¹ Pawandanye wowo uwufumu wamwiyulu wakolana na wamwali ikumi wano wasenzile inyale zyawo awaya mukusunkania siwinga. ² Wasano awakwe woliwo walinji awatumpe, swinya wasano walinji awachenjele. ³ Awatumpe wasenzile inyale zyawo ukuwa nanti kusenda na mafuta yanji ⁴ Pano awakazyana wachenjele wasenzile amafuta yanyale mumisazi yawo. ⁵ Ala siwinga wazimba ukufika, awakazyana awasipula awaponechela. ⁶ Kwatezile kwawa awusiku pakasi pano wivwile inkuta yakuti, siwinga wee wiza! zanji mwize mumusunkanie.' ⁷ Awakazyana wawo ikumi awaziwuka awayania inyale zyawo. ⁸ Ngapano awakazyana watumpe awanena awakazyana wachenjele awati, tupani amafuta yinu yamwi, amuno inyele zitu zikuzimuchila. ⁹ Awakazyana wachenjele awakana awati, tutanga tuwape, amuno tusi namafuta yano yangatukwila ngayakwile na mwemwe. Yanji kuno wakakazya amafuta mkayikalile mwewenecho.' ¹⁰ Achaleka awakazyana watumpe wawo awaya mukukala amafuta, awala vino waya mukukala, siwinga afika. Awakazyana wano wayisinginie awinjila apaliponga nu siwinga kuchakulya chawinga ni chisakati achiyalwa. ¹¹ Pansizi awakazyana wawuye awafika, awatii tatakulu, tatakulu twiyulile twinjile! ¹² Ukuwa siwinga awatolelela ati, nachawuzimanye ntawamanyile. ¹³ Lolelanji amuno mutamanya uwanda nanti ampindi. ¹⁴ Chiliwa ngati amuntu wino walondanga ukufuma pakaya alema umusinzo; wisile awawomvi wakwe asya wawalasika pansawo yakwe. ¹⁵ Apa wensi ukulingana na maka yakwe; apa wumwi indalama imyanda ikumi impindi zisano (5,000) na winji amupa imyanda ikumi impindi ziwili(2,000) nu muwuye imyanda ikumi (1,000) alema umusinzo awapita. ¹⁶ Umuwomvi wino wapochelezile indalama imyanda ikumi impindi zisano (5,000), aya mukusandulula azanila swinya indalama zinji ndizyozyonye (5,000). ¹⁷ Nawe wino wapochelezile indalama ikumi impindi ziwili, aya azanila swinya zinji ndizyonye (2,000) ¹⁸ Ukuwa umuwomvi wino wapochelezile indalama imyanda ikumi (1,000) apita aya ayimba ichizinji azichila indalama zyakwe yisikulu momonye. ¹⁹ Ukuwa apala pazimba eyisikulu wawantunye wawo awela awazya indazama na wawomvi wakwe. ²⁰ Umuwomvi wino wapochelezile indalama imyanda zinji ndizyozyonye (5,000) ati, wampile indalama imyanda ikumi impindi zisano, ukuwalola! naya nonjelezya zinji ndivino zino wampile.' ²¹ Yisikulu amunena ati, wachita ichete, we muwomvi muzima umusuwilwa! walinji wemusuwilwa pandalama ntichi, kanonzi nandi kulasike pa ndalama mvule. zanga tuwazewela apaliponga.' ²² Ngapano umuwomvi wino wapochelezile indalama imyanda ikumi impindi ziwili (2,000). Afika ati, wampile indalama zyoo, ukuwalola tatakulu! naya nonjelezya zinji ndivino zino wampile (2,000). ²³ Yisikulu amunena ati, wachita ichete, wemuwomvi musuwilwa! walinji wemusuwilwa pa ndlama ntichi. Kanonzi nandi nkulasike pa ndama mvule. Zanga tuwazela swensi.' ²⁴ Ngapano umuwomvi wino wapochelezile indalama imyanda ikumi (1,000) afika ati, tatakulu nakumanya kuno watala; ukasinza kuno utatanda, swinya ukasezya kuno utasumba imbeyu. ²⁵ Achaleka muno antete nayile mvuchila indalama zyako pansi, lola! indalama zino wampile zyoo.' ²⁶ Yisukulu amunena ati, ye wechikata chikulu wuli! ndiwamanyile kuno nkasinza kuno ntatanda, swinya nkasezya kuno ntasumba imbeyu. ²⁷ Ngachani chino utayile usengula indalama zyane kubanki? peni nanga njize mpochelele zyonsi apaliponga nazino zyonjelezwa pano niza. ²⁸ Achaleka kanonzi, mupokani indalama mupe wino ali nindalama imyanda ikumi impindi ikumi (1,000) ²⁹ Amuno wensi wino alinavyo, alipwa ivivule, viwalafuka nukulafuka; ukuwa wino asinavyo, nachino ali nachonye chilipokwa kwe weliwe. ³⁰ Nichiwelewelenye choo! chisumbilani kunzi mumfinzi nkulu; kokonye akuno chiwalila nukulumania amino.' ³¹ Alilapano umwana muntu wiza mukutema uwufumu, apaliponga nawangeli wakwe alipungama pa ndulu yachifumu, ³² Imyiko ya wantu wonsi munsi waliwungana pankolelo peweliwe. Apano aliwapawunkania mumawumba yawili ndivivo umuchemi akapawula ing'onzi kumbuzi: ³³ Ayize awike ing'onzi kwendilo nazyo imbuzi kwechimani. ³⁴ Ngapano imfumu iyize inene awantu wano wali kwe ndilo ati, mwewantu wano mwapepwa nu mukwasi wane: zanji zanji mwize mupochelele uwufumu wuno wayanizwa mwemwe ukufumilila kuluwanda kwansi. ³⁵ Pano inzala yandumile mwandezile, napano ulusala lwandumile mwampile aminzi ing'wa; nalinji ne mweni amumpochelela mung'anda zinu. ³⁶ Chintakwa amuzwika; nalwile amuntetesya, muvingololo, amwiza amusyungula.' ³⁷ Ngapano awalungamane wize wamutolele awati, ngawandachi mfumu pano twakuweni inzala ikulumile atukulela nantalusala lukulumile atukupa ung'wa? ³⁸ Nga wandachi wuno wakuweni wemweni atukupochelela mung'anda zitu, nanti achintakwa atukuzwika? ³⁹ Nga wandachi pano twakuweni wemulwale nant amuvingololo, atiza atukunsyungula? ⁴⁰ Imfumu iyizeitolele iti, nachawuzimanye nkuwanena nkuti, pano mwachitizile wenga uwawatichinye waa awana witu, mwanchitizile nenenye.' ⁴¹ Ngapano ayize anene nawakwikasa lyakwe kamani ati, mfumilani paa. Mwewantu mwatipwa nu Leza! muye kumulilo wamuyayaya wuno wayanizwa satana na wangeli wakwe! ⁴² Pano inza yandumile matandezile, na pano ulusala lwandumile mutampile aminzi ya kung'wa; ⁴³ Nalinji ne mweni amukana ukumpochelela mung'anda zinu, chintakwa nanti kuzwika; nemulwale na mung'anda ya vingololo nanti kumpechela.' ⁴⁴ Ngapano nawo wize wamutolelele awati, nga wandichi mfumu, pano twakuweni inzala ikulumile, nanti alusala lukulumile nanti amweni chintakwa nanti pamwi wemulwale, nanti amung'anda ya vingololo, atukana ukupechela? ⁴⁵ Ngapano imfumu iyize itolelele iti, nachawuzimanye nkuwanena nkuti, pano mwakanile ukuchitila wumwi-uwawatichinye waa, anenenye anemuntu mwakanile unchitila. ⁴⁶ Wanye-waa waliya kukusundwa kwa muyayaya; ukuwa awalungamane weni waliya kuwumi wa muyayaya."