¹ Kiyamazire kugambha ebhigambho ebhyo, akagenda na abhegesibhwa bhawenene kuja omurusa rwa Kidroni, akabha ariyo ebhusitani, wenene na abhagesibhwa bha wenene bhakataha omunda ya yonene. ² Ogwo Yuda, eyabheire nayenda kumwanga, nawe akabha namanya echichweka echo, Yesu akabha nagenda omuchichweka echo eine abhegesibhwa bhawenene. ³ Nawe Yuda, kiyabhweine yabhona echikundi cha abhaserikali na amaofisa kuruga omubhakauru bha amakuhani, bhakeija bheine etadobha, ne ekurunzi ne esiraha. ⁴ Nawe Yesu, akabha yamanyire echabheire nichikorwa abhwa wenene, akezora omumeiso abhabhaza, ''Nohi ohumukuiga?'' ⁵ Nabho bhamuorora, ''Yesu mnazareth. "Yesu abhagambhira, Ninye aha'' Nawe Yuda eyamwangire, akabha ayemereire na abhaserikali . ⁶ Kibhabhagambhire, ''Nyawe ninye'' bhakasubha enyuma bhagwa enture ahansi. ⁷ Ashubha abhabhaza akandi, ''Nohi oumukuiga? Nabho bhamuorora ''Yesu omunazareth.'' ⁸ Yesu abhaorora, ''Ndabhagambhire nyawe ninye; kimurabha nimuiga nyawe, mubhareke abha abhandi bhegendere.'' ⁹ Ebhyo bhikabha bhityo ili echigambho chigobheserezwe; arinya kiyagambhire; ''Omuri bharinya abhampeire, tindanagire nomo.'' ¹⁰ Niho simoni Petro, eyabheire eine orupanka, arweyayo amutema okutu kwa bhuryo omukozi wa kuhani omukuru. Eibhara ryogwo omukozi akabha nayetwa Malko. ¹¹ Yesu agambhira Petro, ''Shubhyaho orupanka rwawe ahiwamutema. Kubhaki ntayweramu echikompe chirinya echampeire Tata?'' ¹² Bharinya abhaserikali na abhajemedari, na abhakozi bha Abhayuda, bhakamukwata Yesu bhamukoma. ¹³ Nabho bhamutwara mpaka ahali Anasi, kubha wenene akabha ali mazara wa Kayafa, eyabheire ali kuhani omukuru amwaka ogwo. ¹⁴ Obhwo Kayafa niwe yabheire abhaeire efomoro Abhayuda kwambha omuntu omo afe abhwa abhantu bheingi. ¹⁵ Simoni Petro akamuondera Yesu, bhatyo abhegesibhwa abhandi. No orinya omwegesibhwa eyabheire namanyika ahali kuhani omukuru, nawe akatahamu amo na Yesu omuri behewa ya kuhani omukuru; ¹⁶ Chonka Petro akabha ayemereire aheru yo omuryango. Ogwo omwegesibhwa eyabheire namanyika ahali kuhani omukuru, akashoora aheru kufumora no orinya omukazi omukozi eyabheire nalinda omuryango ataya Petro omunda. ¹⁷ Ogwo omukozi eyabheire narinda amuryango, akamugambhira Petro, ''Isi iwe tori amo no omuntu ogu?Na wenene akagambha, ''Nyawe chehi.'' ¹⁸ Na bharinya abhakozi na abhakuru bhakabha bhemereire arinya; bhaembhire omuriro gwingi muno, akabha ariyo embheho, chityo bhakabha nibhota omuriro bhabhase kubhona obhutagasi. Nawe Petro akabha abheine, nayota omuriro ayemereire. ¹⁹ Kuhani omukuru akamubhaza Yesu abhwa abhegesibhwa bhawenene na ebhyegeso bhya wenene. ²⁰ Yesu akamuorora, "Ngambhire obhutashereka ensi; Nyawe nkegesa emara zingi omumasinagogi no omumakanisa omuchichweka cha abhayuda bhatanganirwe. Nanye tindagambhire chona chona omukusereka. ²¹ Kubhaki mukambhaza?Mbhabhaze bharinya abhampurire ahali chirinya echinagambhire. Abho nibhamanya ebhintu ebhyo ebhinagambhire. ²² Yesu kiyamazire kugambha atyo, omukuru omo eyabheire ayemereire atera yesu no omukono gwa wenene ashubha agambha, ''Isi, ebhi nikwo okupaswa kuorora kuhani omukuru?'' ²³ Na wenene yesu ahorora, ''Kidabha nagambha echitu chona chona echibhi aho obhe omujulizi abhwo obhufu, na kidabha namuororage kubhaki ontere? ²⁴ Nibhwo Anasi yamutweire Yesu ahali Kayafa kuhani omukuru akabha akomirwe. ²⁵ Arwecho Simoni Petro akabha ayemereire nayota omuriro wenene. Bharinya abhantu bhamugambhira. ''Isi, iwe tori mwegesibhwa wa wenene? ''Ayanga nagambha ''Nyawe tindi wenene.'' ²⁶ Omukozi omo owa kuhani omukuru, eyabheire ari omurumuna wo orinya omuseija ohu Petro yatemire okutu, akagambha, ''Isi tiwe ohumbhweine na wenene kurinya omubhusitani?'' ²⁷ Petro ayanga tena, aho esaki ekokoroma. ²⁸ Obhwo bhamutwara Yesu kuruga owa Kayafa mpaka okwo Praitorio. likabha richali bhwancha muno. Nabho bhonka tibharatairemu omwo Praitorio obhwo bhatabhasa kuchafuka kibharabha mbharya Pasaka. ²⁹ Chityo Pilato abhagendera nagambha. ''ni ikosa ki erimukumutwejerera ogu omuntu?'' ³⁰ Bhamuhorora mbhamugambhira, ''ogu omuntu kiyakubheire atakukora ebhibhi, titwakumuresire aha iwe.'' ³¹ Pilato amugambhira, Mumutware imwe bhenyewe, mumuramure nka abhwo omuku gwanyu. "Nabho Abhayuda bhamugambhira, ''Omuku tigukutujubhura kwita omuntu wena wena.'' ³² Bhakagambha ebhyo ili echigambho cha Yesu chigobheserezwe, echigambho echiyabheire yagambhire achikwasire aha rufu rwa wenene. ³³ Aho Pilato aja omuri Praitorio amweta Yesu; amugambhira, ''Isi, iwe ori omukama wa Abhayuda?'' ³⁴ Yesu amuorora, ''Isi iwe wabhaza echibhazo echi obhwensonga noyenda kumanya nanga abhandi bhakutuma obhase kubhaza nyawe?'' ³⁵ Nawe Pilato amuorora, ''Nyawe tindi Myuda, nanga tikwo? ''Ehiyanga ryawe na kuhani omukuru nibho bhakureta ahali nyawe; iwe wakoraki? ³⁶ Yesu akaorora, ''Obhukama bhwange ti bhwansi eji, kibhwakubha obhukama bhwange no obhwe echichweka echi omunsi eji entumwa zange zakundwanirire nitabhasa kutekwa abhayuda. Amazima obhukama bhwange tibhukuruga aha''Chityo ³⁷ Pilato akamwambhia, ''Isi ,iwe aho oryo omukama? ''Yesu akaorora, ''iwe nikwo orikugambha ngu nyawe ndi omukama, Obhwe eshonga eji nyawe nkazarwa no obhwe esonga eji nyawe nkeija omunsi mbhase kubha omujurizi wa garinya amazima. Wena wena ali wa ago amazima naurira ehiraka ryange. ³⁸ Pilato amugambhira, ''Amazima ni gahi?'' Nawenene kiyamazire kugambha ebhyo agenda owa Abhayuda abhagambhira ''Tikubhona chona chona omuntu ogu. ³⁹ Imwe mwine emiiko ekunkora nkomorore omubhwowa omo omuri Pasaka.Isi nimwenda mukomorore omukama wa Abhayuda.'' ⁴⁰ Bhasubha bhatera enduru mbhagambha, tiwe ogu,tukomororere Baraba. ''Nawe Baraba akabha aryomusuma.