagwe akampondera na wenene ogwo tansaniire. ³⁹ Ahunja obhurorabhwe bhulimufera, kandi alyeyanga obhurorabhwe aha bhwange ogwo alibwihura.” ⁴⁰ “Omuntu abhatora atora nya2, n'atora nyawe atora ayantumire. ⁴¹ Omuntu atora omurangi aha bhw'okuba murangi alirongorwa erongoro ey'omurangi, n'atora omuntu omugorogoki ahakubha muntu omugorogoki, nawe alirongorwa erongoro y'omuntu omugorogoki. ⁴² Kandi aliha omo omu bhato echikompe cha'amaizi galikuhora kagamuheera okubha mwegesibhwa wange, mbagambire amazima, talibhurwa rongoroye.”