¹ Itwe abhahwezi bha Katonda nitubhatagiliza, echisache echo tulikubhona kitabhafera bhusa. ² katonda wenene nagamba ati, “Akanya kakagobhire nkakuhuliliza, echiro ch'okurokoka kachagobhire nkakurokora.” Lebha akanya nik'aka; lebha chir'echi nicho chiro ch'obhuchunguzi. ³ Titukusitaza muntu, omulimo gweitu gutaija gukagaywa. ⁴ chonka homu bhyo tukukora bhyona nitwoleka okwu tuli bhakozi bha Katonda: Nitwegumisiliza omu naku, omu bhiyengo, omu bhyemba, ⁵ obhwu tukuterwa, obhwo tukufungwa, obhwo tukuhyokerwa, omu milimo y'ensika, abhwo tulikuraara aha nkera, n'obhwo tulikurumwa enjara; ⁶ omu bhwera bhw'omwoyo, omu bhumanyi, omu bhwegumisiliza, omu kujira obhufura, omuli Mwoyo Mutakatifu, omu rukundo ezigobeleire; ⁷ omu kugamba amazima, n'omu bhusobhora bhwa Katonda; nitukoza ebhikwato bhy'obhugorogoki omu ndasana n'omu kwelinda. ⁸ obhwo tukukunirwa n'obhwo tulikugaywa, tukaitwa ibhara anga tukagambwa kurungi. ⁹ Twasasa abhatakumanyika, kandi okwu nitumanyika muno; twasana oti tufire, kandi okwu niturora. N'obhwo bhatubhonabhonyize tibhatwisire. ¹⁰ N'obhwo tuli bhajune, bhuli kanya nitusemelerwa. N'obhwo tuli bhanaku, abhantu abhandi nitubhatungisa, nitusana abhataine kantu, chonka twine bhuli kantu. Imwe. ¹¹ Bhakorinto, katubhagambire emitima tujikunjwire. ¹² Itwe titulikubhafundagatanisa. Imwe n'imwe mulikwefundagatanisa. ¹³ Mbwenu nimbagambira nk'alikugambira abhaana; na imwe kwakwo mukunjurire emitima. ¹⁴ Mutakumanyirangana na bhatakansi. Obhugorogoki n'omutima gubhi bigenda hamo? Omusana n'omwilima bhyakwikara hamo? ¹⁵ Beliali omu Ruyahudi ni Sitani omunyarwango. Kirisito yakusobhokerwangana ata na Beliali? ¹⁶ Rwensinga ya Katonda yakutahangana eta n'ebhihuuku? Itwe tuli Rwensinga ya Katonda asingire; nk'okwu Katonda wenene yagambire ati, “Nditura nabho mara nyikare nabho, ndibha Katonda wabho, na bhonene bhalibha ihanga lyange. ¹⁷ Aha bhwecho mubharugemu, mutaisukane nabho, akugamba Mukama, mutalikwata chintu echihagaire; ¹⁸ aho ndibhanyegeza, na imwe mubhe bhaana bhange; nikwo OMukama Rusobhorabhyona alikugamba.