¹ Yesu keyamazire kutaha omu bhwato asaabhuka aija omu chigo ch'owabho. ² Bhamuletera omurweire akabhire orubhaju abhyamire aha katanda. Kayabhoine okwesiga kwabho agambira omurwaire akabhire orubhaju ati, “Guma mwana wange, wagarulirwa amafu gawe.” ³ Aho abhegesa bh'Amateka abhandi bhagamba omu katima bhati, “Omuntu ogu nakufuru.” ⁴ Yesu asangwa namanya ebhitekelezo bhyabho abhaza ati, “Kubhaki nimutekeleza kubhi omu mitima yanyu? ⁵ Kubha echorobhire kusaga ni chiha, kugamba nti, ‘Wagarulirwa amafu gawe,’ anga kugamba nti, ‘Imuka ogende?’ ⁶ chonka musobhore kumanya okwo Omwana w'Omuntu aina obhusobhora omu nsi kugarulira amafu,” aho agambira omurweire akabhire orubhaju ati, “Imuka, sutura amachera gawe otahe.” ⁷ Omurwaire aimuka ataha. ⁸ Embaga kubhon'echo etina, esingiza Katonda ayahaire abhantu obhusobhora nk'obhu. ⁹ Yesu kayarugiire kulinya, abhona omusaija nayetwa Matayo asuntamire aha ofisi y'abashoza. Amugambira ati, “Ompondere.” Matayo aimuka amuhondera. ¹⁰ Kayabheire ali omwa Matayo nalya, abasoza bhangi n'abhafakare bhaija bhasuntama ahali Yesu n'abhegesibhwabhe. ¹¹ Abhafarisayo kabhachibhoine echo, bhabhaza abhegesibhwa bha wenene bhati, “Ahakubachi omwegesa wanyu alya n'abhasoza n'abhafakare?” ¹² Yesu achihulira! Agamba ati, “Abhagumire tibhakwenda mutambi sana abharwaire. ¹³ Mugende mumanye ensonga y'echigambo echi, ‘Tinkwenda chitambo, n'inyenda obhuganyizi.’ Tinaizire kweta bhagorogoki, nkaija kweta abhafakare.” ¹⁴ Abhegesibhwa bha Yohana bhagobha Yesu bhamubhaza bhati, “Kubhaki itwe n'Abhafarisayo tusiibha, chonka abhegesibhwa bhawe tibhasiibha?” ¹⁵ Yesu abhagambira ati, “Abhagenyi aha bhugenyi bhw'obhushwere bhakuchura bhacheine kitasya? Amakiro galija obhwo bhalibhaihyaho kitasya, aho nibhwo bhalisiibha. ¹⁶ Taliho muntu ateeka echiraka cho mwendo oguchagumire aha chiijwaro chikuru, aha bhw'okuba echiraka chtaguka aha chijwaro, kandi aho emitagukire ebha mibhi kusaga. ¹⁷ Nangu n'edivai ensya tibhajiteka mu nsaho nkuru. Kichakubha chityo ensaho nizibharuka, edivai neseseka, mara ensaho zonene nizifa. Edivai ensya eja omu nsaho ezisya ez'edivai, aho ensaho n'edivai bhiikaraho.” ¹⁸ Ke Yesu yabhaleire aliho nabhagambira ebhyo, omutwazi omo ataha omu nju amubhandama omu maiso nagamba ati, “Muhara wange yaruga kukabha hati; chonka oije omuteho omukono gwawe, arahimbuka.” ¹⁹ Yesu aimuka amuhondera. ²⁰ Lebha omukazi ayabheire arwaire echiganga emyaka 12 amuruga enyuma akwata aha rupindo rw'echijwaroche; ²¹ kubha akabha natekeleza ati, “Kandakwataho aha chiijwaroche ndachira.” ²² Yesu kuhinduka akabhona omukazi ogwo, agamba ati, “Guma mwana wange; okwesiga kwawe kwakuchiza.” Niho honka omukazi achira. ²³ Yesu kayagobhire omw'omutwazi, akabhona abhakutera enduru n'embaga nechura muno. ²⁴ agamba ati, “Murugemu, omwisiki tiyafa, anagiire.” Bhonene bhamusekelera. ²⁵ Kabhabheire bhasohoize embaga aheru, ataha omu nju, akwata omwisiki omukono, omwisiki aimuka. ²⁶ Ebharuro y'echgambo echo eraliira omu Wilaya yona. ²⁷ Kandi Yesu kayabhaire narugayo, empume ibhili zimuhondera, nizitaka ziti, “Mwana wa Daudi otuganyire.” ²⁸ Keyatahire omu nju empume zombili zimugobha. Yesu azibaza ati, “Nimwikiliza okwo echi nakusobhora kuchikora?” Zimuhorora ziti, “ego Mukama.” ²⁹ Aho abhakwata amaiso nagamba ati, “Mubhone kuhonderana n'okwesiga kwanyu.” ³⁰ Amaiso gabho gabhurura. Yesu abhatanga muno ati, “Muramanya omuntu n'omo echi atachimanya.” ³¹ chonka bhonene bhagenda bhamuranga omu wilaya ejo yona. ³² Kabhabheire nibharugayo bhamuletera omuteta akwasirwe sitani. ³³ Yesu kayamazire kubhinga sitani ogwo, omuteta agamba. Embaga esobherwa negamba eti, “Echabh'echi tichikabhonekaga muli Isiraeli.” ³⁴ chonka Abhafarisayo bajira bhati, “Amasitani nagabhingisa amani ga mukama wago.” ³⁵ Yesu arabha omu bhigo bhyona n'omu bhyaro nayegesa omu sinagogi zabho naranga evangeli y'obhukama bhw'omw'iguru, nachiza bhuli ndwara na bhuli bhulema. ³⁶ Obhwo yabhoine embaga yajiganyibhwa, kubha ekabha ebhurabhuliirwe, esobheirwe nk'entaama ezitaina mushumba. ³⁷ Aho agambira abhegesibhwabhe ati, “Ebhy'okusarura bhingi, chonka abhakozi bhake. ³⁸ chityo musabhe Mukama w'obhusaruzi atweke abhakozi bhangi omw'isaruralye.”