¹ Petro na Yohana bhakabha nibhaja omukanisa omukanya ko okusabha, esaa mwenda. ² Omuntu omo, omurema kwema nazarwa, akabha nasuturwa bhuri chiro akabha nanyamikwa amuryango gwe ekanisa ogwabheire nigwetwa gurungi, abhase kusabha esadaka kuruga omubhantu abhabheire nibhaja mukanisa. ³ Kiyabhabhweine Petro na Yohana bhari hei kutaha omukanisa, akabhasabha esadaka. ⁴ Petro, amurebha muno namaiso, amo na Yohana, agambha, ''turebhe itwe.'' ⁵ Omurema abharebha, akarinda kubhona echitu kuruga omuri bhonene. ⁶ Chonka Petro agambha, ''amaera ne ezaabu nyawe tibhine, chonka chirinya echinyine nicho ndakuha. Omwibhara rya Yesu kristo owa Nazareth, tambhuka.'' ⁷ Petro amutwara amukwasire omukono gwa bhuryo, amwimucha aiguru: emara emo amaguru ga wenene na ebhiju na amagufa gawenene bhibhona amani. ⁸ Naguruka aiguru, omuntu azingamire ayemerera abhanza kutambhuka; ataha omukanisa amo na Petro na yohana, natambhuka, naguruka, nasima Katonda. ⁹ Abhantu bhona bhakamubhona natambhuka nasima Katonda. ¹⁰ Bhamanya kubha norinya omuntu eyabheire asitamire nasabha esadaka aha muryango gurungi ogwe ekanisa; bhakeijura kutina nokusobherwa obhwokubha echatoka ahali wenene. ¹¹ Nko kwo yabheire abhagambhireho Petro na Yohana, nabhantu bhona amo bhakeirukira achitanganiro echabheirwa nichetwa Sulemani, mbhaujuma muno. ¹² Petro kiyabhweine echo, wenene abhaorora, ''Inywe bhantu bha Israeli, kubhaki nimuujuma? kubhaki nimwereka amaiso ganyu omuri itwe, nimurenga ngu twamukora atambhuke omumani geitu itwe nanga okukunira kweitu?.'' ¹³ Katonda wa Ibrahimu, no wa Isaka, no wa Yakobo, Katonda owa Baba zeitu, amusigire omukozi wawenene yesu. Ogu niwe mwagobhize mukamwanga omumeiso ga Pilato, nangu wenene akabha aramwire kumureka. ¹⁴ Mukamwanga Akwera na haine obhugororoki, mukenda omwisi atesurwe. ¹⁵ Imwe mukeita Omukama owo obhurora, Katonda akamuzikura kuruga omubhafu-itwe tuli abhajulizi bhebhi. ¹⁶ Ati, omukwesiga omwibhara ryawenene, omuntu ogu ohumukubhona no okumanya, akakorwa kugira amani. Okwesiga okwokurabha owa yesu emuheire wenene ehafya eji egobhesereizwe, omumeiso ganyu mwena. ¹⁷ Ati, Bharumuna, nimanya mukakora obhufera, niko bhakozire abhaereza bhanyu. ¹⁸ Chonka ebhintu Katonda ebhiyabhagambhire kare omuminwa ya abhaereza bhona, kubha ogu Kristo najakuteseka, ati bhigobhire. ¹⁹ Chityo, mwechuze muinduke, entabhara zanyu zibhase kufutwa, abhase kwija amakiro go kusemererwa akubhaho Mukama; ²⁰ Abhase kutweka kristo eyaronzirwe abhwaitu, Yesu. ²¹ Wenene niwe akubhasika eiguru limutangirire mpaka akanya kokugarurirwa ebhintu bhyona, Katonda akabhigambha kare omukanwa ka abhaereza abhokwera. ²² Nimanya Musa akagambha, 'Mukama katonda najakutaho omuereza nkanye kuruga omuri bharumuna bhanyu. Nimujakumuuliriza bhuri chintu echarabhagambhira inywe. ²³ Nichijakuzoka chiti bhuri muntu atakuhurira muereza ogwo najakwitwa mazima aruge omubhantu.' ²⁴ Nikwo, na abhaereza bhona kwema ahali Samweli na nabhaondereho obhuyarugireho, bhakafomora bharangirira omubhiro ebhi. ²⁵ Imwe muri abhana bha abhaereza na abhe ndagano eyo Katonda yakozire amo na bhashenkuru, nko okuyagambhire ahali Abrahamu, 'Omwiguru ryawe enzaro zona ezensi zijabhona omugisa.' ²⁶ Obhwo Katonda yamuteireho omukozi wawenene, akamutweka omuri imwe embhanzo, abhase kubhaha emigisha muruge omumafu ganyu.''