¹ Yesu ala walola amawumba akwela pamwamba ayikala pansi. awasambilizi wakwe awaya kweweliwe, ² Atalika awasambilizya ³ Awalongo awano wayimanya kuno wasaluka mumyezo; amuno uwufumu wa mwiyulu awawo. ⁴ Awalongo awakulosya; Leza aliwasansamusya. ⁵ Awalongo awachimyamya; amuno weni walipochelela chino Leza walayizya! ⁶ Awalongo awano wakulondesya ukuchita ukulonda kwakwe Leza; Leza aliwikusya. ⁷ Awalongo awankumbu; amuno leza aliwafwila Inkumbu ⁸ Awalongo awaswepe mumyenzo; weni walilola Leza. ⁹ Awalongo awano wakaleta umutende muwantu Leza aliwita ati awanakwe. ¹⁰ Awalongo awano wakuyimba muno wakachita ukulonda kwakwe Leza; uwufumu wa mwiyulu awawo. ¹¹ Mwewalongo pano wawasoweka, swinya wawayivya, wawavwanjila nivintu vyonsi Iviwipe uwufi wutupu muno mukankonka nene ¹² muwawa ichimwemwe muwazewela nkaninye amuno ichilambu chinu achikulu chili mwiyulu. avino wayimvizye nawatumwa wano wawatanjilizile. ¹³ Mwemuchele wamunsi ukuwa ndi umuchele wasukuka, pasi chimwi chino chingawunonya, ye wutachiwanga awuzima kwekamwi achileka wukasumbwe kunzi awulyatanjilwa nawantu. ¹⁴ Mwekuwala kwansi. akaya. kano kazengwa papela pamulundu katanga kafiswe. ¹⁵ Pasi wino akakozya ulukozyo alukupika mulweso, ukuwa akaluwika apatumpuke pano lukawalila wonsi wano wali mung'anda. ¹⁶ Avino lekani ukuwala kwinu kuwale pankolelo pawantu. alyakuti walole imilimo yinu imizima nga wachindika umonsi winu mwiyulu. ¹⁷ Mutize muwakwelengania muwati niza konona amasundo yakwe musa Imisambilizizye yawatumwa ntiza konona, ukuwa niza ukuti Imisambilizizye yawo Ifiswe. ¹⁸ Yizukani choo! pano Iyulu ninsi vichili vyalandalila, akawaliko konga nanti akansongo konga katalizimanjika kumwi kwisundo visuke Ivintu vyonsi vize vizimanjike. ¹⁹ Achaleka wensi winowiza wakana ukutontela lyonga ilyamasundo yaa amatichitichi, wasambilizya nawanji wowonye, aliwa amutichi nkani mu wufumu wa mwiyulu. ukuwa wino wiza wayatontela wasambilizya ukuchita wowonye aliwa amukulu mu wufumu wamwiyulu. ²⁰ Nkuwanena nkuti mutanga mwinjile mu wufumu wa mwiyulu nawanda suka ndi mwasuwilwa mwachita vino Leza akulonda mwalusya awasambilizya wamasundo na wafalisi. ²¹ Mwivwa kuno chavwanzilwe kuwantu ichakuti utakoma; wensi wino wiza wakoma aliwa numulandi. ²² Ukuwa kanonzi nkuwanena nkuti wensi wino wiza wavitilwa umunyina alipanzwa. nawensi wino wiza wanena umunyina wati, weliwese-we! alitwalwa pipembo lyamuandu nawensi wino wiza wanena umunyina wati watumpisya aliwa muwulwani wa kusumbilwa mwilungu lya mulilo. ²³ Achaleka ndi ukufima Ichawila chako kwe Leza pakavuwa swinya ukwizuka kuno umwinaso wakutinsyania. ²⁴ Usya ichawila choko pankolelo pakavuwa uwapita manti kuzinguluka amuya amulanjililana nu mwanaso nga pano uya ufima ichawila chako pakavuwa. ²⁵ Ndiwumwi akulonda ukukulongola ukuti akutwale kwipembo lyamilandu pakutalika amutela amwivwana, pano mutani muye kwipembo ngapano mulipipembonye akulemeke kwepaponye; nawe akulemeke kumusilikali akusumbile mung'anda yavingololo. ²⁶ Nkukunena kuti ulilanga ulimomonye usuke ulipe nakapepala kakupelelechezyanye. ²⁷ Mwivwa kuno chavwangwa chati, utazeleluka. ²⁸ Ukuwa nene nkawanena nkuti wensi wino akulolechesya umwanachi nukumukumbuchila ukuti awe awakwe atela wazeleluka kali mumwenzo wakwe. ²⁹ Ndi Ilinso lyako Ilyandilo likukupunuzya. ulifolowole! achizima kwe wewe ukusowelwa ichawi chimwi kumuwili wako ukulusye ukuwa numuwili wako wonsi usumbilwe mwilungu lyamulilo. ³⁰ Swinya ndi Ikasa lyako Ilyandilo likukupunuzya, uliputule ulisumbe ulifumya kumuwili achizima kwe wewe ukusowelwa ichawi chimwi kumwiliwako ukulusye ukuwa numwili wako wonsi usumbilwe mwilungu lya mulilo. ³¹ Swinya chavwanzilwe ukuti wensi wino wiza wawinga umuchi wazipila amupe kalata wakulekana.' ³² Ukuwa kanonzi nkuwanenena nkuti.ndi umonsi wawinga umuchi numwanachinye weyo walinji amutekane, alitela akumuzelelusya ndachino waya watwalwa swinya numonsi wino wamutwala nawenye akutela akuzeleluka. ³³ Swinya mwivwa kunochivwanzilwe kali ichakuti. utavulungania chino walayilizya, ukuwa uwafisya Ivilapo vyako ku Mfumu e Leza.' ³⁴ Ukuwa kanonzi nkuwanena nkuti, pano mukuwalayilizya mutize muwalapa; mutize muwalapa aiyulu. amuno Andulu yakwe Leza; ³⁵ Nanti amusili, amuno achitambalilo, chamanama yakwe nanti we Yerusalemu, amuno akayaka ka Mfumu nkulu. ³⁶ Nanti akulapa umutwe wako wako amuno utanga upilule ulunyele lwako lumwi luwe alutiswe pamwi alutifi. ³⁷ Ukuwa muwati, ata pamwi awe-chino chilusye vyonye- vyoo achitela chafuma ku muwipe. ³⁸ Mwivwa kuno chavwanzilwe ukuti, Ilinso aviyana nilinso linso liiwuye, Ilino nilino liwuye.' ³⁹ Ukuwa kanonzi nkuwanena njuti. mutize muwalandula wumwi wino akuwawifya ndiwumwi wakupama kwitama lyako ilyandilo, uleke akupame nakwitama lyakwe kamani. ⁴⁰ Ndi wumwi akusi akutwale kwipembo lyamilandu muno alilaya, lyako, umutayila numwinjilonye, ⁴¹ Ndi umusilikali wumwi ikandi wakufyeneneka ukumusendela Ichiya chakwe umulundu wonga, umusendela numwunjinye. ⁴² Ndiwumwi wakulenga chimwi, umupa. ndiwumwi akulonda ukwazima chimwi, umwazima. ⁴³ Mwivwa vino chavwanjizilwe ukuti ukunde iviwuza vwako, ukuwapa awalwani wako; ⁴⁴ Ukuwa kanonzi nkuwanena nkuti kundanji awalwani winu, swinya nawano wakuwayivya muwawapepela, ⁴⁵ Alyakuti muwe mwe wa monsi winu wino ali mwiyulu. amuno akaleka Ilanzi likuwalila awawipe nawazima, swinya akaleka Imvula Itonyelela kuwazima nakuwawipenye. ⁴⁶ Ngafwendi Leza angawalambula wuli ndimwakunda wano wawakunda watuponye? ngavino nawakasonchenzya wamusonko wakachita wowonye.; ⁴⁷ Wuzye ndi mukavwanjizyania nawano mwakundana watupu, nga yemwachita chizima-chi ngavino nawano watamanya Leza-nye wakachita wowonye. ⁴⁸ Mule muwe mwewalungamane ndivino umonsi winu uwamwiyulu amulungamane.