¹ Bharumuna bhange, nitwenda kubhamanyisa chisa cha Katonda echo ekanisa za Masedonia zatungirwe. ² Bhakalengwa omu bhiyengo bhingi ebhyo bharabhiremu; chonka bhakasemelerwa muno, bhabha bhafura ebhishobheize, bhajuna bhanu, n'obhwo kaziro bhali bhanaku muno. ³ Mbagambire amazima, bhakagira ebhintu bhingi okwu bhabhaire nibhasobhora, nangu n'okusagaho. ⁴ Bhakeyendera bhonene bhatutagiliza na bhonene kujuna abhantu bha Katonda omuli Bhuyahudi. ⁵ Bhakagira kusaaga ebhyo twabheire nitusuubhira: Bhakehayo, bhakabhanza bhayehayo: Ahali Mukama, bhasubha bhayehayo ahali itwe nk'okw Katonda yabheire nayenda. ⁶ Aha bhwecho cho tukatagiliza Tito k'amaliliza omuli imwe omulimo ogu gw'engonzi nk'okwu yakagubhandize. ⁷ Muli bhatungi omuli bhyona ebhyo mwinebhyo: Omu kwesiga, omu bhigambo, omu bhumanyi, omu bjwegumisiliza obhwa bhuli ngeli, n'omu rukundo orwo mukumwenda. Chityo mubhe nikwo mujira n'obhufura omu mulimo ogu gw'engonzi. ⁸ Omu kugamba ntyo tinkubharagira. Ninyenda kubholeka echika ech'abhandi bhainacho omu kujuna bhanu, mbhone kumanya engonzi zanyu zina mazimaki. ⁹ Nimumanya Mukama weitu Yesu Kirisito ech'echisha chamukolize: Wenene akabha ali mutungi, chonka yayehindura munaku kubharokora, mubhone kubha bhatungi aha bhwa wenene kwehindura munaku. ¹⁰ Okwo bhili, tonyawe nimbhategekera nti: Nikigasha kusaaga kamwakugobheseleza eikora elyo mwamara omwaka gwona mubhandize. ¹¹ Nimwe mwabheire bha mbere kuralira echigambo echo mara mukachikora. Mbwenu aho echigambo echo mukimare. Mutemu echika kuchimara nk'okwu mwachiraliire: Ebhyo mwinabhyo mubhigire hati. ¹² Kamurabha nimwenda kubhijira, Katonda arasiima egabho zanyu ezo, nabhona ebhyo mwinabhyo kandi nimusobhora kubhijira, ebhyo mutainabhyo ebhyo tabhiliho. ¹³ Imwe mutabha n'imwe musikilirwa, abhandi kubha nibhwo bhanguhirwa; chei, turabhe omu bjwiganwa n'amazima. ¹⁴ Ebhyo murabha mwinabhyo mutakubhyetaga bhijune abetaagi, nabho obhwo bharabha baine ebhyo batakwenda, bhajune imwe obhwo murabha muli betaagi, chityo habheho obhwiganwa. ¹⁵ Nk'okwu chahandikirwe chiti, “Ayasombokize bhingi tiyasagwire, n'ayasombokize bhike tiyalebheleirwe.” ¹⁶ Omukama akakora kutamu Tito echihika chonene chonene ech'okubhajuna. ¹⁷ Ti kujir'oti akesiga bhusha aha bhw'okubha tukamusabha, nawe akasangwa nayenda muno kujuna abhantu, yagobha aha kuramura omu bweyendezibwe kwija okwo. ¹⁸ Twamutweka na murumuna weitu omo akumanyika omu kanisa zona aha rw'eiranga ly'okuranga evangeli. ¹⁹ Mara t'echo chonka: Ekanisa zikamuronda kubha nagenda na itwe tukakora hamo omulimo gurungi ogu ogwu tuliho. ²⁰ Nitwelinda bhatatulisa maela ago bhatukwasize. ²¹ Nitwenda kukolera Omukama n'abhantu. ²² Hamo na bharumuna bheitu abho, twatweka murumuna waitu ondijo; ogwo tubhandize twamulebhelera muno, twabhaha okwo aina echika ch'okujuna bhanu, nangu kandi mbwenu asaagireho aha bhw'okubha imwe nabhesiga muno. ²³ Tito ogwo ni mutahi wange; omu kubhakolera n'inyema nawe. Chonka abharumuna bheitu abha, abho bhalikwija nabho, bhatwekirwe ekanisa, mara bhonene abho chitinwa cha Kirisito. ²⁴ Chityo mubhakolere kurungi omu kanisa ebhyo tubhebhugaho bhabhibhone.