¹ chityo bhagonzibhwa, obhwo twasubhiziibhwe ebhintu nk'ebhi, twenyinye bhuli bhuchafu ak'omhubili n'omwoyo, tutine Katonda, tubhe bhagorogoki omu bhutakatifu. ² Mutuchingulire emitima yanyu. Titukakoleraga muntu kubhi; titukasitazaga muntu, anga kugobheza muntu. ³ Tinkugamba bhigambo ebhi kubhakwata musango, kubha ndabhagambiire okwu mutwikara omu mwoyo, tufe hamo, turore hamo. ⁴ Nyina obhwesige bhungi omuli imwe; nimbhebhuga muno, ndige muno. Omu naku zeitu zona ebhyera bhiraliire kunyita. ⁵ Katwagobhire Masedonia, titwahumwire. Tukagwerwa enaku bhuli rubhaju, aheru n'omunda: Bhaturwanisa twatina. ⁶ chonka Katonda nyamuhumuliza abasobheirwe, akatumaramara okwija kwa Tito, ⁷ tikwija kwa wenene kwonka, chonka mpaho n'okumumaramara okwo mwamumaramazire. Nk'okwu mwangambiire okwu mwina orususo rwange, okwu mujunaire, n'okwu mulikundwanilira, ebhyo nabhyo bikanyongera ebhyera. ⁸ N'obhwo ndabha nabhasasize omu bharua yange, tinkugyechuza (n'obhwo najechulize). Nimbona okwo ebharua ejo yabashasizekwo, n'obhwo etabasasize mwanya gura. ⁹ Nk'okwu bhili, nyawe ninsemelerwa, ti bhwa nsonga ya nyawe kusasa, chonka kubhona mukasasa mwasubha mwayechuza; mukasasa mwagaruka ahali Katonda, aha bhwecho itwe titwabhasasize n'akake. ¹⁰ Okusasa mukagaruka ahali Katonda kurugwamu okwechuza; kandi okwechuza kurokora omuntu, mara omuntu takwechuza. Chonka obhusasi obw'ekinyansi burugwamu orufu. ¹¹ Na imwe mulebhe obhusasi obhubhagarwire ahali Katonda okwo bhubhagilize echihika, mwagira amani g'okweyoga entambara, mwatamwa okufakara, mwajira obhutini, mwajira orususo n'obhujwahuki, n'okugonza kubhona amazima nigahonderwa. Omu bhigambo ebhyo nimweyoleka okwu mutainamu ntambara. ¹² bN'obhwo chili chityo tinabahandikiire ngendeleire kujuna ayakozire kubhi anga ayakoleirwe kubhi. Nkahandika kachimanyikage ahali Katonda okw mulikutugilira echika. ¹³ Echo na itwe chikatutera echika. Titwateirwe chika chonka; na Tito akatuha ebhyera ebhishagireho aha bhw'okumukorage okwu mwamukozirege. ¹⁴ Nkabhebhuga ahali wenene, mara kandi na imwe timunkwese nsoni. Bhuli kanya tubhagambira amazima, mara mwonene omwo ebhyo twayebhugire ahali Tito bhyazoka bhili bhy'amazima. ¹⁵ Chityo na wenene yayeyongera kubhagonza, k'akwijuka okwo mwena mwayanguhire kwekomya ebhyo yabhegesize, n'okwu mwamunyegeize n'echitinwa chingi muno. ¹⁶ Ninsemelerwa kubhona okwu nyinaobhwesige emalimali omuli imwe.