¹ Swinya Yesu wanenezile awantu mumilumbe ati, ² Uwafumu wamwiyulu wakolana imfumu yino yatewesile ichakulya chiwinga wamwanakwe. ³ Atuma awawomvi wakwe kukwitwa kuchakulya, ukuwa watalondanga ukuya kweneko. ⁴ Achaleka anyaka atuma awawomvi wanji namazwi yakuti kanenani awitwa muti, ichakulya chitewesilwe. Inkambaku zyane nawanang'ombe wine wakomilwe, vyonsinye visenginwe, sizanji kuchakulya chawinga." ⁵ Ukuwa awitwa nanti kupechela awaya mukuwomba imilimo yawo. wumwi aya kuchalo chakwe, numuwaya aya kuno akakazizya insawo yakwe. ⁶ Nawo wanji awalema awawomvi wamfumu, awawuma awawakoma nukuwakoma. ⁷ Imfumu ivitwa nkaninye ituma imisika yakwe, awaya awakoma awantu wawo awocha nakayanye. ⁸ Ngapano imfumu iyita awawomvi wakwe ati, ichakulya chane ichawinga chitewesilwe akuwa awitwa watazipizile ukwizalya. ⁹ Achaleka yanji mumisolo mukite wonsinye wano mwazana wize walye ichakulya ¹⁰ Achaleka awawomvi awaya mumilo awaya awawunganika awantu wonsi wano wazanile, awazima nawawipenye ing'anda yawinga iyizula nawantupwi. ¹¹ Ukuwa ila imfumu yinjila mukulola wano wisilwe alola umuntu wino atazwite ichizwalo chawinga! ¹² Imfumunye yoyo iwuzichisya umuntu weyo iti wenenga uyizile moo wuli nanti kuzwala ichizwalo chawinga?' umuntu asowa ichakuvwanga. ¹³ Ngapano imfumu inena awawomvi wakwe iti, munyepani kumakasi nakumanama mumasumbile kumfinzi kokonye akuno akalilange nukulumania amino ¹⁴ Amuno awavule wakwitwa, ukuwa watichi wakusolwa." ¹⁵ Nga awa falisi awapita awaya mukwamba Yesu umwakuti wamulemele kumawuzyo yano wayile mukumuwuzya. ¹⁶ Awatuma awasambilizya wawo nawantu wakwe Herodi wamwi kwe Yesu. Awaya awamunena awati, musambalizya twamanya kuno ukusimichila, ukusambilizya awantu ukulonda kwakwe Leza nukusimichila, nanti kupechela chino awantu wakwelengania muno usipechela impumi yamuntu. ¹⁷ Achaleka fwandi tunene nga ukwelengania wuli? wuzye chiwipa mwisundo litu ukusonka imisanko kumfumu yawa Roma pamwi pole?" ¹⁸ Ukuwa Yesu amanya uwuwipe wawo, ati, mwewakachenjenzya - mwe! nga mukunjelezezya chani? ¹⁹ Ndanjizyani ulundalama Lwamusonko! awamutwalila ulundalama. ²⁰ Nga awawuzya ati nga impumi yoo izina vino vili palundalama avyalweni? ²¹ Awamutolelela awati avyamfumu yawa Roma achaleka Yesu awanena ati, achaleka fwandi panji imfumu vino avyakwe, nivyakwe Leza, panji Leza. ²² Awala wivwa wowonye, awazunguka; awamusya awapita. ²³ Pawandanye wowo awa saduki wamwi awaya kwe Yesu. (walinji awawo wano watanji watanga wazyulupuke ndiwafwa) ²⁴ Awati musambilizya Musa watusambilizizye ati ndi umuntu wino asi nikwata wafwa, umunyina asyala atwala umuchi alyakuti awakwatile wino wafwa awana. ²⁵ Kwalinji awang'anda yonga munenulambali wano twikalanga nawo. Umukulu wawo atwala,afwa nanti kwata, asila umuzuna umuchi. ²⁶ Awuliwonganye kuwachitiwili, nuwachititatunye mpaka nuwachiti munenulambali ²⁷ Pakupelelechezya numwanachinye weyo afwa. ²⁸ Ale, ngafwandi pawanda wakuzyulupulwa kwawafwe, umwanachinye weyo aliwa wemuka wenu vino wonsinye wamutwazile." ²⁹ Yesu atolelela ati, ye mwasowo wuli! amuno pano mutamanya amawaliko matele nanti akumanya amaka yakwe Leza. ³⁰ Amuno pano awafwe wiza wazyulupulwa waliwangati awangeli wamwiyulu, awonsi nawanachi wataliwatwalana. ³¹ Ukuwa kuvyakuzyulupulwa kuwafwe wuzye mutawazya chino Leza wawanena? wavwanga wati, ³² Ne Leza wakwe Abrahamu, e Leza wakwe ayizeki, swinya na Leza wakwe Jekapu. Choo chikusula kuno we leza wawawumi asi we Leza wawafwe. ³³ Ayala amawumba yivwa imisambilizizye yakwe ayazunguka. ³⁴ Awala awa falisi wivwa kuno Yesu wamyalalisile awa saduki awawungana apaliponga. ³⁵ Wumwi uwawa falisi-nye wawo walinji amusambilizya wamasundo, ati ³⁶ Musambilizya, nga alisundo-chi lino lyakula lyalusya mumasundo?" ³⁷ Yesu amutolelela ati, uwakunda imfumu e Leza wako numwenzo wako wonsi; numuzimu wako wonsi, namano yako yonsi. ³⁸ Lyonye-lyoo alili sundo kulu ukukusye yonsi, swinya alili lyakulemasya. ³⁹ Nalyo ilyachitiwili vyakolana lyati, uwakunda umuwuyo ndivino wayikunda. ⁴⁰ Amasundo yakwe Musa yonsi nimisambilizizye yawatumwa yeyamila pamasundonye ya yawili." ⁴¹ Awala awa falisi wawungana apaliponga. Yesu awawuzya ati ⁴² Ngamwensi mukutanji chani nivyakwe mesaya? mukutanji amwanakwe?" Awamutolelela awati tukutanji amwanakwe Davidi." ⁴³ Nga Yesu awawuzya ati, ngafwandi amuno chani chino umuzimu winjizile mwe Davidi ukuti awakwita mesayanye weyo ukuti. Mfumu amuno avino Davidi wavwanga wati, ⁴⁴ Imfumu e Leza wanenile imfumu yane ati yikala kwikasa lyane ilyandilo nsuke mbike awalwani wako pansi pamatambayako."'?" ⁴⁵ Ngafwandi ndi Davidi wamwitanga akuti mfumu ngafwandi mesayanye weyo angawa amwanakwe Davidi pachani? ⁴⁶ awasowa nizwi nanti lyongalyonga ilyakutolelela wowo awapenyezya ukuwuzya Yesu amawuzyo.