¹ Isi nitusubha kwerata? Anga nk'okw abhandi bajira, nitwenda kubhaha imwe ebharua z'okubhasiima, anga imwe kuziha itwe? ² Imwe bhonene n'inlwe bharua yeitu y'okutusiima, ehandikirwe aha mitima yeitu, abhantu bhona bhajimanye bhajisome. ³ Imwe muli bharua eyo Kirisito yahandikiire akatutweka. Tehandikisiibwe bhwino, ehandikisize Mwoyo wa katonda asingire. Tehandikire aha mbengo za mabhare, emitima y'abhantu nizo mbengo ezo ehandikireho. ⁴ Oku nikwo kwesiga okwu tulikwesiga Katonda omuli Kirisito. ⁵ Itwe titwine chotwakwesiimira kujira tuti omulimo ogu nitugusobhora. Obhusobhora obhwo twine nibhuruga ahali Katonda, ⁶ ayatuhindwire bhakozi b'endagano ensya, etali ya Mateka agahandikire sana ehandikire omuli Mwoyo. Amateka agahandikire geita, chonka Mwoyo ajiza obhurora. ⁷ Amateka ageita, agahandikire aha mbengo z'amabhare, garabha gabheire geine echitinwa, Abhaisiraeli bhakalemwa kulebha Musa omu bhuso aha bhw'ensonga y'omwengelero gw'Amateka ago, aho Mwoyo ajiza obhurora tazoke omu chitinwa echishagireho? ⁸ Kokukoza eiramu kurabha kwarugirwemu echitinwa; ⁹ aho okukoza obhugorogoki tikukujiza chitinwa echishagireho! ¹⁰ Mazima okwu bhili, ebhyagiraga echitinwa tibhichina chitinwa aha bhw'ensonga y'echitinwa echikukira echitinwa chilinya. ¹¹ Manyasi ebhyahoireho kabhirabha bhikabha bhina echitinwa, aho echitali cha kuhwaho nikiragirwa kujira echitinwa echisagireho. ¹² Aha bhw'okubha twine esubi nk'eji, nitumaza muno. ¹³ Titukusana Musa ayayebhunzire echihundu aha meiso ngu Abhaisiraeli bhataija bhakabhona omwengelero niguhwaho. ¹⁴ Chonka bhonene bhakagumangana emitima. Na mbwenu, obhwo bhakasoma endagano ey'eira, echihundu chonene chonene tibhakihyaho, ensonga tichiina kwu chakurugaho sana omu busobhora bhwa Kirisito. ¹⁵ Na chirechi obhwo bhakasoma Amateka ga Musa, echihundu chikara chibhabhunzire emitima. ¹⁶ chonka obhwo omuntu akagaruka aha Mukama echihundu kimurugaho. ¹⁷ Mbwenu Mukama wenene n'iwe Mwoyo, kandi mbali Mwoyo wa Mukama asingiire, niho n'obhwegeleere bhuli. ¹⁸ Ahonu itwena nitusana Omukama w'echtinwa n'obhwo echihundu chituli aha meiso.echitinwa chonene chonene echikutabhuka aha Mukama, Mukama n'iwe Mwoyo, nikituhindura nikitusanisa nawe omu chitinwa echisagireho.