¹ Walile pano Yesu wamala ukusambilizya ivintunye vyoo, anena awasambilizi wakwe ati, ² Manyile kuno yala amanda yasila yawili kuwe ichakulya chakupitililwa, nu mwana muntu ayize alemekwe kukupamantilwa pawuchingane." ³ Ngapano wasimapepo wakulu na wasongo wawa Yuda awawungana apaliponga mwisano lyakwe kayafasi, esimapepo mukulu, ⁴ Awakwamba ukuti waleme Yesu munkama wamukome. ⁵ Awati, tutize tuchite choo pampindi ya chakulya, amuno pamwi awantu wangachita imponzela." ⁶ Walile pano Yesu ali mubetane mung'anda yakwe Simoni weyo uwamambombo, ⁷ Umwanachi wino walinji nu musazi wa mafuta ayifungo nunchile ayawuzi wukulu afika ayitila pamutwe wakwe Yesu ye ayisile pachakulya. ⁸ Awasambilizi awalola wowonye, awavitwa, awati, ng'uwononinye woo awachani? ⁹ Amuno amafuta yaa ayifungo nunchile yanga yakazwe indalama mvule zipwe kuwasaluke." ¹⁰ Ala Yesu wamanya chino wavwanganga ati, ngamukutamizya umwanachi wee chani? achizima kutaluvile chino umwanachinye wee wanchitila. ¹¹ Mulilanga muli nawasaluke penye, ukuwa nenji ntalilanga indi namwe pe. ¹² Chino umwanachinye wee wanchitila wanjitila amafuta yifungo nunchile wanjanizya lyankani kukuzikwa kwane. ¹³ Achaleka kanonzi, yizukanji chonyi choo! kunsinye kuno ilandwe zima lyandi liwalandwa, munsi yonsi, chonyichoo chino umwanachi wachita chiliwalandwa chiwe achakumwizuchila." ¹⁴ Ngapano wenga uwawasambilizi ikumi nawawili-wino witwanga ilyakwe yuda Iskarioti-aya kwewasimapepo. ¹⁵ Ati, wuzye mwandimumpe chani ndinawalemeka Yesu? awamupe ndela indalama ntiswe amakumi yatatu awamupa. ¹⁶ Ukufuma paponye Yuda awavwamba impindi nzima iyakuti alemechele Yesu kwe woliwo. ¹⁷ Pawanda wakutalika uwachakulya chino chisi numutawa, awasambilizi wayile kwe Yesu awamuwuzya awati, wuzye ukasi tukakuyanizye ichakulya chakupitilila kwi? ¹⁸ Nawe awatolelela ati, yanji mukaya kumuntu wumwi etunga mukamu nene muti, umusambilizya akuti, impindi yane yafichila nenenye nawasambilizi wane tukasi tuchitile ichakupitililwa mung'anda yako. ¹⁹ Mwasambilizi awachitila ndimuno Yesu wawanenezile, awaya nia ichakulya chakupitililwa. ²⁰ akula kwila e Yesu nawasambilizi wakwe ikumi nawawili awikala awawalya. ²¹ awala vino wakulya Yesu ati, nkuwanena nkuti, wumwi uwakwe mwemwe wandi ankutilile. ²² awasambilizi awaluwaluwa awatalika ukumuwuzya wenga nga wakuti, we mfumu wuzye ukutaka nene?" ²³ Yesu awatolelela ati, wenga wino akusomfya nani apaliponga mulweso awino wandi ankutilile. ²⁴ Umwana muntu wandi afwe ndimuno amawaliko matele yatachila, ukuwa akalanda kasikolo kumuntunye weyo wino wandi akutilile umwana muntu! changa chizipendi umuntunye weyo atanga akwatwe! ²⁵ E Yuda, ekakutilila, avwanga ati, nachawuzimanye wuzye anene, musambilizya? Yesu amutolelela ati, wayivwanjila." ²⁶ Alavino wakulya, Yesu atola ichakulya apepa asalifya, amontola apa awasambilizi wakwe ati, tolani mulye; woo amuwili wane." ²⁷ Anyaka atola ulupindi, asalifya kweleza, awapa ati, ng'wani mwenemo mwensi, ²⁸ Woo awazi wane, wilayano lyakwe Leza, awazi wane wuno wazwila awavule kwitetelwa lyamawembuko. ²⁹ Ukuwa nkuwanena nkuti, ntalitela ing'we vyoo swinya ukwiza fika pawanda wuno nding'wa ivipya namwe mu wufumu wa monsi wane." ³⁰ Ngapano awimbila ulwimbo awaya kumwamba wa mingungu. ³¹ Ngapano Yesu awanena ati, uwusikunye woo mwensinye mwandi musamale munsye, amuno amawaliko matele yavwanga yati, leza alikoma umuchemi nga uwufyo wa ng'onzi wusalangane. ³² ukuwa pano nazyulupulwa mbatanjilile ukuya ku Galileya." ³³ Peter atolelela Yesu ati, wenji pole ntalitela nkusye chinga tenga wonsi wangasamala! ³⁴ Yesu anena Peter ati, yizuka choo! uwusikunye woo pano mukolwe atani alamule watela wankana katatu wati ntakumanya. ³⁵ Peter atolelela ati, ntalitela mvwange inti ntakumanya, nanti ndi nkufwanye apaliponga nawe! awasambilizi wonsi aavwanjila ndi muno Peter nye wavwanjizile. ³⁶ Yesu aya nawasambilizi wakwe kumasyo yano yakakwitwa Getisemeni, awanena ati, "mwenji yikalani panye paa pano nenji naya koko mukupepa." ³⁷ Asenda Peter nawanakwe Zebedayo wawili. Amalanda nu wulumila avimuponela. ³⁸ Nga awanena ati, "navunkuntuka mumwenzo namalanda kutaluvile. yikalani panye-paa muwalolela nani." ³⁹ Apitila katichi, apano afukime, apepa ati, okowe tata, nd'achino chingachitwa,funtusya ulupindinye loo kwenene! ukuwa chino nene nkulonda pole, nkandi ukulonda kwako. ⁴⁰ Nga pano anyochela kuwasambizi wawo watatu azana waponechile; nga anena Peter ati, ngamuno chani chino mwensinye mwetatu mutanga mulolele nani akapindi katichi ndi kaa? ⁴¹ Lolelanji, swinya pepanji alyakuti mutize muponele mukwelezwa. Umuzimu weni wukulonda, ukuwa umuwili watonta." ⁴² Swinya Yesu aya mukupepa impindi yachitiwili, ati, oko we tata, nd'achino ulupindinye loo lutanga lufume ukuti nsuke ndung'we ukulonda kwako kuchitwe. ⁴³ Anyoka swinya azana awasambilizi waponechile; muno aminso yawo yang'wamile utulo. ⁴⁴ Swinya Yesu afuntuka, apita aya mukupepa impindi yachititatu, ukuvwanga amazwi ayaliyonganye. ⁴⁵ Nga pano anyoka kuwasambilizi ati, wuzye muchili muponechile mukupuza? silolani! impindi yafichila iyakuti umwana muntu alemekwe mumakasa yawawembu. ⁴⁶ Katukani, tuyani tuwapita.Silolani, umuntu wino akunkutilila." ⁴⁷ Walile pano Yesu achili akuvwanga, E Yuda umusambilizi wachitikumi na wawili afika, walinji niwumba kulu ilya wantu wano wasenzile impaanga ni zyanduku, watumilwe na wasimapepo wakulu na wasongo wawa Yuda. ⁴⁸ Kakutilila wapile iwumba ichimanyilo ati, umuntu wino nayanamukukula ye awili weyonye wino mukulonda mumuleme." ⁴⁹ Ala napaponapapo pano Yuda wafika atotomela ukuya kwe Yesu afika ati, umutende wuwe nawe, musambilizya, amukukula. ⁵⁰ Yesu atolelela ati, chita zuwa chino watunjila, wane! ngapano awafika awalema Yesu, awamunyepa achikala achiti-ndi. ⁵¹ Wumwi wino walinji nu Yesu asomola ulupanga lwakwe akoma umuzya wakwe simapepo mukulu, amusenga ikutwi. ⁵² Ngapano Yesu ati, someka ulupanga lwako muchipata, amuno wonsi wano wakasenda impanga walifwila kulupanga ⁵³ Wuzye utamanyile kuno nanga ndilile tata ukuti ayize anjanwe, nanti kuzimba antumile imipanda yawangeli ukulusye ikumi na wawili? ⁵⁴ ukuwa ndinanga ndilile tata wowonye, ngafwandi amawaliko matele yangafiswa wuli ukuti avino chiwe?" ⁵⁵ Ngapano Yesu anena amawumba ati, nga muno chani chino mwiza nizya mpanga nizya nduku kukwiza ndema, ngati nesimilandu? ngavino nikalanga mung'anda yakwe Leza penye muno nasambilizyanga, ukuwa nanti kuti mundeme. ⁵⁶ Ukuwa choo chachitwa alyakuti amawaliko matele yano yawalisilwe nawatumwa yafiswe. ngapano awasambilizi wonsi awamusya awasamala. ⁵⁷ Wano walemile Yesu wamutwazile kung'anda yakwe kayafasi, esimapepo mukulu, kuno awasambilizya wamasundo nawasongo wawungune. ⁵⁸ Ukuwa Peter wamukonsile lwapatali, ukuyafika mumusolo wang'anda yakwe simapepo mukulu. Ayinjila mumusolo ayikala pansi nawakalindilila, kukulola vino chandichiwe. ⁵⁹ Waimapepo wakulu ni wungwe lyonsi awelezya ukuvwambilizya uwukalola wawufi alyakuti wakome Yesu; lelo watatela wawuzane. ⁶⁰ Chingatenga awavule awakwe woliwo wayile awavwanga ivyakwe yesu uwufi wutupu. Pakupelelechezya awantu wawili awaya pankolelo awati. ⁶¹ Umuntunye wee watili, "ngamongola ing'anda yakwe Leza nyoke njizenge swinya mumanda yatatu."' ⁶² Esimapepo mukulu ayimilila anena Yesu ati, wuzye usi nitolelelo limwi kukulongolwa kwamwatanye woo?" ⁶³ Ukuwa alanga amyalile. Swinyanye simapepo mukulu amuwuzya ati, mwizina lyakwe mumi, kanonzi nkasiulape; utunene ndiwe mesiya, umwanakwe Leza." ⁶⁴ Yesu amutolelela ati, wataka molimonye ukuwa nkuwanena nkuti, ukufumilila impindinye yoyo nukufika kunkolelo mulilola umwana muntu ayisile lwakwikasalya ndilo lyawamaka yonsi, swinya akwiza pamawingo ya mwiyulu." ⁶⁵ Muno achonye-choo simapepo mukulu alepula ivizwalo vyakwe ati, akutuka Leza! tutanga tuwafwa nukuvwamba uwukalola wunji! kanonzinye kaa, mwayivwila akuvwanga amazwi mawipe! ⁶⁶ Nga mukuti wuli? awatolelela awati, wasindwa, swinya wazipila imfwa." ⁶⁷ Ngapano awamuswilila paminso awamuma nukumuma; nawo wano wamupamile na mapi awati, ⁶⁸ tumwa kwe sweswe, "we mesiya utake wino wakuma?" ⁶⁹ Ala pano Peter ayisile panzi mumusolo, apano umukazyana wumwi umuwomvi wakwe simapepo mukulu wayile kwe weliwe ati, nawewenye, walinji nu Yesu waku Galileya." ⁷⁰ Ukuwa akana pankolelo pakwe wonsi.Ati, ntamanyile chino ukutaka." ⁷¹ Afuma aya kumpongolo ya Musolo. Kokonye umukazyana winji umuwomvi amulola anena awantu wano walinji mumusolo ati, walinji nu Yesu wakwe Nazareti." ⁷² Swinya Peter akana ati, nkulapa, umuntunye wee ntamumanya." ⁷³ Apala pazimba katichi awantu wano wimilile paponye awaya kwe Peter awati, "nachawuzimanye awewenye, naponye umuvwango wako wakukusinila." ⁷⁴ Ngapano peter ati, fwandi ndi Leza ansunde nd'achino nkuvwanga uwufi! paponye, numukolwe alamula. ⁷⁵ Nga Peter ayizuka chino Yesu wamunenile ati, walapano mukolwe atani alamule, wandi utele wankana katatu wati ntamumanya. Afumila kunzi alila ichikalazi."