¹ Abafarisayo n'abegesa b'Amateka ababaire barugire Yerusalemu bagoba Yesu. ² bagya babona okwo abegesibwabe abandi balikulisa emikono ehagaire, nikwo kugir'oti etanabire. ³ (Abafarisayo n'Abayahudi abandi bona, tibalya batanabire mikono, nibegendeleza emichwo ya baish'enkurubo. ⁴ Kumara kuruga omu katare tibaina kulya batanabire. Haliho n'emichwo endijo nyingi eyo begendeleza, nk'okwogya ekikompe n'enyungu n'ebikwato by'omulinga nangu n'ebitanda.) ⁵ 5 Abafarisayo n'abegesa b'Amateka bamubaza kubaki abegesibwabe batalikugendeleza michwo ya baishenkurubo, bakalisa emikono ehagaire?" ⁶ Abagambira ati, “Inywe ngobya, Isaya akaranga amazima ahali inywe, nk'okwo kili omu bihandiko bitakatifu, ati ‘Abantu aba ekitinwa bampa eky'aha munwa kushai, kyonkai emitima yabo tenyetaireho; ⁷ okunfukamira kwabo tikwina mugasho, Amateka agatairweho abantu nigo balikwegesa oti nigo ga Ruhanga.’ ⁸ Mulekeire emihango ya Katonda, emichwo ey'abantu niyo mulikugwaho enda n'amabere.” ⁹ Abagambira ati, “Mwina akalyo k'okwanga emihango ya Katonda, mubone kuguma aha michwo yanyu! ¹⁰ Musa akagamba ati, ‘Okunire sho na nyoko;’ kandi ‘Olinya ajuma ishe anga nyina nakafe.’ ¹¹ Shana inywe nimugira muti, ‘K'omuntu yakugambira ishe anga nyina ati: Ekyo nakukuhaire kyabaire eibikiro (nikwo kugir'oti kihongeirwe Katonada) ¹² aho nimuba mwamutangire kugira ekyo yakolera ishe anga nyina, ¹³ ebyo Katonda alikugamba nimubisheshamu amaizi aha rw'emichwo yanyu eyo mulikwegesa banu. Kandi ebintu nk'ebi nimukora bingi.” ¹⁴ Yesu ashuba ayeta abantu abagambira ati, “Mumpulilize inywe nywena mara mushobokerwe: ¹⁵ taliho kintu kiruga aheru kikataha mu muntu kikamuhagaza, shana ebimuruga omunda nibyo bimuhagaza. ¹⁶ (Araba aina amatwi g'okuhulira ahulire). ¹⁷ Kayabaire yatahire omunju yasigireho abantu, abegesibwabe bamubaza enfumo egi. ¹⁸ Abagambira ati, “Lero nainywe timulikushobokerwa? Timulikubona okwo ekiruga aheru y'omuntu kikamutahamu tikyakumuhagaza ¹⁹ Enshonga nikimutaha omu rubunda, tikilimutaha mu mwoyo, mara nikishuba nikituruka.” (Kityo akaba nagamba okwo ebyakulya byona tibiba bihagare.) ²⁰ Agambati, “Ekiruga omu nda yomuntu nikyo kimuhagaza. ²¹ Omu mutima gw'omuntu nimwo haruga ebitekelezo bibi: obusiyani, obushuma, okwita muntu, obujanga, ²² okwegomba eby'abandi, omutima gubi, obulyalya, okutekunira, eitima, okujumangana, eikuru n'oburofu. ²³ Ebibi byona biruga omunda, mara nibyo bihagaza omuntu.” ²⁴ Yesu arug'okwo agya omu nsi eyataine Tiro na Sidoni. Agira mbali yataha omu nju, atalikwenda muntu k'amanya okwo aliyo, chonka tibashoboire kumusheleka. ²⁵ Akanya kake omukazi yamuhuliize. Akashangwa aina omwana muto w'ombwisiki akwetwe Sitani, aija agwa Yesu omu maguru. ²⁶ Omukazi akaba ali Mugirikikazi, ow'oruganda rw'Abasirofoiniki. Amutagiliza kubinga eiSitani omu muhara. ²⁷ Yesu amugambira ati, “Ak'abaana babanze balye, aha rw'okuba ti kirungi kukwata mukate gw'abaana okagurashira mbwa.” ²⁸ Nawe omukazi amuhorora ati, “Nikwo, waitu Mukama, chonka n'abaana kababa nibalya, ebibaragara embwa zibilya.” ²⁹ Yesu amugambira ati, “Aha kigambo kyawe eki kwata omuhanda ogende, muhara wawe yarugwamu eiSitani.” ³⁰ Omukazi ashuba omuka, ashanga omwana abyamire aha kitanda, eiSitani lyagenzire. ³¹ Yesu aruga omu nsi eyataine Tiro, araba Sidoni agoba aha Nyanja ya Galilaya, alesirwe omu nsi y'ebigo 10 ebyayetwaga Dekapoli. ³² Bamuletera omushaija omwigazi w'amatwi mara mutita. Bamutagiliza kumutaho omukono. ³³ Amwihya omu mbaga agenda nawe wenka omu kebeto, amukwata omu matwi, ashuba achwa akachwanta amukwata aha rulimi. ³⁴ Yesu wenene aleba eiguru, aikya ekikohe, amara amugambira ati, “Efata,” nikwo kugir'oti, “Okinguke.” ³⁵ Amatwi ga wenene gakinguka, orulimi rukomorogoka, abanza kugambagi. ³⁶ Atanga abantu bona kubigambira omuntu. Chonka okwo yabatangaga baba nikwo beyongera kubigamba n'amani. ³⁷ Batangara, baburwa eky'okugamba, bati, “Yatebekanisa buli kantu; nangu n'abaigazi b'amatwi yabashoboza kuhulira, kandi abatita yabagambisa.”