¹ Akanya ka Petro na Yohana kibhabheire mbhafomora nabhantu, amakuhani no omurebherezi we ekanisa na amasadukayo bhabhagendera. ² Bhakabha bhatamirwe muno obhwokubha Petro na Yohana bhakabha nibhegesa abhantu ebhikwateine ahali Yesu no okurangirira akuzikurwa kwa wenene kuruga omubhafu. ³ Bhakabhakwata nokubhata omuchihome echiro chaondehireho bhwancha, bhukabha bhwabheire bhweigoro. ⁴ Chonka abhantu bheingi bhakabha bhaurire ebhigambho bhakesiga; abhaseija bhakabha nibhagobha nka ekumi itano. ⁵ Kibhwagobhire bhwancha echiro chaondehireo, bhakuru bhabho, abhagurusi na abhahandiki, bhona amo bhaketangana Yerusalemu. ⁶ Anasi omukuhani omukuru akabha ariho, na kayafa, na Yohana, na Iskanda, na bhona abhabheire bhari bharumuna bha kuhani omukuru. ⁷ Kibhabheire bhabhateireho Petro na Yohana omugati yabho, bhabhabhaza, ''no obhubhasa bhuha, no omwibharaki mwakora ebhi?'' ⁸ Aho, Petro, ehijura Mwoyo arikwera, abhagambhira, ''Imwe bhakuru bhabhantu, na abhagurusi, ⁹ Itwe echiro cha chirechi nitubhazibhwa abhwe ebhikorwa ebhirungi ebhikozirwe aha muntu ogu omurwehire-nko kwo chiri omuntu ogu echizibhwe? ¹⁰ Chimanyike echi omuri imwe na omubhantu bhona omuri Israeli, omwibhara rya Yesu kristo owa Nazareti, ohumwatesize, katonda ohuyaibhwire kuruga omubhafu, no omumuandagwe omuntu ogu nayemerera aha omumeiso ganyu agumire. ¹¹ Yesu kristo n'ehibhare erimwagahire imwe, Chonka likakorwa kubha ibhare rihango eryaharubhaju. ¹² Tariho bhurokore omummuntu abhasa wena wena. Kubha tariho ibhara erindi ahansi yehiguru eribhaehibhwe abhantu, kurabhira omuri ryonene nitubhasa kurokorwa.'' ¹³ Kibhabhweine okutatina kwa Petro na Yohana, bhamanya ngu bhakabha bhari bhantu bhatakuereweka bhatasomire, bhakatina, bhamanya kubha Petro na Yohana bhabheire amo na Yesu. ¹⁴ Kubha bhakamubhona orinya omuntu eyeichizibhwe ayemereire amo nabho, tibhabhweine chintu cha kugambha. ¹⁵ Kibhamazire kubhajubhura entumwa ziruge omumaiso go omukutano gwe ibharaza, bhakafomora bhonene kwa bhonene. ¹⁶ Bhakagambha, tabhakoreki abhantu abha? Na amazima echintu cho kutinisa chakorwa kurabha omuri bhonene nichimanyika omuri bhuryomo akutura Yerusalemu; titwakuchanga echo. ¹⁷ Chonka,echintu echi chitabhasa kugenderera omubhantu abhandi, tubhatinise bhatarigambha nechiro chindi aha muntu wenawena omwibhara eli. ¹⁸ Bbhabheta Petro na Yohana omunda bhabhatinisa chitarizoka nibhagambha nangu nokwegesa omwibhara rya Yesu. ¹⁹ Chonka Petro na Yohana bhakabhahorora bhabhagambhira, ''Kichirabha chiseine omumeiso ga katonda kubhatina imwe kusaga katonda,muramure imwe. ²⁰ Itwe titwkurekera kugambha ebhintu ebhitubhweine no okuhurira.'' ²¹ Kibhabhatinise muno Petro na Yohana,bhakabhareka bhagende. Tibharabhweine chintu chona chona echibhakwasireho bhabhase kubhasasa, obhwokubha abhantu bhona bhakabha mubhasima katonda ahali chirinya echakozirwe. ²² Omuntu eyabheire abhoine okwichibhwa akabha eine emyaka gana. ²³ Kibhakomoroirwe, Petro na Yohana bhakagenda omubhantu bhabho no okubhagambhira bhyona bhakuhani na bha bhabhu ebhibhabhagambhire. ²⁴ Kibhabhiurire, bhakagambhira ahiguru bhona amo ahali Katonda bhagambha, "Mukama, iwe okozire ehiguru nensi ne enyanja na bhuri chintu omunda ya chonene, ²⁵ Iwe obhasa, Omuri Mwoyo alikwera, omukanwa ka tata weitu Daudi, omukozi wawe, okagambha, ''Kubhaki abhantu bha abhanyamahanga bhavurugire, nabhantu bhatekereize ebhintu ebhibhi? ²⁶ Abhakama abhensi bhetekatekire amo, na abhebhembhezi bhetekatekire amo abhwa Mukama na abhwa masiya wawenene.'' ²⁷ Namazima, bhona Herode na Pontio Pilato, amo na abhanyamahanga na abhantu bha Israeli, bhakerunda amo omuchigo echi ahabhwo omukozi wawe akwera Yesu, ohuwasigire amajuta. ²⁸ Bhakerunda amo kukora bhyona omukono gwawe na engozi zawe bhikenda kuruga embhanzo bhitakazokire. ²⁹ Ati, Mukama, rebha ebhitinisa bhyabho, obhabhasize abhakozi bhawe kugambha echigambho chawe omubhutatina bhwona. chibhase ³⁰ Koragorora omukono gwawe kurokora, ebhizoka ne ebhitinisa bhibhase kuzoka kurabha omwibhara rya omukozi wawe akwera Yesu.'' ³¹ Kibhamazire kusabha, echichweka chibhabheire bhari amo atenjeka, bhona bheijura Mwoyo arikwela, na bhakagambha echigambho cha Katonda omukutatina. ³² Abhantu bheingi abhabheire nibhesiga bhakabha bheine omwoyo gumo no omutima gumo: tariho nomo eyagambhire ati echi nechange;sana bhakabha bheine ebhintu bhyona omubhumo. ³³ Omumani gahango abhaereza bhakabha mbharangirira ebhikozirwe ahali bhonene mbhirenga okuzikurwa okwa Mukama yesu, ne echisa chiango chikabha chiri ahiguru yabho bhona. ³⁴ Akabha atarimu omuntu omuri bhonene eyabhehire ateine kantu, kubha abhantu bhona bhakabha bheine emigorora zo okubha ne ebhitaka ne enju, bhakabhiguza no okureta amaera agebhintu ebhibhabheire bhagulize ³⁵ nokubhita ahansi ya amaguru ga abhaereza. bhakabheganira bhuri mwesiga, nko kwo bhuri muntu okwoyabheire nayetaga. ³⁶ Yusufu, Omulawi, omuntu kuruga Kipro, akaebhwa eibhara rya Barnabasi na abhaereza (nirimanyisa, omwana wo obhusinje). ³⁷ Abha eine echibhanja, akachiguza areta amaera, agateka ahansi ya amaguru ga abhaereza.