¹ Nibha ati munda ya Ikonio Paulo na Barnaba bhengiye amwi munda ya risangiro rya abhayahudi no kuroma kutyo abhanu bha abhanu na abhayawudi bhaga mbekilisha. ² Nawe bhanyatongwa bhechiyahudi bhenyere no bhwenge bhwa abhanyacharo mbabhakora mbabha bhabhibhi kubhanyaruganda bhebhwe. ³ Ambe wori mbekara eyo mwanya murera, mbaroma na ribhasi na amanaga go mukama, enu mbasosha obhushahidi yinguru ye chigongo chaye. Akorere kutyo okusosha echibhalikisho nebhirugusho bhikorwe na amabhoko ga Paulo na Barnaba. ⁴ Nawe abhanu bho musi mbagabhanyika: Abhandi bhabheye amwi na abhayahudi, na abhandi amwi na jintumwa. ⁵ Abhanyacharo na abhayawudi amwi na abhatangasha bhebhwe bharegejere okubhakorera amabhibhi no kubhasanjaga na amabhuyi Paulo na Barnaba, ⁶ Nawe bhejire bvhang'ura riyo, mbabhilimila mumusi gwa Likaonia, Listra na Derbe, na mubhyaro bhinu bhili yeyi narya, ⁷ Enu bhagendereye okurasha ying'ana. ⁸ Listra aga ariyo munu wumwi unu aga ekayeyo, amaguru gaye gaga gatari na managa, aremaye kusoka munda ya nyiramwene, achariga kulibhata. ⁹ Omunu hunu anguwe Paulo narona. Narora ati aga nekilisha okuosibhwa. ¹⁰ Naroma kumwene kubhuraka bhwa Yinguru, "Yimereguyu na amaguru gao." Omunu wurya nemereguru namba okulibhata. ¹¹ Riyijo rya abhanu ryejire okurora Chinu chakorerwe na Paulo, mbaragilisha, munyaika ya Kilikaonia, "Omusambwa gaching'ura rwa abhanu." ¹² Mbabhilikila Barnaba "Zeu" na Paulo "Herme" kwokubha niwe aga ari omwayiki omukuru. ¹³ Omutangasha wa Zeu, wunu risangisho ryaye ryaga lili anja wo musi, omwene na abhafu bha abhanu bhaga mbenda okusosha ebhiyanwa. ¹⁴ Nawe jintumwa, Barnaba na Paulo, bhejire okungwa linu, bhatamuye emyenda jebhwe bhwangu bhwangu mbagenda anja kubhanu abhafu, mbamilana mbayika, ¹⁵ Abhanu bhanu, kwaki omukora amang'ana ganu? Eswe one chino bhwiganilisha rwobhwemwe. Echibharetera ying'ana yinjomu, ati muyinduke musoke kubhinu bhinu bhitari bhijomu muje ku Nyamuwanga wunu asweye, wunu abhumire orwire, echaro na yinyanja na bhyone bhinu bhilimo. ¹⁶ Kumyanya jinu jaturire, ekilishe abhanyacharo okulibhata munjira yebhwe abhene. ¹⁷ Nawe achari, atasigire rwa wunu atari na (Shahidi), kuriyo akorere kisi nabhayana yingubha okusoka kurwire na myanya jebhilimwa nokubhejusha emyoyo jebhwe ebhyokurya no okujomerwa" ¹⁸ Hata kumang'ana ganu, Paulo na Barnaba kunyako bhaganyishe abhanu okusosha ebhiyanwa. ¹⁹ Nawe abhayahudi abhandi bhanu bhasokere Antiokia na Ikonio bhejire okurembeja abhanu. Mbabhuma Paulo na mabhuyi mbamukurura mbamusira anja ya musi, mbatoga ati afu. ²⁰ Hata kutyo abheyigisi bhaga bhemereguyu yeyi nawe, emukire, mbengira mumusi. Orusuku rwa kabhili, bhajiye Derbe na Barnaba. ²¹ Baada yokurasha ying'ana mumusi gurya no kukora abheyigisi bhafu, bhasubhire Listra, mbakinga Ikoniam, hadi Antiokia. ²² Bhagendere okusimbisha emioyo okugenderera nokwikilisha, Nayika "Lazima chingire mubhukama bhwa Nyamuwanga kwo kutura munyako." ²³ Bhejire bhasora abhakaruka okusoka mumasangisho ga bhanu bhekirisishe, kukusabha nokwinyima, bhabhateye mumabhoko go mukama, wunu abhene abharamya. ²⁴ Bhamarire mbatura Pisdia mbakinga Pamfilia. ²⁵ Bhunu bharomere amang'ana bhabheye Perga, bhoromokere okuja Atalia. ²⁶ Okusokeyo bharinyire yimeli ,mbakinga Antiokia, eyo bhaga bhasosishe kuchigogno cha Nyamuwanga kumurimu gunu gwaga gwaoye. ²⁷ Bhejire bhakinga Antiokia, mbakumanya amwi likanisa, mbayika amang'ana ganu Nyamuwanga aga abhakoreye, nakutyo abheguriye orwigi rwa abhanyacharo okwikilisha. ²⁸ Bhekaye mwanya murera na abheigisibhwa.