1 Kiriisito atoheere ubhwiyagaaruri korereke twikare mubhwiyagaruri. Nango mwimeerere bhwema, mutiisirirya kogaroka naatu mobhomboosa bhwi imigiro. 2 Mwitegeerere keno inye Paauro nikobhabhoorera! Ariibhe muriisirirya kosaarya igoro wu ukugwata imigiro ja Musa, Kiriisito atakobha na bhwera bhwobhwosi kwa niimwe. 3 nerabhabhoorera naatu kobha, umusubhe wowoosi wono akwisirirya kosaarwa, areenderwa kugwata emigiro ja Musa. 4 Areebhe muriisega kobharwa kobha abhaato bhe eheene mobhotange bhwa Mungu ku ukugwata imigiro, momenye kobha mwiyahwire kwa Kiriisito, na mutigire ebhegongi bhya Mungu. 5 Nawe Ekoro endendu eratonaja itwe kwisega kobha, torabharirwa eheene konzera yu ubhwisirirya. 6 Mmbe areebhe tugwateene na Yeesu Kiriisito, kosaarwa hamwe kotama kosaarwa kotaana bhwera bhwobhwosi. Ekegero chu ubhwera nu-bhwisirirya bhono bhokokora emeremo kobhoseegi. 7 Imwe mware moraja bhwaheene! Nango ne-weewe abharechirye motagwata amaheene? 8 Obhokorokombi bhuyo bhotaroori kwa Mungu wono abhabhirikiire. 9 Nawe momenye, "Ubhutunduuru bhusuuhubhu bhoratuundurya riigiri ryosi!" 10 Nena amaheene kobha imwe moragwatana no Omokorio Yeesu, kwebhu motakwisirirya kokangiribhwa. Nawe omooto wowoosi wono arabhanyaache, aratinirwa. 11 Abhahiiri bhaane, aree3bhe nekeere nerarwaza kobha ereenderwa kosaarwa, kwake nango Abhayaahudi bharaanyaacha? Angabheere nembu,ubhurwazi bhwane igoro wo omosarabha gwa Kiriisito bhotaare bhoragirya bhanyiigatanere. 12 Niriigomba bhano bhakobhanyaacha komang`ana ge esaaro, bhangiitinire abheene! 13 Abhahiiri bhaane, mubhirikiirwe korereke mobhe bhu ub hwiyagaaruri. Nawe ubhwiyagaaruri bhwanyu bhotagirya mutune isimuka ya obhobhe, nawe mwisakirye kobhoseegi. 14 Imigiro josi ja Musa giri riswajo remwe kobha, "Omoseege nyarubheri waazo chembu wiseegire aumwene." 15 Nawe areebhe muriirya amatimba, mwangarere motaaza kwiricha imubheene ko bheene. 16 Mmbe, nerabhabhoorera kobha, mobhe morakangatwa ne Ekoro endendu. Moreekorebhu, motakutuna naatu isimuka yo obhobhe. 17 Nerabhabhoorera, ku riyo bhyosi bhino omobhere gukwigomba, bhetare chembu Ekoro endendu ikwenda, na chembu Ekoro endendu ikwenda, bhetare chenbu omobhere gukwigomba. Ekoro endendu no omobhere bhehahakaana, ku riyo motakwenderwa kokora chuchusi keno mukwenda mokore. 18 Areebhe morakangatwa ne Ekoro endendu, motare iyaase wi imigiro. 19 Mmbe, amang`ana gano gakokorwa igoro wi isimuka yo obhobhe ne-gano: ikisimbe, etaaro, kokora amang`ana ga zisoni, 20 Kosengera amasambwa, obhorogi ,ubhubhisa, iryomana, rihari, obhororo, ekenyaweeto, obhotaaman`ya, ekemboroori, 21 eng`eera, ubhunywi, omosooho na amang`ana agande goosi gano gatuubhene na gayo. Nerabhabhoorera chembu namarire kobhabhoorera kobha, abhaato bhano bhahaakora amang`ana gayo, bhatakogabha chochosi mobhotemi bhwa Mungu. 22 Nawe areebhe torakangatwa ne Ekoro endendu, torabha nu umusumu gwe Ekoro endendu. Umusumu guyo ni-bhoseegi, obhozomerwa, omorembe, ubhwigumirirya, obhozomu, bhwerya koro, obhorange, 23 obhonyoohu ne ekerengo. Gotareeho umugiro gono gukwanga amang`ana ncha gayo. 24 Abhaato bhano bhagwateene na Yeesu Kiriisito, bhatakuhirwa kebhe ni isimoka yo obhobhe, hamwemwe na amiiseegi gaabho amabhe, ko kobha bhagabhambire komosarabha gwa Yeesu. 25 Turiikara kubhwisegi bhwe Ekoro endendu, tutune obhokangati bhwaze. 26 Tutiikumya bhooha, tutiimohyaku mang`ana na kwirorera rihari.